កម្ពុជាស្វាគមន៍ទេសចរអន្តរជាតិជាង ១,២​ លាននាក់ នាដើមឆ្នាំនេះ កើនឡើងខ្ពស់

គិតត្រឹមរយៈពេល ២ ខែដំបូង ចាប់ពីខែមករា ដល់ខែកុម្ភៈ ឆ្នាំ ២០២៥ មានភ្ញៀវទេសចរអន្តរជាតិប្រមាណជាង ១,២៦ លាននាក់ (១ ២៦៣ ៩៨៥) បានមកទស្សនាកម្ពុជា មានការកើនឡើងជិត ២៨% ធៀបនឹងរយៈពេលដូចគ្នា កាលពីឆ្នាំមុន។ នេះបើយោងតាមរបាយការណ៍​របស់ក្រសួង​ទេសចរណ៍​ចេញផ្សាយនៅថ្ងៃទី ៧ ខែមេសា ឆ្នាំ ២០២៥។

ក្នុងចំណោមភ្ញៀវទេសចរអន្តរជាតិជាង ១,២៦ លាននាក់ ភ្ញៀវទេសចរ​ថៃ​ឈរ​នៅ​លំដាប់​លេខរៀងទី ១ មានចំនួន ៣៥១ ៩៣៤ នាក់ កើនឡើង ៤២,២% វៀតណាម ២០២ ១២១ នាក់ កើន ៩% ចិន ១៨៤ ៣៧២ នាក់ កើនឡើង ៦៧,៦% អាមេរិក ៥១ ៥១២ នាក់ កើនឡើង ១៣,៥% និងកូរ៉េ ៥០ ៧៥៦ នាក់ ធ្លាក់ចុះ ៣,៣%។

លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជា បានលើកឡើងថា លំហូរភ្ញៀវ​ទេសចរបាន កើនឡើងចាប់​តាំង​ពីដើមឆ្នាំ​ ២០២៥ ដោសារសុខសន្តិភាព ស្ថិរ​ភាព​នយោបាយ ធ្វើឱ្យ​ភ្ញៀវ​ទេសចរ​មានទំនុកចិត្តក្នុងការធ្វើដំណើរចូលមក។

លោកស្រីបានបន្ថែមថា ការរៀបចំហេដ្ឋារចនាសម្ព័ន្ធមានផ្លូវថ្នល់ ផ្លូវល្បឿនលឿន​ទៅ​កាន់ទី​តាំង​តំបន់ទេសចរណ៍​ក៏ជាកត្តាទាក់ទាញភ្ញៀវទេសចរផងដែរ។

លោក ហួត ហាក់ រដ្ឋមន្ត្រីក្រសួងទេសចរណ៍បានលើកឡើងកាលពីពេលថ្មីៗនេះថា កម្ពុជារំពឹង​ទទួល​បាន​ភ្ញៀវទេស​ចរ​អន្តរ​ជាតិចំនួន ៧,៥ លាននាក់ នៅក្នុងឆ្នាំ ២០២៥ ​ជាមួយនឹងការ​ដាក់ឱ្យដំណើការនៃព្រលានយន្តហោះអន្តរជាតិតេជោ​នាខែកក្កដាខាងមុខនេះនឹងបង្កើនការតភ្ជាប់កម្ពុជាទៅកាន់ទិសដៅទេចរណ៍កាន់តែច្រើនទាំងក្នុងតំបន់ និងសកលលោក។

យោងតាមក្រសួងទេសចរណ៍ នៅក្នុងឆ្នាំ ២០២៤ កម្ពុជាទទួលបាន​ទេស​ចរណ៍​​​អន្តរជាតិជាង ៦,៧ លាននាក់ កើនឡើង ២៣% ធៀបនឹងឆ្នាំ ២០២៣ ក្នុងនោះ​ទទួល​បាន​ចំណូលសរុបជាង ៣,៦៣ ពាន់លានដុល្លារ កើនជាង ១៧%៕

អត្ថបទ៖ ឡេង ដេត