រថយន្ដព្រូសបុករះម៉ូតូពីរគ្រឿងចូលផ្ទះពលរដ្ឋរបួសធ្ងន់ពីរនាក់

ស្ត្រីរងគ្រោះពីរនាក់ម្ដាយ និងកូនត្រូវបានរថយន្ដម៉ាកព្រូសបុករះចូលផ្ទះប្រជាពលរដ្ឋបណ្ដាលឲ្យរងរបួសធ្ងន់ និងបានបញ្ជូនទៅសង្គ្រោះនៅមន្ទីរពេទ្យភ្លាមៗ។

ករណីគ្រោះថ្នាក់ចរាចរណ៍នេះបានកើតឡើងកាលពីវេលាម៉ោង៧និង២៥នាទីយប់ ថ្ងៃទី១៤ ខែមករា ឆ្នាំ២០២៥ តាមបណ្ដោយផ្លូវម៉ៅសេទុង សង្កាត់ទួលទំពូងទី២ ខណ្ឌចំការមន រាជធានីភ្នំពេញ។

បើតាមប្រភពព័ត៌មានពីប្រជាពលរដ្ឋ បានអោយដឹងថា មុនពេលកើតហេតុគេឃើញបុរសម្នាក់បេីករថយន្ត តូយូតា ព្រូស ពណ៌ ស ពាក់ស្លាកលេខ ភ្នំពេញ 2BY-0331 តាមបណ្ដោយផ្លូវ ម៉ៅសេទុង ទិសដៅបញ្រ្ចាសគ្នាជាមួយម៉ូតូជនរងគ្រោះ ខណៈមកដល់ចំណុចកើតហេតុ រថយន្តក៏ស្រាប់តែរេចង្កូតទៅបុករះម៉ូតូ២គ្រឿងបណ្ដាលស្រ្តីជាម្ដាយ និងកូនស្រីរងរបួសធ្ងន់ ត្រូវបានបញ្ជូនទៅកាន់មន្ទីពេទ្យសង្គ្រោះបន្ទាន់ភ្លាមៗ។

ក្រោយកេីតហេតុសមត្ថកិច្ចជំនាញចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ធ្វេីការវាស់វែងយករថយន្ត និងម៉ូតូទៅរក្សាទុកដេីម្បីរង់ចាំដោះស្រាយនៅពេលក្រោយ៕

អត្ថបទ៖ រដ្ឋា