ចិន-EU ពិភាក្សាពីកិច្ចសហប្រតិបត្តិការសេដ្ឋកិច្ច និងពាណិជ្ជកម្ម

រដ្ឋមន្ត្រីក្រសួងពាណិជ្ជកម្មចិន លោក Wang Wentao បានជួបជាមួយស្នងការសហភាពអឺរ៉ុបទទួលបន្ទុកពាណិជ្ជកម្ម និងសន្តិសុខសេដ្ឋកិច្ច លោក Maros Sefcovic នៅក្រៅកិច្ចប្រជុំថ្នាក់រដ្ឋមន្ត្រីរបស់អង្គការពាណិជ្ជកម្មពិភព​លោក​ (WTO) នៅទីក្រុងប៉ារីស ប្រទេសបារាំង កាលពីថ្ងៃអង្គារ ចំពេលភាពតានតឹងជាមួយសហរដ្ឋអាមេរិក​កើនឡើង ក្រោមគោលនយោបាយពន្ធគយរបស់ប្រធានាធិបតី ដូណាល់ ត្រាំ។ នេះបើតាមការចុះផ្សាយរបស់កាសែតរដ្ឋចិន Global Times ។

សេចក្ដីថ្លែងការណ៍ក្រសួងពាណិជ្ជកម្មចិន ​បាន​និយាយថា ​មន្រ្តីជាន់ខ្ពស់ទាំង២ បាន​ធ្វើការពិភាក្សា​គ្នា​ដោយ​ «យកចិត្តទុកដាក់ ច្បាស់លាស់​ និងស៊ីជម្រៅ» លើប្រធានបទបន្ទាន់ និងសំខាន់ ជុំវិញកិច្ចសហប្រតិបត្តិការសេដ្ឋកិច្ច និងពាណិជ្ជកម្មចិន-សហភាពអឺរ៉ុប (EU) ហើយស្នើឱ្យ​មានការបង្កើនកិច្ចខិតខំប្រឹងប្រែង ដើម្បីរៀបចំសម្រាប់របៀបវារៈសំខាន់ៗរវាង​​ភាគីទាំង២ នៅឆ្នាំនេះ។

​នេះជាជំនួបលើកទី៣ហើយ ​មន្ត្រីជាន់ខ្ពស់ទាំង ២ គិតមកដល់ពេលនេះ ក្នុងឆ្នាំ២០២៥។ ចាប់តាំងពីលោក Sefcovic បានធ្វើទស្សនកិច្ចទៅកាន់ប្រទេសចិនកាលពីថ្ងៃទី២៨ ខែមីនា ​អ្នកទាំង២ បានរក្សាទំនាក់ទំនងយ៉ាងជិតស្និទ្ធ ធ្វើការពិភាក្សាយ៉ាងទូលំទូលាយ និងស៊ីជម្រៅលើបញ្ហាទាក់ទងនឹងកិច្ចសហប្រតិបត្តិការសេដ្ឋកិច្ច និងពាណិជ្ជកម្មចិន-សហភាពអឺរ៉ុប។

គួរគូសបញ្ជាក់ថា ការពិភាក្សារវាងចិន និង EU ដែលមាន​បញ្ហា​នាពេលកន្លងមក ជាពិសេស​លើការរថយន្តអគ្គិសនីចិន​នៅក្នុងប្លុក បាន​ធ្វើឡើង ចំពេលដែលមហាអំណាចធំៗទាំង២ ប្រឈមមុខពន្ធខ្ពស់ពីសហរដ្ឋអាមេរិក។

ទោះបីគាំទ្រការចរចាជាមួយរដ្ឋបាល ត្រាំ រៀងៗខ្លួនក្ដី ចិន និង EU ដែលប្ដេជ្ញាធ្វើពិពិធកម្មទីផ្សារពីសហរដ្ឋអាមេរិក បាន​ចាត់វិធានការសងសឹកផ្សេងៗ រួមទាំងការដាក់ពន្ធលើទំនិញអាមេរិក ជាពិសេសផលិតផលកសិកម្ម៕

​