កីឡា

ខេត្តពោធិ៍សាត់ ប្រកាសរៀបចំការប្រកួតចំបាប់អបអរបុណ្យចូលឆ្នាំខ្មែរ

បានផុស

៣ ខែ មុន

នៅ

ថ្ងៃអង្គារ ៨ មេសា ២០២៥

ដោយ

មន្ទីរអប់រំ យុវជន និងកីឡា ខេត្តពោធិ៍សាត់ បានប្រកាសរៀបចំការប្រកួតជើងឯកចំបាប់ប្រចាំខេត្តនៅថ្ងៃទី១០ ខែមេសា ឆ្នាំ២០២៥ ដើម្បីអបអរពិធីបុណ្យចូលឆ្នាំប្រពៃណីខ្មែរ ខណៈគណៈកម្មការរៀបចំស្វាគមន៍ចំពោះការឧបត្ថម្ភគាំទ្រពីមហាជន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក នឹម កុសល

លោក នឹម កុសល អនុប្រធានការិយាល័យអប់រំកាយ និងកីឡា នៃមន្ទីរអប់រំ យុវជន និងកីឡា ខេត្តពោធិ៍សាត់ បានឲ្យដឹងថា ដើម្បីជាការអបអរពិធីបុណ្យចូលឆ្នាំប្រពៃណីខ្មែរផង និងជាការថែរក្សាចំបាប់បុរាណខ្មែរដែលជាកីឡាពេញនិយមនៅតាមជនបទផងនោះ គណៈកម្មការគ្រោងនឹងរៀបចំការប្រកួតរយៈពេលមួយថ្ងៃជូនប្រជាពលរដ្ឋបានទស្សនាកម្សាន្តសប្បាយ និងបានប្រកួតរម្លឹកសមត្ថភាពរបស់ខ្លួនផង។

ក្រុមចំបាប់មកពីពោធិ៍សាត់

អនុប្រធានការិយាល័យខាងលើនេះអំពាវនាវដល់សប្បុរសជននានាពិសេសអ្នកពោធិ៍សាត់ដែលចង់ចូលរួមឧបត្ថម្ភគាំទ្រជាថវិកា ឬសម្ភារៈក្នុងការរៀបចំការប្រកួតនេះអាចទំនាក់ទំនងមកកាន់លោកផ្ទាល់បានតាមរយៈលេខទូរស័ព្ទ ឬតេឡេក្រាម ០៩២ ៥៥ ៧៩ ២៨។ ការរៀបចំត្រូវការចំណាយច្រើន និងប្រើប្រាស់សម្ភារៈផ្សេងៗផងនោះ ដូច្នេះគណៈកម្មការរៀបចំមានផលលំបាកផងដែរក្នុងការដំណើរការនៃការប្រកួតនេះ។

ទិដ្ឋភាពប្រកួតកន្លងទៅ

ការប្រកួតជើងឯកចំបាប់ប្រចាំខេត្តពោធិ៍សាត់ នេះនឹងធ្វើឡើងនៅថ្ងៃទី១០ ខែមេសា ឆ្នាំ២០២៥ ទីតាំងក្នុងវត្តធម្មសិរីមង្គល ហៅ វត្តលៀប នៅភូមិលៀប ឃុំស្យា ស្រុកកណ្ដៀង ខេត្តពោធិ៍សាត់។ ទំនាក់ទំនងលោក នឹម កុសល អនុប្រធានការិយាល័យអប់រំកាយ និងកីឡា នៃមន្ទីរអប់រំយុវជន និងកីឡា ខេត្តពោធិ៍សាត់ ( ០៩២ ៥៥ ៧៩ ២៨)៕

អត្ថបទដោយ៖ នួន ស៊ីណ

Related Topics:កីឡាចំបាប់