កីឡា

ថ្ងៃតែមួយ សិស្សលោកគ្រូ អេ ភូថង ៣រូប ត្រកូលឡៅ៣រូបជោគជ័យធំដូចគ្នា

បានផុស

១២ ខែ មុន

នៅ

ថ្ងៃអង្គារ ២ មេសា ២០២៤

ដោយ

កាលពីចុងសប្តាហ៍កន្លងទៅ កូនសិស្សលោកគ្រូ អេ ភូថង ៣រូបបានបានឈ្នះខ្សែក្រវាត់ដូចគ្នា ហើយអ្នកប្រដាល់ត្រកូល ឡៅ ក៏ទទួលបានជ័យជម្នះ៣នាក់ដូចគ្នាដែរ។

អ្នកលេងគុនខ្មែរត្រកូល ឡៅ

ឡៅ សៃណេត៖ កីឡាករវ័យក្មេងទម្ងន់ស្រាលបានឡើងទៅកាន់វគ្គផ្តាច់ព្រ័ត្រដណ្តើមខ្សែក្រវាត់ទម្ងន់៥១គីឡូក្រាម បន្ទាប់ពីទទួលបានជ័យជម្នះលើកីឡាករ ឡុង ពិសិដ្ឋ នៅវគ្គពាក់កណ្តាលផ្តាច់ព្រ័ត្រ កាលពីយប់ថ្ងៃទី៣១ ខែមីនា ឆ្នាំ២០២៤។ កន្លងមក សៃណេត កម្រឈ្នះ ពិសិដ្ឋ ណាស់ ប៉ុន្តែនៅវគ្គសំខាន់ រូបគេទទួលបានជ័យជម្នះដើម្បីឡើងទៅកាន់វគ្គផ្តាច់ព្រ័ត្រជួប។
ឡៅ ចន្ទ្រា៖ ស្ថិតក្នុងការប្រកួតទម្ងន់៧៣គីឡូក្រាម ប្អូនប្រុសរបស់លោក ឡៅ ស៊ីណាត បានប្រើពេល៣ទឹកដើម្បីផ្តួលកីឡាករថៃ Sammy ឲ្យសន្លប់ដើម្បីសងសឹកបានសម្រេច។ រូបគេធ្លាប់ចាញ់ទឹកទី២កាលពីឆ្នាំ២០២៣ ប៉ុន្តែជម្រះបញ្ជីដាច់ស្រឡះហើយតាមរយៈរន្ទះជើងទាត់ធ្ងន់ៗ និងកែងដ៏គ្រោះថ្នាក់។ សម្រាប់ជ័យជម្នះក្នុងរាត្រីថ្ងៃទី៣១ ខែមីនា ឆ្នាំ២០២៤ ឡៅ ចន្ទ្រា ទទួលបានប្រាក់ឧបត្ថម្ភលើកទឹកចិត្ត១០លានរៀលបន្ថែមលើតម្លៃខ្លួន។
ឡៅ ចិត្រា៖ ប្អូនប្រុសបង្កើតរបស់ ឡៅ ចន្ទ្រា បានក្លាយជាម្ចាស់ខ្សែក្រវាត់គុនខ្មែរអមដោយប្រាក់រង្វាន់៤០លានរៀល (១ម៉ឺនដុល្លារ) បន្ទាប់ពីបានយកឈ្នះលើមិត្តរួមជាតិ លន បញ្ញា ដោយពិន្ទុ យប់ថ្ងៃទី៣១ ខែមីនា ឆ្នាំ២០២៤។ នេះជាជោគជ័យធំមួយទៀតដែល ឡៅ ចិត្រា ធ្លាប់ឈ្នះជាច្រើនមកហើយ ក្នុងនោះប្រាក់រង្វាន់១ម៉ឺនដុល្លារនេះគឺជាលើកទី២ ដែលរូបគេទទួលបាន បន្ទាប់ពីលើកទី១កាលពីឆ្នាំ២០១៩ ក៏ជាការប្រកួតដណ្តើមខ្សែក្រវាត់មាសជាមួយ លន បញ្ញា ដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កូនសិស្សរបស់លោកគ្រូ អេ ភូថង

ម៉ឺន មេឃា៖ កូនច្បងរបស់លោក អេ ភូថង ដែលមានឪពុកបង្កើតជាគ្រូបង្វឹកតែម្តងបានឈ្នះខ្សែក្រវាត់គុនខ្មែរដែលមានប្រាក់រង្វាន់១២លានរៀល បន្ទាប់ពីផ្តួលមិត្តរួមជាតិ ឡុង ប៉េងលឿន ឲ្យសន្លប់ក្នុងទឹកទី២ នៅសង្វៀន PNN កាលពីរសៀលថ្ងៃអាទិត្យ ទី៣១ ខែមីនា ឆ្នាំ២០២៤។
អេ អាំម៉ារីនភូថង៖ យប់ថ្ងៃទី៣១ ខែមីនា ឆ្នាំ២០២៤ ប្អូនប្រុសរបស់ ម៉ឺន មេឃា ដែលត្រូវជាកូនបង្កើតរបស់គ្រូ អេ ភូថង គឺកីឡាករ អេ អាំម៉ារីនភូថង បានឈ្នះខ្សែក្រវាត់គុនខ្មែរអន្តរជាតិ IPCC បន្ទាប់ពីការប្រកួតត្រូវបានបន្ថែមទឹកទី៤រហូតទទួលបានជ័យជម្នះលើកីឡាកររុស្ស៊ី សាវីលីត ដូរ៉ូហ្គាស្ទីវ។
ធឿន ធារ៉ា៖ ក្នុងរាត្រីជាមួយ អេ អាំម៉ារីន ជើងខ្លាំងទម្ងន់៧២គីឡូក្រាម ធឿន ធារ៉ា បានយកឈ្នះពិន្ទុជើងខ្លាំងបេឡារុស្ស នីគីតា ដើម្បីការពារខ្សែក្រវាត់របស់ខ្លួនបានសម្រេច។ ការប្រកួតនេះ ធារ៉ា ទទួលបានប្រាក់ឧបត្ថម្ភមិនក្រោម១០លានរៀលទេ៕