កម្ពុជា-ហ្វីលីពីន បង្ហាញជំហរលើកិច្ចសហប្រតិបត្តិការក្នុងការផ្ទេរបច្ចេកវិទ្យា

កម្ពុជា-ហ្វីលីពីនបានបង្ហាញជំហរលើកិច្ចសហប្រតិបត្តិការក្នុងការផ្លាស់ប្ដូរបទពិសោធន៍ និងការផ្ទេរបច្ចេកវិទ្យានៃថ្នាលផ្ទៀងផ្ទាត់ឯកសាររបស់រាជរដ្ឋាភិបាល veryfy.gov របស់កម្ពុជា និងកម្មវិធី eGov SuperAp របស់ហ្វីលីពីនជាមួយបណ្ដាប្រទេសផ្សេងទៀត ដែលចាប់អារម្មណ៍មកលើថ្នាលនេះ។

លោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ និងលោក Ivan John. Uy រដ្ឋមន្ត្រីក្រសួងបច្ចេកវិទ្យាគមនាគមន៍ និងព័ត៌មានហ្វីលីពីន នៅថ្ងៃទី ២០ ខែមករា ឆ្នាំ ២០២៥ បានរៀបចំធ្វើសន្និសីទស្ដីពី «វឌ្ឍនភាពនៃកិច្ចសហប្រតិបត្តិការរវាងក្រសួងប្រៃសណីយ៍កម្ពុជា និងហ្វីលីពីន។

លោក ជា វ៉ាន់ដេត ថ្លែងថា អ្នកបច្ចេកទេសនៃប្រទេសទាំងពីរបានជួបគ្នាដើម្បីផ្លាស់ប្ដូរបទពិសោធន៍ និងធ្វើការផ្ទេរបច្ចេក​វិទ្យារវាងប្រទេសទាំងពីរនូវប្រព័ន្ធឌីជីថលចំនួន២ គឺថ្នាលផ្ទៀងផ្ទាត់ឯកសារ veryfy.gov របស់កម្ពុជា និងកម្មវិធី eGov SuperAp របស់ហ្វីលីពីន ដែលគ្រោងដាក់ឱ្យដំណើរការនៅក្នុងឆ្នាំ ២០២៥ នេះ។

លោករដ្ឋមន្ត្រី ជា វ៉ាន់ដេត លើកឡើងថា កិច្ចសហប្រតិបត្តិការរវាងកម្ពុជា-ហ្វីលីពីន ក្នុងការផ្ទេរបច្ចេកវិទ្យា និងបទពិសោ​ធន៍​គ្នាទៅវិញទៅមកគឺមានសារៈសំខាន់ណាស់ព្រោះកិច្ចសហប្រតិបត្តិការនេះនឹងធ្វើឱ្យល្បឿននៃការធ្វើបរិវត្តកម្មឌី​ជី​ថល​លឿនជាងមុន ហើយប្រទេសទាំងពីមានមូលដ្ឋានកាន់តែរឹងមាំក្នុងការសម្រេចចិត្តជ្រើរើសបច្ចេកវិទ្យា ដែលត្រឹមត្រូវដើម្បី​យកមកប្រើប្រាស់ក្នុងការអភិវឌ្ឍប្រព័ន្ធឌីជីថល៕