អត្រាកំណើតទាបរបស់ជប៉ុនធ្វើឱ្យវិបត្តិចំនួនប្រជាជនកាន់ធ្ងន់ធ្ងរ

យោងតាមការចេញផ្សាយរបស់សារព័ត៌មាន​ CNN កាលថ្ងៃទី០៥ខែមិថុនា​ វិបត្តិ​អត្រា​​ប្រជាជនរបស់ប្រទេសជប៉ុនកាន់តែអាក្រក់ទៅៗ ដោយសារ​អត្រា​កំណើតប្រចាំឆ្នាំបានធ្លាក់ចុះដល់កម្រិតទាបបំផុតក្នុងឆ្នាំ ២០២៤។

ទិន្នន័យរបស់រដ្ឋាភិបាល បាន​បង្ហាញថា មានទារកចំនួន​តែ ៦៨៦,០៦១ នាក់ប៉ុណ្ណោះដែលបានកើតកាលពីឆ្នាំ២០២៤ ដែលធ្លាក់ចុះ ៥.៧% ពីឆ្នាំ ២០២៣និងជាតួលេខទាបបំផុតចាប់តាំងពីឆ្នាំ ១៨៩៩។ នេះ​ជា​ឆ្នាំ​ទី​១៦​ហើយ​ដែល​ចំនួន​ទារក​កើត​ក្នុង​ប្រទេស​ជប៉ុន​បាន​ធ្លាក់​ចុះជាប់ៗគ្នា។

អត្រាមានកូនរបស់ប្រទេសជប៉ុន ដែលជាចំនួនមធ្យមស្ត្រីមានកូនបានធ្លាក់ចុះមកត្រឹមតែ ១.១៥ ក្នុងឆ្នាំ ២០២៤ ទាបជាងចំនួន ២.១ ដែលត្រូវការដើម្បីរក្សាចំនួនប្រជាជនឱ្យមានស្ថេរភាព។ ទោះបីជាមានការកើនឡើងតិចតួចនៃអាពាហ៍ពិពាហ៍ក៏ដោយ និន្នាការរយៈពេលវែងបង្ហាញថាមនុស្សវ័យក្មេងកំពុងជៀសវាងអាពាហ៍ពិពាហ៍ និងការមានកូនកាន់តែខ្លាំងឡើង ដោយសារតែអសន្តិសុខសេដ្ឋកិច្ច តម្លៃរស់នៅកើនឡើង និងវប្បធម៌ការងារតឹងរ៉ឹង លំអៀងខាងយេនឌ័រ។ លើសពីនេះឧបសគ្គផ្លូវច្បាប់ ដូចជាការតម្រូវឱ្យគូស្វាមីភរិយារៀបការចែករំលែកនាមត្រកូល ដែលរារាំងការរៀបការបន្ថែមទៀត។

នាយករដ្ឋមន្ត្រីជប៉ុនលោក Shigeru Ishiba បានហៅការធ្លាក់ចុះនៃប្រជាជននេះថា «ភាពអាសន្នយ៉ាងស្ងៀមស្ងាត់» ដោយបានសន្យាកំណែទម្រង់ដើម្បីកែលម្អតុល្យភាពជីវិតការងារ ជាពិសេសនៅតំបន់ជនបទ។ ទោះជាយ៉ាងណាក៏ដោយ អ្នកជំនាញអះអាងថា គោលនយោបាយបច្ចុប្បន្នផ្តោតលើគូស្វាមីភរិយាដែលរៀបការរួចហើយចង្អៀតពេក ហើយមិនបានដោះស្រាយបញ្ហាសង្គម និងសេដ្ឋកិច្ចនៅពីក្រោយការស្ទាក់ស្ទើររបស់មនុស្សវ័យក្មេងក្នុងការចាប់ផ្តើមគ្រួសារនោះទេ។

ចំនួនប្រជាជនជប៉ុនត្រូវបានព្យាករណ៍ថានឹងធ្លាក់ចុះពី ១២៤ លាននាក់ទៅ ៨៧ លាននាក់នៅឆ្នាំ ២០២៧០ ហើយ​ប្រជាជន ៤០% រំពឹងថានឹងមានអាយុលើសពី ៦៥ ឆ្នាំ។ វិបត្តិនេះបង្កហានិភ័យយ៉ាងធ្ងន់ធ្ងរដល់សេដ្ឋកិច្ច ប្រព័ន្ធសង្គម និងសន្តិសុខជាតិរបស់ប្រទេសជប៉ុន៕

អត្ថបទ៖ ប៊ុន សុភាព