ថៃផ្ទុះជម្លោះផ្ទៃក្នុង ឈានដល់ការដាក់សម្ពាធឲ្យលោកស្រី ផែថងថាន លាលែងតំណែង

ប្រទេសថៃ កំពុងផ្ទុះជម្លោះផ្ទៃក្នុង ឈានដល់ការអំពាវនាវឲ្យលោកស្រី ផែថងថាន ស៊ីណាវ៉ាត្រ ចុះចេញពីតំណែង បន្ទាប់ពីសម្តេចតេជោនៃប្រទេសកម្ពុជា ទម្លាយសារសំឡេងរវាងសម្តេចជាមួយនាយករដ្ឋមន្ត្រីថៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រឿងនេះ បង្កឲ្យមានការរិះគន់ ផែថងថាន ដូចទឹកបាក់ទំនប់នៅក្នុងប្រទេសថៃ ដោយចោទថា លោកស្រីមិនសមកាន់តំណែងនាយករដ្ឋមន្ត្រីតទៅទៀតឡើយ ព្រោះលោកស្រីធ្វើឲ្យខូចឈ្មោះប្រទេស និងអធិបតេយ្យភាពថៃ, ប៉ះពាល់ដល់កិត្តិយសនិងសេចក្តីថ្លៃថ្នូររបស់កងទ័ពថៃ។

ជុំវិញរឿងនេះដែរ តាមការចុះផ្សាយរបស់ Khaosod នៅថ្ងៃព្រហស្បតិ៍ទី១៩ខែមិថុនាឆ្នាំ២០២៥ គណបក្សថៃសាងថៃ បានចេញចេញក្តីថ្លែងការណ៍មួយ ជំរុញឲ្យគណបក្សនៅក្នុងក្រុមចម្រុះ ត្រូវដាក់សម្ពាធឲ្យលោកស្រីផែថងថាន លាលែងពីតំណែងឲ្យបាន។

គណបក្ស ថៃសាងថៃ ជឿជាក់ថា លោកស្រី ផែថងថាន គួរតែទទួលខុសត្រូវតាមរយៈការលាលែងពីតំណែងជានាយករដ្ឋមន្ត្រី ដើម្បីបង្ហាញពីស្មារតីជាអ្នកនយោបាយល្អ ហើយមិនត្រូវប្រើអំណាចឬធ្វើសកម្មភាពណាមួយ ដែលប៉ះពាល់ដល់សភាតំណាងរាស្រ្ត ឬស្ថាប័នពាក់ព័ន្ធ ឬបុគ្គលណាមួយឡើយ។

ទន្ទឹមនោះ មេដឹកនាំបក្សប្រឆាំងថៃច្រើនទៀត​ ក៏ជំរុញឲ្យលោកស្រី ផែថងថាន ​ប្រកាស​រំលាយសភាផងដែរ ដើម្បីទប់ស្កាត់​ការ​ធ្វើរដ្ឋប្រហារ​​ថ្មី។

សូមជម្រាបថា លោកស្រី ផែថងថាន វ័យ៣៨ឆ្នាំនៃគណបក្ស ភឿថៃ បានចូលកាន់តំណែងជានាយករដ្ឋមន្ត្រីថៃនៅថ្ងៃទី១៦ខែសីហាឆ្នាំ២០២៤ ជំនួសលោក សេដ្ឋា ថាវីស៊ីន ក្រោយនយោបាយថៃ ត្រូវជាប់គាំងអស់រយៈពេលជាច្រើនខែ៕

អត្ថបទ៖ សុខ សុវណ្ណ

ចុចអាន៖ ​ក្រោយ​ធ្លាយសារសំឡេង​ ផែថងថាន ប្រឈម​រឿង​​សំខាន់៣ លំបាករើ​ខ្លួនរួច​​​​​