ព័ត៌មានអន្ដរជាតិ
មនុស្សជិត១៣ម៉ឺនគ្រួសាររងគ្រោះដោយទឹកជំនន់នៅថៃ ខណៈអ្នកស្លាប់កើនដល់៣៥នាក់
ទឹកជំនន់ធ្ងន់ធ្ងរនៅក្នុងខេត្តចំនួនប្រាំភាគខាងត្បូងកំពុងធ្វើឱ្យមានការបំផ្លិចបំផ្លាញនៅក្នុងស្រុកចំនួន៤៧ និងប៉ះពាល់ដល់ជាង១២៨០០០គ្រួសារ ខណៈអ្នកស្លាប់ដោយសារទឹកជំនន់កើនឡើងដល់៣៥នាក់។ នេះបើយោងតាមការចេញផ្សាយរបស់សារព័ត៌មាន Bangkok Post នៅថ្ងៃទី១៧ខែធ្នូនេះ។
កាលពីម្សិលមិញ ទឹកជំនន់ដ៏ធ្ងន់ធ្ងរបំផុតត្រូវបានរាយការណ៍នៅក្នុងស្រុក Nakhon Si Thammarat និង Koh Samui នៃខេត្ត Surat Thani ដែលស្ថិតក្នុងចំណោមខេត្តចំនួនប្រាំ ដែលស្ថិតនៅចំណុចកណ្តាលនៃវិបត្តិទឹកជំនន់ភាគខាងត្បូង។ ចំណែកខេត្តចំនួន៣ទៀត គឺខេត្ត Chumphon, Ranong និង Phatthalung ។ កន្លែងផ្សេងទៀតនៅភាគខាងត្បូង ទឹកជំនន់បានប៉ះពាល់ដល់ខេត្ត Trang, Satun, Songkhla, Pattani, Yala, និង Narathiwat ទោះបីជាមានកម្រិតតិចជាងក៏ដោយ។ សរុបខេត្តចំនួន ១១ ភាគខាងត្បូងកំពុងជួបប្រទះទឹកជំនន់ដ៏អាក្រក់នេះ។
នៅក្នុងការអាប់ដេតរបស់ខ្លួន នាយកដ្ឋានបង្ការ និងកាត់បន្ថយគ្រោះមហន្តរាយ (DDPM) បាននិយាយថា ខេត្តចំនួនប្រាំដែលរងផលប៉ះពាល់ខ្លាំងជាងគេ ឃើញថាទឹកជំនន់បានរីករាលដាលដល់ស្រុកចំនួន ៤៧ ស្រុក ២៧៤ ឃុំ និង១៩៩៨ ភូមិ ដែលប៉ះពាល់ដល់ចំនួន ១២៨០៣៥ គ្រួសារ។ ទឹកជំនន់បានបណ្តាលឲ្យមនុស្ស ៨ នាក់ស្លាប់នៅទូទាំងខេត្តទាំង ៥ នេះ។ សរុបមក ទឹកជំនន់ភាគខាងត្បូងបានបំផ្លាញស្រុកចំនួន ៧០២ ភូមិចំនួន ៥០៥០ ប៉ះពាល់ដល់គ្រួសារចំនួន ៧៣៧០៩១ និងបានសម្លាប់មនុស្សចំនួន ៣៥នាក់នៅក្នុងខេត្តចំនួន ១១ ។
ពាក់ព័ន្ធបញ្ហានេះឧបនាយករដ្ឋមន្ត្រី និងជារដ្ឋមន្ត្រីក្រសួងការពារជាតិ លោក Phumtham Wechayachai បានសង្កត់ធ្ងន់លើការត្រៀមខ្លួនរបស់រដ្ឋាភិបាលក្នុងការដោះស្រាយវិបត្តិនេះ ដោយនិយាយថា មូលនិធិសង្គ្រោះបន្ទាន់ត្រូវបានបែងចែកទៅតំបន់លិចទឹក ហើយយោធាត្រូវបានដាក់ពង្រាយដើម្បីជួយដល់ប្រតិបត្តិការសង្គ្រោះ។
លើសពីនេះ អភិបាលមូលដ្ឋាន និងក្រុមឆ្លើយតបគ្រោះមហន្តរាយត្រូវបានដឹកនាំឱ្យផ្តល់អាទិភាពដល់កិច្ចខិតខំប្រឹងប្រែងជួយសង្គ្រោះជីវិត ចែកចាយការផ្គត់ផ្គង់សង្គ្រោះបន្ទាន់ និងពន្លឿនការជួសជុលហេដ្ឋារចនាសម្ព័ន្ធ។
ទន្ទឹមនឹងនេះ អនុរដ្ឋមន្ត្រីក្រសួងមហាផ្ទៃ លោកស្រី Sabeeda Thaiset បានបញ្ជាក់ថា លោកស្រីនឹងធ្វើទស្សនកិច្ចនៅខេត្ត Nakhon Si Thammarat និង Surat Thani នៅថ្ងៃនេះ ជាមួយឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ Anutin Charnvirakul ដើម្បីវាយតម្លៃការខូចខាតទាក់ទងនឹងទឹកជំនន់ និងផ្តល់ជំនួយចាំបាច់ដល់អាជ្ញាធរ និងប្រជាពលរដ្ឋ៕
អត្ថបទ៖ ប៊ុន សុភាព
-
ព័ត៌មានអន្ដរជាតិ១១ ម៉ោង agoអស់សង្ឃឹមហើយ ក្នុងការសង្គ្រោះជីវិត បុរស ២នាក់ទៀត ដែលជាប់ក្នុងរូងភ្នំ នៅឡាវ
-
សេដ្ឋកិច្ច២ ថ្ងៃ agoធនាគារ ARDB ចាក់បញ្ចូលទុនលើស្វាយចន្ទី និងដំឡូងមី
-
ព័ត៌មានជាតិ១ សប្តាហ៍ agoរដ្ឋបាលខណ្ឌកំបូល សហការជាមួយក្រុមហ៊ុនមីនេបៀ ប្រើប្រាស់កម្លាំងជាង ៨០០នាក់ សម្អាតអនាម័យនៅតាមដងផ្លូវ
-
ព័ត៌មានអន្ដរជាតិ៦ ថ្ងៃ agoអ៊ីរ៉ង់ បើកច្រកចូលរូងភ្នំ ផ្ទុកមីស៊ីលសម្ងាត់របស់ខ្លួនឡើងវិញ ទោះរងការវាយប្រហារយ៉ាងដំណំ
-
កីឡា៣ ថ្ងៃ agoមូលហេតុកីឡាករអាមេរិ Penrose ធ្វើមិនបានល្អជាមួយក្រុមស្នងការខេត្តស្វាយរៀង
-
ព័ត៌មានអន្ដរជាតិ១ សប្តាហ៍ agoរដ្ឋមន្ត្រីការពារជាតិជប៉ុន បដិសេធការចោទប្រកាន់របស់ចិន អំពីការវិលទៅរកយោធានិយម
-
សេចក្ដីជូនដំណឹង២ ថ្ងៃ agoក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា
-
សេដ្ឋកិច្ច៥ ថ្ងៃ agoតម្លៃប្រេងលក់រាយធ្លាក់ចុះក្រោម ៥០០០ រៀល មួយលីត្រ