លោក ចិន នី ត្រូវបានតែងតាំងជាស្នងការខេត្តត្បូងឃ្មុំថ្មី ជំនួសលោក ម៉ុន មាគ៌ា

លោកឧត្តមសេនីយ៍ត្រី ចិន នី ត្រូវបានប្រកាសតែងតាំងជា​ស្នងកការនគរបាលខេត្តត្បូងឃ្មុំ ជំនួស​លោកឧត្តមសេនីយ៍ទោ ម៉ុន មាគ៌ា ដែលដល់អាយុចូលនិវត្តន៍។

លោកឧត្តមសេនីយ៍ឯក តាន់ សំណាង អគ្គស្នងការរងនៅថ្ងៃទី ២៧ ខែមីនានេះបាន អញ្ជើញ​ជាអធិបតី ប្រកាសតែងតាំងមុខតំណែងស្នងការ នៃស្នងការដ្ឋាននគរបាលខេត្តត្បូងឃ្មុំ។

លោក ជាម ច័ន្ទសោភ័ណ អភិបាលខេត្តត្បូងឃ្មុំ បានថ្លែងនូវការកោតសរសើរចំពោះបងប្អូន​កង​កម្លាំងនគរបាលទាំងអស់ដែលបានខិតខំបំពេញភារកិច្ចបានយ៉ាងល្អប្រសើរ ដោយបានផ្តល់​សេវា​ឆាប់រហ័ស និងការពារសុខសុវត្ថិភាពជូនប្រជាពលរដ្ឋតាមបណ្តាមូលដ្ឋាន​បានយ៉ាងល្អប្រសើរ​នាពេលកន្លងមក ព្រមទាំងជំរុញឲ្យបន្តលើកិច្ចការងារនេះ ឲ្យកាន់តែល្អទ្វេរឡើងបន្ថែមទៀត។ បន្ថែមពីលើនេះ លោកអភិបាលខេត្ត​បានដាក់ចេញនូវវិធានការ​សំខាន់ៗ​ចំនួន​៥រួមមាន៖

១.ពាក់ព័ន្ធបញ្ហាគ្រឿងញៀន ត្រូវចិត្តទុកដាក់លុបបំបាត់អោយអស់ពីភូមិសាស្ត្រខេត្តត្បូងឃ្មុំ ឱ្យក្លាយទៅជាភូមិ(ស) គ្មានគ្រឿងញៀន

២.ពាក់ព័ន្ធល្បែងស៊ីសងខុសច្បាប់គ្រប់ប្រភេទនៅក្នុងមូលដ្ឋាន ត្រូវលុបបាត់អោយអស់ទាំងស្រុង បើមានការបើកល្បែងនៅទីកន្លែងណាអាជ្ញាធរដែនដី ត្រូវទទួលខុសត្រូវ

៣.បញ្ហាល្បែងជល់មាន់ បើមានភូមិ ឃុំ ស្រុក ក្រុង ណាមាន ការបើកល្បែងជល់មាន់ត្រូវទទួលខុសត្រូវដោយគ្មានការលើកលែង

៤. រឹងបន្តឹងច្បាប់ចរាចរណ៍ផ្លូវគោក

ត្រូវតែយកចិត្តទុកដាក់ខ្ពស់ ក្នុងការអនុវត្តន៍នៅតាមគោលដៅរៀងៗខ្លួន ទៅលើរថយន្តបើកបរល្មើសច្បាប់ ដើម្បីកាត់បន្ថយគ្រោះថ្នាក់ចរាចរណ៍

៥. ត្រូវមានវិធានការអោយបានម៉ឺងម៉ាត់ទៅលើក្មេងទំនើង ដែលបង្កភាពអសន្តិសុខក្នុងមូលដ្ឋាន។ មានប្រសាសន៍សំណេះសំណាល ក្នុងពិធីប្រកាសចូលកាន់តំណែងនោះ លោកឧត្តមសេនីយ៍ឯក តាន់ សំណាង អគ្គស្នងការរង  ក៏បានឯកភាពទៅលើរបាយការណ៍ របស់លោកស្នងការចាស់បានលើកឡើង អំពីលទ្ធផល និងសមទ្ធិផលដែលបានអនុវត្តកន្លងមក ព្រមទាំងមានការជឿជាក់លើការដឹកនាំរបស់ស្នងការនគរបាលខេត្តត្បូងឃ្មុំ ដែលមានកិច្ចរួមសាមគ្គី សហការគ្នាបានល្អ លើកការងារសន្តិសុខ សណ្តាប់ធ្នាប់សាធារណៈ និងសុវត្ថិភាពជូនដល់ប្រជាពលរដ្ឋ។

លោកឧត្តមសេនីយ៍ឯក តាន់ សំណាង អគ្គស្នងការរង ក៏បានផ្តល់នូវអនុសាសន៍សំខាន់ៗ សម្រាប់លោកស្នងការនគរបាលថ្មី ធ្វើការដឹកនាំកងកម្លាំង ដោយបានលើក នូវគោលដៅសំខាន់ៗចំពោះមុខផងដែរ។ 

លោកក៏បានធ្វើការផ្តល់នូវដំបូន្មានល្អៗ សម្រាប់កងកម្លាំងទាំងអស់ សម្រាប់យកទៅអនុវត្តនៅក្នុងមូលដ្ឋាន ព្រមទាំងសូមឲ្យមន្ត្រីកងកម្លាំងនគរបាលទាំងអស់ ត្រូវធ្វើការកែប្រែនូវឥរិយាបថរបស់ខ្លួន គោរពនូវក្រមសីលធម៌ជាមន្ត្រីនគរបាលជាតិ ក្នុងការបម្រើសេវាសាធារណៈជូនបង ប្អូនប្រជាពលរដ្ឋ និងត្រូវអនុវត្តឲ្យខាងតែបាននូវខ្លឹមសារ៩ចំណុច នៃគោលនយោបាយភូមិឃុំមានសុវត្ថិភាព។

ម៉្យាងទៀត លោកស្នងការថ្មី ត្រូវអនុវត្តឲ្យបាន ពីតួនាទីភារកិច្ចរបស់ខ្លួន ដែលជាសេនា​ធិការ​ឲ្យគណៈបញ្ជាការ ឯកភាពរដ្ឋបាលខេត្ត ក្នុងការកាត់បន្ថយ​នូវភាពឈឺចាប់របស់ប្រជាពលរដ្ឋ។

កត្តាសំខាន់ចំពោះមុខ លើការងារអនុវត្តច្បាប់ចរាចរណ៍ផ្លូវគោក និងពង្រឹងវិន័យ និងលើកកម្ពស់សមត្ថភាព​ដល់កង​កម្លាំង​របស់ខ្លួន ដើមី្បអនុវត្តការងារឲ្យកាន់តែមានប្រសិទ្ធភាពខ្ពស់៕

អត្ថបទ៖ សាន វិឡែម