ដំរី​ជាង​១០០​ក្បាល ត្រូវ​ជម្លៀស​ចេញ​ពី​ដែនជម្រក ព្រោះ​ទឹក​ជំនន់​នៅ​ថៃ

សត្វដំរីជាង ១០០​ក្បាលនៅភាគខាងជើងប្រទេសថៃ កាល​ពី​ថ្ងៃ​​ទី​៤​ខែ​តុលា​ត្រូវបាន​ជម្លៀស​ទៅកាន់ទីទួលខ្ពស់ ដើម្បីគេចពីទឹកជំនន់ដែលកើនឡើងយ៉ាងឆាប់រហ័ស ប៉ុន្តែសត្វជាច្រើនផ្សេងទៀតនៅតែជាប់គាំង​មិន​ទាន់​អាច​ជម្លៀ​ស​​ខ្លួន​បាន​ឡើយ។

លោកស្រី Saengduean Chailert នាយកឧទ្យានធម្មជាតិ Elephant Nature Park ក្នុងខេត្ត Chiang Mai បានបង្ហោះវីដេអូនៃសត្វដំរីដែលភ័យស្លន់ស្លោហក់ចូលទឹកភក់ ហើយបានស្នើឲ្យរដ្ឋាភិបាលបញ្ជូន «ជំនួយជាបន្ទាន់»។ លោកស្រី​បានសរសេរនៅលើបណ្តាញសង្គមថា៖ «ទឹកកំពុងជន់លិចកាន់តែអាក្រក់ទៅៗ។ តំបន់ទាំងមូលត្រូវបានជន់លិច ភូមិទាំងមូលត្រូវបានជន់លិច… ឥឡូវនេះ យើងគ្មានកន្លែងទៅណាទេ»។

ឧទ្យាន​នេះ​ស្ថិត​នៅ​ក្រោម​ការ​​គ្រប់គ្រង​​នៃ​​មូលនិធិ Save the Elephant ដែល​ជា​អង្គការ​ក្រៅ​រដ្ឋាភិបាល​អភិរក្ស​ដំរី​ធំ​បំផុត​មួយ​របស់​ប្រទេស​ថៃ។

មន្ត្រីម្នាក់នៃមូលនិធិ បានប្រាប់​ថា ក្រៅពីដំរីចំនួន​១២៦​ក្បាល សត្វប្រហែល​៥​ពាន់​ក្បាលផ្សេង​ទៀត រួម​​មាន ឆ្កែ ឆ្មា គោ ជ្រូក និងទន្សាយ បានជាប់គាំងនៅក្នុងទឹកជំនន់។

យោងតាមការិយាល័យស្រុក ទឹកជំនន់ដ៏ធំបានវាយប្រហារផ្នែកខ្លះនៃភាគខាងជើងប្រទេសថៃ ខណៈដែលភ្លៀងធ្លាក់ខ្លាំងនាពេលថ្មីៗនេះបានធ្វើឲ្យទន្លេ Ping ឈានដល់កម្រិត «ធ្ងន់ធ្ងរ» កាលពីថ្ងៃព្រហស្បតិ៍។

ខេត្ត​​មួយ​ចំនួន​នៅ​ភាគខាងជើងរបស់ប្រទេស បានរងគ្រោះដោយទឹកជំនន់ដ៏ធំ ចាប់តាំងពីព្យុះទីហ្វុង​យ៉ាកជី​បានវាយប្រហារតំបន់​ទាំង​នោះ​កាលពីដើមខែកញ្ញា ដោយ​ក្នុង​នោះ​​តំបន់​មួយបានរាយការណ៍អំពីទឹកជំនន់ដ៏អាក្រក់បំផុត​​មិន​ធ្លាប់​មាន​ក្នុងរយៈពេល​៨០​ឆ្នាំ។

បើយោងតាមវិទ្យាស្ថានបរិស្ថានថៃ ដំរីប្រមាណ ៣៨០០ក្បាល​កំពុង​ត្រូវ​បាន​ថែរក្សា​នៅ​ក្នុង​ឧទ្យាន​​ ហើយមានជាង ៤០០០ក្បាល​ផ្សេង​ទៀត​ ដែលរស់នៅក្នុងព្រៃ។ ដំរីអាស៊ីត្រូវបានចាត់ថ្នាក់ថាជាសត្វជិតផុតពូជដោយអង្គការ IUCN៕

ដោយ៖ ឈាង