សម្ដេច ហ៊ុន ម៉ាណែត៖ ភាគរយប្រជាជនខ្មែរទៅព្យាបាលជំងឺនៅក្រៅប្រទេសមានចំនួនតិចទេ បើប្រៀបធៀបការព្យាបាលក្នុងស្រុក

សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានលើកឡើងថា ប្រជាជនខ្មែរ ទៅព្យាបាលជំងឺនៅក្រៅប្រទេស បើគិតជាភាគរយនៃចំនួនប្រជាជន គឺមានចំនួនតិចនោះទេ បើប្រៀបធៀបនឹងការព្យាបាលនៅក្នុងស្រុក។ ការលើកឡើងនេះ បានធ្វើឡើងក្នុងពិធីសម្ពោធដាក់ឲ្យប្រើប្រាស់ជាផ្លូវការ មន្ទីរពេទ្យតេជោសែនកោះធំ នៅព្រឹកថ្ងៃទី ១៣ ខែមីនា ឆ្នាំ ២០២៤នេះ។

ឆ្លើយតបនឹងការមតិលើកឡើងថា កម្ពុជា ឃើញតែពង្រឹងវិស័យសុខាភិបាល តែប្រជាជនទៅព្យាបាលជំងឺនៅក្រៅប្រទេសច្រើននោះ សម្ដេចធិបតី ហ៊ុន ម៉ាណែត បានឆ្លើយតបថា ភាគរយដែលប្រជាជនខ្មែរទៅព្យាបាលនៅក្រៅប្រទេស គឺមានចំនួនតិចនោះទេ តែការព្យាបាលនៅក្នុងស្រុកមានចំនួនច្រើន។

សម្ដេចនាយករដ្ឋមន្ត្រី បានថ្លែងថា «​អញ្ចឹងបានអ្នកខ្លះ គេចេះតែសួរថា កម្ពុជា ឃើញតែពង្រឹងវិស័យសុខាភិបាល ហេតុអីក៏ប្រជាជនខ្មែរទៅព្យាបាលនៅក្រៅច្រើនម្លេះ ខ្ញុំថា ទៅព្យាបាលនៅក្រៅបើគិតជាភាគរយនៃប្រជាជន ដែលព្យាបាលរាប់លាននាក់ក្នុងស្រុកតិចទេ ពេទ្យនៅក្នុងស្រុកយើងព្យាបាលមនុស្សរាប់លាននាក់ក្នុងមួយឆ្នាំ»។

សម្ដេចធិបតី ហ៊ុន ម៉ាណែត បានលើកឡើងថា ចំពោះប្រជាជនខ្មែរដែលមានលទ្ធភាពទៅព្យាបាលជំងឺនៅក្រៅប្រទេស គឺមិនមានអ្វីចម្លែកនោះទេ ដោយសម្ដេចលើកឧទាហរណ៍ថា ប្រជាជនកាណាដាខ្លះ ទៅព្យាបាលជំងឺនៅអាមេរិក ហើយប្រជាជនអាមេរិក និងជប៉ុនខ្លះ ក៏ទៅព្យាបាលជំងឺមួយចំនួននៅក្រៅប្រទេស ផងដែរ៕