ក្រសួងអប់រំ ពិភាក្សាធ្វើបច្ចុប្បន្នភាព សៀវភៅសេដ្ឋកិច្ច រួមបញ្ចូលគោលនយោបាយថ្មី

បណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានដឹកនាំកិច្ចប្រជុំ ស្តីពី ការធ្វើបច្ចុប្បន្នភាពសៀវភៅសេដ្ឋកិច្ច ដោយមានការចូលរួមពីសំណាក់ មន្ត្រីពាក់ព័ន្ធក្រោមឱវាទក្រសួង អប់រំ យុវជន និងកីឡា។ នេះបើតាមការផ្ដល់ព័ត៌មាន ពីក្រសួងអប់រំ យុវជន និងកីឡា នៅថ្ងៃទី២ ខែឧសភា ឆ្នាំ២០២៤។

គោលបំណងនៃកិច្ចប្រជុំនេះ គឺដើម្បីពិភាក្សាអំពីវឌ្ឍនភាព នៃការចងក្រងរៀបចំសៀវភៅសេដ្ឋកិច្ច និងធ្វើបច្ចុប្បន្នភាពសៀវភៅដែលមានស្រាប់ ដោយផ្ដោតលើបរិបទសេដ្ឋកិច្ចកម្ពុជាបច្ចុប្បន្ន និងគោលនយោបាយថ្មីៗរបស់រាជរដ្ឋាភិបាល។

ដើម្បីជំរុញដល់ដំណើរការនៃបច្ចុប្បន្នកម្មសៀវភៅសេដ្ឋកិច្ច បណ្ឌិតសភាចារ្យ ឧបនាយករដ្ឋមន្ត្រី បានធ្វើការណែនាំឱ្យក្រុមការងារសិក្សាឱ្យស៊ីជម្រៅ និងល្អិតល្អន់បំផុតពាក់ព័ន្ធនឹង តថភាពសង្គមកម្ពុជាបច្ចុប្បន្ន ដោយផ្តោតលើវិស័យនីមួយៗ ឧស្សាហកម្មថ្មីៗ គោលនយោបាយថ្មីៗរបស់រាជរដ្ឋាភិបាល និងការវិវឌ្ឍរបស់កម្ពុជាក្នុងរយៈ ២០ ឆ្នាំចុងក្រោយ បន្ទាប់ពីទទួលបានសុខសន្តិភាព ការផ្លាស់ប្តូរជាវិជ្ជមានរបស់កម្ពុជា ក៏ដូចជាវឌ្ឍនភាព នៃសេដ្ឋកិច្ច និងឧស្សាហកម្មឌីជីថលនៅកម្ពុជា៕