អភិបាលខណ្ឌសែនសុខ ចាត់​ក្រុម​ការងារ​ចុះ​ណែនាំ​បញ្ឈប់​ការ​ដុត​ក្រណាត់​រោចក្រកាត់ដេរយីហោ« ហ៊ុយ ម៉ីង» បង្កផ្សែងប៉ះពាល់សុខភាពប្រជាពលរដ្ឋ

ភ្នំពេញ ៖ ប្រជាពលរដ្ឋរស់នៅភូមិ បន្លាស្អិត សង្កាត់ឃ្មួញ បានបង្ហោះលើបណ្តាញសង្គមហ្វេសប៊ុក ដោយមានសរសេរ អមជាមួយវិដេអូរៀបរាប់ អំពីបំពង់បង្ហុយផ្សែងកខ្វក់ ចេញពីរោងចក្រកាត់ដេរយីហោ​ «ហ៊ុយ​ ម៉ីង» ថា «ប្រជាជនដែលរស់នៅភូមិបន្លាស្អិត ខណ្ឌសែនសុខ ពិតជាពិបាករស់នៅ ពិបាកដងដង្ហើមណាស់ មិនដឹងទៅពឹងខាងណាបាន»។

ក្រោយទទួល​បានព័ត៍មាន ពីការបង្ហុយផ្សែងកខ្វក់ចេញ ពីរោងចក្រកាត់ដេរយីហោ​ ហ៊ុយ​ ម៉ីង បង្កផ្សែងរំខានដល់ការរស់នៅ​របស់ប្រជាពលរដ្ឋជិតខាង លោក​ ម៉ូវ​ ម៉ានិត​ អភិបាល នៃគណៈអភិបាលខណ្ឌ​សែនសុខ​ នៅល្ងាចថ្ងៃទី១៣ ខែ មករា ឆ្នាំ ២០២៤ បានចាត់តាំងក្រុមការងារដឹកនាំដោយអភិបាលរងខណ្ឌចំនួន២រូប ចុះពិនិត្យបន្ទាន់​ ដល់ទីតាំងអាជីវកម្មរោងចក្រកាត់ដេរយីហោ​ ហ៊ុយ​ ម៉ីង​ លេីបញ្ហាបង្ករផ្សែង​ប៉ះពាល់ដល់អ្នករស់នៅជិតខាង។

បន្ទាប់​ពី​ក្រុម​ការងារ​ចុះត្រួតពិនិត្យ បានរកឃើញថា រោងចក្រខាងលើនេះ បានកម្ទេចក្រណាត់ដែលនៅសេសសល់ទៅដុត​ជាមួយ​អុស​បង្ក​ជា​ផ្សែង​ប៉ះពាល់​ដល់អ្នកជិតខាងពិតមែន។ ក្រោយមកក្រុមការងារបានណែនាំដល់អ្នកគ្រប់គ្រងរោងចក្រ​ អនុវត្ត ដូចខាងក្រោម៖ ១.បញ្ឈប់ការដុតក្រណាត់ដែលប៉ះពាល់ដល់អ្នកជិតខាង។ ២.ក្នុងករណីរោងចក្រមិនអនុវត្តតាមខ្លឹមសារខាង​លេី​ រដ្ឋបាលខណ្ឌនឹងចាត់វិធានការតាមនីតិវិធីច្បាប់។

សូមបញ្ជាក់ផងថា រោងចក្រកាត់ដេរយីហោ​ «ហ៊ុយ​ ម៉ីង» ដែលមានទីតាំងស្ថិតនៅភូមិបន្លាស្អិត សង្កាត់ឃ្មួញ ខណ្ឌសែនសុខ​ បង្កផ្សែងប៉ះពាល់ដល់សុខភាព ពិបាកក្នុងការរស់នៅដល់ពលរដ្ឋជិតខាង មួយថ្ងៃៗពីព្រឹកទល់ល្ងាច រយៈពេលយូរមកហើយតែមិនដឹងទៅប្រាប់ខាងណា ទើបលោកបង្ហោះវិដេអូប្រមាណជាង២០វិនាទី លើហ្វេសប៊ុក បង្ហាញបញ្ហាបផ្សែង​រោងចក្របង្ក

ផលប៉ះពាល់ដល់អ្នករស់នៅជិតខាង កាលពីវេលាម៉ោងប្រហែលជាង១រសៀល ថ្ងៃទី១៣ មករា ២០២៥ លុះនៅល្ងាចថ្ងៃដដែល ក៏មានអជា្ញធរចុះមកពិនិត្យរោចក្រខាងលើ ។ នេះបើតាមការដោយដឹងពីគណនី ហ្វេសប៊ុក Ke sokveasna ប្រាប់បន្ថែមមកកាន់ក្រុមការងារ កម្ពុជាថ្មី ទាក់ទងសាកសួរតាមរយៈ Messenger ។

ប្រជាពលរដ្ឋដដែលបានបន្តថា ក្នុងនាមជាប្រជាពលរដ្ឋរស់នៅភូមិបន្លាស្អិត ពិតជាមានចិត្តសប្បាយរីករាយ សូមថ្លែងអំណគុណ ចំពោះអាជ្ញាធរខណ្ឌសែនសុខ ដែលយកចិត្តទុកដាក់ ធ្វើការបានលឿនរហ័ស ដោះស្រាយបញ្ហាទុក្ខលំបាកប្រជាពលរដ្ឋទាន់ពេលវេលា៕

ដោយ ៖ សំណាង