ចក្រភព​អង់គ្លេស និង​អាល្លឺម៉ង់​នឹង​រួមគ្នា​បង្កើត​អាវុធ​​រយៈ​ចម្ងាយ ២ ០០០​គីឡូម៉ែត្រ

ចក្រភពអង់គ្លេស និងអាល្លឺម៉ង់ នៅ​ថ្ងៃ​ព្រហស្បតិ៍​ទី​១៥​ខែ​ឧសភា​ឆ្នាំ​២០២៥ បានប្រកាសពីគំនិតផ្តួចផ្តើមរួមគ្នា ដើម្បីបង្កើតអាវុធ​​ដ៏​ទំនើប​មួយ​ដែល​អាច​បាញ់​​ក្នុង​​រយៈ​ចម្ងាយលើសពី ២ ០០០​គីឡូម៉ែត្រ សម្រាប់​ការ​ពង្រឹងសមត្ថភាពការពារ និង​ទំនាក់ទំនងទ្វេភាគីរវាងប្រទេសដែលមានសេដ្ឋកិច្ចធំជាងគេទាំងពីររបស់អឺរ៉ុប។

គម្រោងនេះ បង្កើតឡើងនៅលើកតិកាសញ្ញាការពារជាតិទ្វេភាគីដែលបានចុះហត្ថលេខាកាលពីឆ្នាំមុន ដែលក្នុងនោះប្រទេសទាំងពីរបានប្តេជ្ញាចិត្តក្នុងការជំរុញបច្ចេកវិទ្យាយោធារួមគ្នា។ ការអភិវឌ្ឍ​អាវុធវាយប្រហាររយៈចម្ងាយឆ្ងាយនេះ គឺជាការឆ្លើយតបដោយផ្ទាល់ចំពោះទិដ្ឋភាពសន្តិសុខដែលកំពុងវិវឌ្ឍ​នៅអឺរ៉ុប ជាពិសេសចំពោះភាពតានតឹងដែលកំពុង​កើតចេញពីជម្លោះនៅអ៊ុយក្រែន។ គំនិតផ្តួចផ្តើមនេះ ក៏ស្របតាមកិច្ចខិតខំប្រឹងប្រែង​យ៉ាង​ទូលំទូលាយ​របស់អឺរ៉ុប​ ក្នុងការជំរុញឧស្សាហកម្មការពារ​ក្នុង​ស្រុក និងកាត់បន្ថយការពឹងផ្អែកលើដៃគូខាងក្រៅ។

លោក John Healey រដ្ឋមន្ត្រី​ការពារ​ជាតិ​អង់គ្លេស បាន​លើក​ឡើង​ថា៖ «នៅក្នុងពិភពលោកដ៏គ្រោះថ្នាក់ អង្គការណាតូ និងសម្ព័ន្ធមិត្តអ៊ឺរ៉ុបបានរួបរួមគ្នា។ ភាពជាដៃគូនេះកំពុងជួយយើងបង្កើតការការពារជាម៉ាស៊ីនសម្រាប់កំណើន បង្កើតការងារ បង្កើនជំនាញ និងជំរុញការវិនិយោគនៅទូទាំងចក្រភពអង់គ្លេស និងអាល្លឺម៉ង់»។

រដ្ឋមន្ត្រីការពារជាតិ​អង់គ្លេស និង​សមភាគី​អាល្លឺម៉ង់ នឹងកោះប្រជុំនៅទីក្រុងប៊ែរឡាំង​ ដើម្បីពិភាក្សាលម្អិតបន្ថែមអំពីគម្រោងនេះ រួមទាំងកិច្ចសហប្រតិបត្តិការដែលមានសក្តានុពលលើបច្ចេកវិទ្យាយោធាផ្សេងទៀត។ កិច្ចប្រជុំនេះក៏នឹងនិយាយអំពីយុទ្ធសាស្ត្រ​ផ្គត់ផ្គង់​រួមគ្នា និងការរួមបញ្ចូលប្រព័ន្ធអាវុធថ្មីទៅក្នុងក្របខ័ណ្ឌការពារជាតិដែលមានស្រាប់៕

ដោយ៖ ឈាង