ព័ត៌មានអន្ដរជាតិ

វៀតណាមទិញយន្តហោះ Airbus ២០ គ្រឿង ជាផ្នែកមួយនៃកិច្ចព្រមព្រៀង ១០ ប៊ីលានដុល្លារ ជាមួយបារាំង

បានផុស

១ year មុន

នៅ

ថ្ងៃអង្គារ ២៧ ឧសភា ២០២៥

ដោយ

វៀតណាម និងបារាំង កាលពីថ្ងៃចន្ទ បានចុះហត្ថលេខាលើកិច្ចព្រមព្រៀងក្នុងតម្លៃ ១០ ប៊ីលានដុល្លារ រួមទាំងការទិញយន្តហោះ Airbus ២០ គ្រឿងថ្មី កិច្ចសហប្រតិបត្តិការនុយក្លេអ៊ែរ និងផ្សេងៗទៀត ក្នុងអំឡុងទស្សនកិច្ចលើកដំបូងរបស់ប្រធានាធិបតីបារាំង លោក អេម៉ានុយអែល ម៉ាក្រុង ទៅរដ្ឋធានីហាណូយ នៃប្រទេសវៀតណាម។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉យទ័រ។

ប្រធានាធិបតីបារាំង លោក អេម៉ានុយអែល ម៉ាក្រុង និងប្រធានាធិបតីវៀតណាម លោក Luong Cuong ចាប់ដៃគ្នាក្នុងជំនួបនៅវិមានប្រធានាធិបតីក្នុងទីក្រុងហាណូយនាថ្ងៃទី ២៦ ឧសភា ឆ្នាំ ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមហ៊ុនអាកាសចរណ៍វៀតណាម VietJet បានប្រកាសកាលពីថ្ងៃចន្ទថា ខ្លួនបានបញ្ជាទិញយន្តហោះប្រភេទ A330neo ចំនួន ២០ គ្រឿងពីក្រុមហ៊ុនផលិតយន្តហោះ Airbus របស់បារាំង។ ក្រោមកិច្ចព្រមព្រៀងថ្មី ឥឡូវនេះក្រុមហ៊ុន VietJet បានបញ្ជាទិញយន្តហោះ A330neo សរុបចំនួន ៤០ គ្រឿង រួមទាំង ២០ គ្រឿង ពីក្នុងកិច្ចព្រមព្រៀងដែលធ្វើឡើងកាលពីឆ្នាំមុន។

VietJet មិនបានបង្ហាញពីតម្លៃ ឬពេលវេលាដឹកជញ្ជូនសម្រាប់យន្តហោះថ្មីនេះទេ ប៉ុន្តែបាននិយាយថា ការបញ្ជាទិញនេះគាំទ្រដល់ផែនការពង្រីកខ្លួនរយៈពេលវែងរបស់ក្រុមហ៊ុន។ ក្រុមហ៊ុនមានគោលបំណងពង្រីកបណ្តាញហោះហើររនៅទូទាំងអាស៊ីប៉ាស៊ីហ្វិក ហើយអាចដំណើរការផ្លូវឆ្ងាយទៅកាន់អឺរ៉ុបផងដែរ។

គេមើលឃើញថា កិច្ចព្រមព្រៀងថ្មីជាមួយក្រុមហ៊ុនបារាំងដដែល ធ្វើឡើងខណៈវៀតណាម និងអាមេរិកចូលរួមក្នុងកិច្ចចរចាពាណិជ្ជកម្ម ដើម្បីបញ្ចៀសការដំឡើងពន្ធបដិការ ៤៦ ភាគរយ លើទំនិញវៀតណាមទៅអាមេរិក។ កន្លងមក ក្រុមហ៊ុន VietJet បានបង្ហាញចំណាប់អារម្មណ៍ក្នុងការទិញយន្តហោះពីក្រុមហ៊ុនអាមេរិក Boeing ដែលមន្ត្រីវៀតណាមនិយាយថា អាចជួយកាត់បន្ថយអតិរេកពាណិជ្ជកម្មដ៏ធំរបស់វៀតណាមជាមួយសហរដ្ឋអាមេរិក។

គួរគូសបញ្ជាក់ជាថ្មីថា ក្រៅតែពីការទិញយន្តហោះ Airbus កិច្ចព្រមព្រៀងផ្សេងៗសរុបចំនួន ១៤ ក្នុងតម្លៃ ៩ ប៊ីលានអឺរ៉ូ (១០,២៥ ប៊ីលានដុល្លារ) រវាងវៀតណាម និងបារាំង គឺគ្របដណ្តប់លើកិច្ចសហប្រតិបត្តិការថាមពលនុយក្លេអ៊ែរ វិស័យការពារជាតិ ការដឹកជញ្ជូនផ្លូវដែក និងផ្លូវសមុទ្រ ផ្កាយរណបអង្កេតផែនដី Airbus និងវ៉ាក់សាំង Sanofi ជាដើម។ នេះបើផ្អែកលើឯកសារដែលរ៉យទ័របានឃើញ។

នេះគឺជាលើកទី១ ដែលលោក ម៉ាក្រុង ធ្វើទស្សនកិច្ចផ្លូវការទៅប្រទេសវៀតណាម និងជាប្រធានាធិបតីបារាំងទី ១ ដែលធ្វើដូច្នេះ ក្នុងរយៈពេលជិត ១ ទសវត្សរ៍។ អ្នកខ្លះលើកឡើងថា វាជាផ្នែកមួយនៃការបង្កើនឥទ្ធិពលរបស់បារាំងលើរដ្ឋក្រោមអាណានិគមរបស់ខ្លួនមួយនេះ ចំពេលមានហានិភ័យពន្ធរបស់សហរដ្ឋអាមេរិក។

មែនទែនទៅ លោក ម៉ាក្រុង គ្រោងធ្វើទស្សនកិច្ចទៅ ៣ ប្រទេសនៅអាស៊ីអាគ្នេយ៍ រួមមានវៀតណាម ឥណ្ឌូណេស៊ី និងសិង្ហបុរី៕

Related Topics:វៀតណាម បារាំង យន្តហោះ Airbus

ព័ត៌មានអន្ដរជាតិ២ ថ្ងៃ ago

អស់សង្ឃឹមហើយ ក្នុងការសង្គ្រោះជីវិត បុរស ២នាក់ទៀត ដែលជាប់ក្នុងរូងភ្នំ នៅឡាវ

សេចក្ដីជូនដំណឹង៣ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា