អភិបាលខណ្ឌបឹងកេងកង ដាក់ផែនការបង្ក្រាបក្រុមក្មេងទំនើងបង្ហោះម៉ូតូបង្កភាពអនាធិបតេយ្យ

កម្លាំងគណៈបញ្ជាការឯកភាពខណ្ឌបឹងកេងកង បានប្រជុំដាក់ផែនការបញ្ជាដល់កងកម្លាំងប្រដាប់អាវុធទាំង២ប្រភេទ ពិសេសគណៈបញ្ជាការឯកភាពសង្កាត់ទាំង០៧ ក្នុងមូលដ្ឋានធ្វើយ៉ាងណាត្រូវបង្ក្រាប និងទប់ស្កាត់ឱ្យមានប្រសិទ្ធិភាព លើបញ្ហាក្រុមក្មេងទំនើងដែលបង្ហោះម៉ូតូបង្កភាពអនាធិបតេយ្យនៅក្នុងមូលដ្ឋាន។

ការដាក់ផែនការបង្ក្រាបបញ្ហាក្រុមក្មេងទំនើងនេះ បានធ្វើឡើងកាលពីរសៀលថ្ងៃទី៣០ ខែកក្កដា ឆ្នាំ២០២៤នេះ ក្នុងកិច្ចប្រជុំគណៈបញ្ជាការឯកភាពរដ្ឋបាលខណ្ឌ បន្ទាប់ពីមានការណែនាំពីប្រមុខរាជរដ្ឋាភិបាល។

លោក សុខ សម្បត្តិ អភិបាលខណ្ឌបឹងកេងកង បានបានឱ្យដឹងថា ក្នុងមួយរយៈក្រោយមកនេះ បញ្ហាក្រុមក្មេងទំនើងកាប់ចាក់ប្រហារគ្នានៅតាមទីសាធារណៈបានថបថយចុះខ្លាំងបំផុត បន្ទាប់ពីអាជ្ញាធរមានសមត្ថកិច្ចបានយកចិត្តទុកដាក់បង្ក្រាប។ ប៉ុន្តែវាបែរជាលិចចេញនូវសកម្មភាពក្មេងទំនើងផ្សេងទៀត ដោយការបង្ហោះម៉ូតូដងផ្លូវ និងតាមទីសាធារណៈដែលនេះជាកត្តានាំឱ្យបាត់បង់សណ្តាប់ធ្នាប់ និងរបៀបរៀបរយបំផុតក្នុងសង្គមជាតិ ។

លោកអភិបាលខណ្ឌបន្ថែមថា ទោះបីសកម្មភាពនេះមិនមែនជារឿងថ្មីក៏ដោយ កម្លាំងមានសមត្ថកិច្ចត្រូវចាប់ឃាត់ភ្លាមៗ រាល់ក្រុមទំនើងទាំងឡាយ មិនថាក្មេង ឬចាស់ ឱ្យតែមានសកម្មភាពបង្ហោះម៉ូតូ ត្រូវឃាត់មកសាកសួរនាំ និងធ្វើកំណត់ហេតុ ឬសវតាជាតិអប់រំណែនាំ ហើយត្រូវឃាត់ម៉ូតូរក្សាទុករយៈពេល០៣ខែ ក្នុងករណីដែលជនរូបនោះទើបតែប្រព្រឹត្តសកម្មភាពលើកដំបូង។ ប៉ុន្តែបើនៅគគ្លើនហ៊ានប្រព្រឹត្តជាលើកទី០២ គឺត្រូវឃាត់ម៉ូតូរក្សាទុក០៦ខែ។

ផ្អែកក្នុងស្មារតីអង្គប្រជុំដដែលនោះ លោកអភិបាលខណ្ឌសង្កត់ធ្ងន់ថា ក្នុងរាជរដ្ឋាភិបាលអាណត្តិទី០៧ ដែលមានសម្តេចមហាបវរធិបតី ហ៊ុន ម៉ាណែត ជាប្រមុខថ្នាក់ដឹកនាំដ៏ឆ្នើម សម្តេចបានយកចិត្តទុកដាក់ខ្ពស់ណាស់ លើការការពារសន្តិសុខជាតិមាតុភូមិ ដូច្នោះហើយលោកអភិបាល ស្នើឱ្យអាជ្ញាធរក្រោមឱវាទ និងកងកម្លាំងប្រដាប់អាវុធក្នុងមូលដ្ឋានទាំងមូល ត្រូវបន្តពង្រឹងលើកិច្ចការងារសន្តិសុខទាំងអស់ មានទាំងការអប់រំ ការត្រួតពិនិត្យ ការបង្ការទប់ស្កាត់ និងបង្ក្រាបរាល់បទល្មើសដែលកើតមានដើម្បីធានាភាពសុខសាន្តជូនប្រជាពលរដ្ឋ ក៏ដូចជាប្រទេសជាតិទាំងមូល៕

អត្ថបទ៖ សុភា