៦ខែឆ្នាំ២០២៥ កម្ពុជាបណ្ដេញចេញជនបរទេសជិត ៥ពាន់នាក់ មាន៨៨សញ្ជាតិ

អាជ្ញាធរកម្ពុជាបានបណ្ដេញជនបរទេសដែលប្រព្រឹត្តបទល្មើសចេញពីប្រទេសជិត៥ពាន់នាក់ មាន៨៨សញ្ជាតិ ក្នុងរយៈពេល៦ខែឆ្នាំ២០២៥។ អគ្គនាយកអន្តោប្រវេសន៍ ឧត្តមសេនីយ៍ឯក សុខ វាសនា បានបញ្ជាក់ថា ជនបរទេសដែលត្រូវបានបណ្ដេញចេញនេះគឺដោយសារលួចឆ្លងដែន និងធ្វើការដោយខុសច្បាប់ ដែលភាគច្រើនពាក់ព័ន្ធនឹងការឆបោកតាមប្រព័ន្ធអនឡាញ។

បើតាមលោកឧត្តមសេនីយ៍ឯក សុខ វាសនា ចំនួននេះ បើប្រៀបធៀបនឹងរយៈពេលដូចគ្នា ឆ្នាំ២០២៤ គឺមានការកើនឡើង។ ការកើនឡើងនេះ គឺពាក់ព័ន្ធនឹងជនបរទេសមួយចំនួន ដែលមកធ្វើការខុសច្បាប់ ស្នាក់នៅខុសច្បាប់ និងលួចជ្រៀតចូលក្នុងប្រទេសកម្ពុជាដោយខុសច្បាប់ រួមទាំងពាក់ព័ន្ធនឹងករណីឆបោកតាមប្រព័ន្ធអនឡាញផងដែរ។

៦ខែ ឆ្នាំ២០២៥នេះដូចគ្នា ប្រជាពលរដ្ឋខ្មែរចំនួនជាង៥ពាន់នាក់ ក៏ត្រូវបានអាជ្ញាធរបរទេសបានចាប់បញ្ជូនមកឱ្យកម្ពុជាវិញផងដែរដែលបានប្រព្រឹត្តបទល្មើសនៅតាមបណ្ដាប្រទេសមួយចំនួន។ ក្នុងករណីនេះ ឧត្តមសេនីយ៍ឯក សុខ វាសនា បានបញ្ជាក់ថា ក្នុងចំណោមពលរដ្ឋខ្មែរទាំងនោះ គឺមានប្រមាណ១៨០នាក់ គឺជាស្ត្រីខ្មែរ ដែលត្រូវបានជួយសង្គ្រោះ និងបញ្ជូនមកពីប្រទេសចិន ដោយសារការចាញ់បោកមេខ្យល់ ក្រោមរូបភាពទៅរៀបការ។

ជាមួយគ្នានេះ មន្ត្រីអគ្គនាយកដ្ឋានអន្តោប្រវេសន៍ នៃក្រសួងមហាផ្ទៃ ដែលប្រចាំការតាមបណ្ដាច្រកទ្វារព្រំដែន រួមទាំងច្រកទ្វារព្រំដែនអាកាស បានប្រើវិធីសាស្រ្តស្រាវជ្រាវ និងសន្និដ្ឋានបឋម ឈានទៅទប់ស្កាត់បានទាន់ពេលវេលា ករណីសង្ស័យពាក់ព័ន្ធអំពើជួញដូរមនុស្ស ដោយឃាត់ដំណើរឆ្លងដែនសរុប១១៨នាក់ ក្នុងនោះមានជនជាតិខ្មែរ១០៤នាក់ ជនជាតិចិន១៤នាក់។

ឧត្តមសេនីយ៍ឯក សុខ វាសនា ថា ជនរងគ្រោះដោយអំពើជួញដូរមនុស្សទាំង១១៨នាក់ ត្រូវបានសមត្ថកិច្ចអន្តោប្រវេសន៍អន្តរាគមន៍ក្នុងករណីសរុបចំនួន៥៩ ដែលភាគច្រើនត្រូវបានអូសទាញឱ្យទៅរៀបការដោយខុសច្បាប់ជាមួយជនបរទេស បានធ្វើឡើងជាក្រុមៗ៕

ដោយ៖ ធឿន វ៉ាន់សុង