ផុតក្តៅ! ថៃ ព្រមានគ្រោះទឹកជំនន់នៅ ២៦ខេត្ត ខណៈបាងកក ត្រៀមម៉ាស៊ីនបូមទឹក

ក្រោយរលកកម្តៅបានធូរស្រាល ពេលនេះប្រទេសថៃ ស្រាប់តែចេញការព្រមានអំពីគ្រោះទឹកជំនន់ពេញមួយសប្តាហ៍វិញម្តង ព្រោះថា ចាប់ពីថ្ងៃសៅរ៍នេះទៅដល់ថ្ងៃទី២៥ខែឧសភា មេឃនឹងបង្អុរទឹកភ្លៀងមកយ៉ាងធ្ងន់ធ្ងរតែម្តង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាសែត Bangkok Post កាលពីថ្ងៃសុក្រទី១៧ខែឧសភា បានចុះផ្សាយដោយដកស្រង់សម្តីអ្នកនាំពាក្យរងរាជរដ្ឋាភិបាលថៃលោក Karom Phonphonklang ដែលនិយាយថា ជំនន់ទឹកភ្លៀងនឹងវាយប្រហារខេត្តចំនួន២៦ ដោយក្នុងនោះមាន១១ខេត្តនៅភាគខាងជើង ១១ខេត្តនៅប៉ែកខាងត្បូងនិង ៤ខេត្តនៅតំបន់កណ្តាល។

សូម្បីតែរាជធានីបាងកក ក៏កំពុងព្រួយបារម្ភផងដែរ ខណៈបច្ចុប្បន្ន រដ្ឋបាលក្រុង កំពុងញាប់ដៃញាប់ជើងសម្អាតប្រព័ន្ធលូ និងរៀបចំម៉ាស៊ីនបូមទឹកទូទាំងក្រុង។

ស្របពេលជាមួយគ្នានោះ នាយកដ្ឋានកាត់បន្ថយនិងបង្ការគ្រោះមហន្តរាយ បានត្រៀមក្រុមការងារឆ្លើយតបបន្ទាន់រួចរាល់អស់ហើយ នៅតាមតំបន់ងាយគ្រោះដោយទឹកជំនន់ ដើម្បីជួយសង្គ្រោះក្នុងករណីមានហេតុការណ៍អាក្រក់ណាមួយកើតឡើង។

សូមបញ្ជាក់ តាមការព្យាកររបស់នាយកដ្ឋានឧតុនិយម, ថៃនឹងមានភ្លៀងធ្លាក់ព្រមទាំងផ្គររន្ទះ ទូទាំងប្រទេសចាប់ពីថ្ងៃសៅរ៍ ដល់សប្តាហ៍ក្រោយ។ នេះគឺដោយសារតែប្រព័ន្ធ​សម្ពាធ​ទាប​ កំពុង​កើត​មាន​នៅ​សមុទ្រ​ Andaman ដែល​អាចបង្ក​ភ្លៀង​ធ្លាក់​ខ្លាំង​លើ​ផ្ទៃ​ប្រទេស ពិសេស​បណ្តា​ខេត្ត​នៅ​តាម​បណ្តោយ​ឆ្នេរ Andaman តែម្តង។

ទន្ទឹមនោះ ថៃបានព្រមានប្រជាពលរដ្ឋរស់នៅតាមខេត្តដែលងាយរងគ្រោះដោយទឹកជំនន់ ត្រូវតាមដានការព្យាករអាកាសធាតុនិងការព្រមានឲ្យជាប់ ហើយត្រូវត្រៀមខ្លួនជានិច្ចនិងអនុវត្តតាមការណែនាំរបស់អាជ្ញាធរ ដើម្បីសុវត្ថិភាព៕

អត្ថបទ៖ សុខ សុវណ្ណ

ចុចអាន៖ ថៃ ចង់​រុះរើ​​រាជធានី​ចេញ​​ពី​បាងកក ទៅ​ទីតាំង​ថ្មី