រដ្ឋមន្ត្រីព័ត៌មាន នេត្រ ភក្រ្តា ទទួលបានពានរង្វាន់ «បេសកជនពិសេស នៃសុចរិតភាពព័ត៌មាន»

រដ្ឋមន្ត្រីក្រសួងព័ត៌មានកម្ពុជា លោក នេត្រ ភក្ត្រា ទទួលពានរង្វាន់ បេសកជនពិសេស នៃសុចរិតភាពព័ត៌មាន ពីវិទ្យាស្ថានអភិវឌ្ឍន៍ប្រព័ន្ធផ្សព្វផ្សាយអាស៊ី-ប៉ាស៊ីហ្វិក (AIBD) ក្នុងសន្និសីទកំពូល ប្រព័ន្ធផ្សព្វផ្សាយអាស៊ី លើកទី២០ និងកិច្ចប្រជុំពាក់ព័ន្ធ (20th Asia Media Summit) ក្រោមប្រធានបទ “អបអរសាទរពីរទសវត្សរ៍ នៃឧត្តមភាព និងលើសពីនេះ” នៅសណ្ឋាគារសុខាសៀមរាប នាថ្ងៃទី២៣ ខែកក្កដា ឆ្នាំ២០២៥ នៅខេត្តសៀមរាប ដែលកម្ពុជាធ្វើជាម្ចាស់ផ្ទះ។

រដ្ឋមន្ត្រីក្រសួងព័ត៌មានកម្ពុជា លោក នេត្រ ភក្រ្តា អរគុណដល់ភាគីស្រីលង្ការដែលបានផ្ដល់ពានរង្វាន់នេះ។ លោកនេត្រ ភក្ត្រា ចាត់ទុកការផ្ដល់ពានរង្វាន់នេះ ថាជាកត្តាមួយសម្រាប់ជំរុញមួយបន្ថែមទៀត ឲ្យកម្ពុជាចូលរួមប្រយុទ្ធប្រឆាំងព័ត៌មានក្លែងក្លាយបន្ថែមទៀត នៅក្នុងឆាកតំបន់ និងពិភពលោក។

មុនកាន់តំណែងជារដ្ឋមន្ត្រីក្រសួងព័ត៌មាន ក្នុងអាណត្តិរដ្ឋាភិបាលនីតិកាលទី៧ លោក នេត្រា ភក្រ្តា ឆ្លាប់ជាអ្នកជំនាញសារព័ត៌មាន ដែលប្រកបដោយបទពិសោធ និងចំណេះដឹង ហើយមានភាពប៉ិនប្រសប់លើការបណ្ដុះបណ្ដាលធនធានមនុស្ស។ លោក បានបញ្ចប់ការសិក្សាថ្នាក់បរិញ្ញាបត្រចំនួនពីរ គឺបរិញ្ញាបត្រផ្នែកភាសាបារាំង និងបរិញ្ញាបត្រផ្នែកសារព័ត៌មាន នៃសាកលវិទ្យាល័យភូមិន្ទភ្នំពេញ ហើយលោក ក៏ធ្លាប់បានទៅសិក្សានៅបារាំងផងដែរ។ រដ្ឋមន្ត្រី ក្រសួងព័ត៌មានរូបនេះ ក៏ធ្លាប់បំពេញការងារជាប្រធានផ្នែកកិច្ចការសាធារណៈ និងជាអ្នកនាំពាក្យរបស់អង្គជំនុំជម្រះវិសាមញ្ញក្នុងតុលាការកម្ពុជាផងដែរ។ តាមរយៈការងារជាអ្នកនាំពាក្យឱ្យសាលាក្ដីខ្មែរក្រហម ក៏ដូចជាការងារនៅក្រសួងបរិស្ថាន លោក នេត្រ ភក្ត្រា តែងតែបានផ្ដល់កិច្ចសហការល្អជាមួយភាគីជាដៃគូ អង្គការជាតិ-អន្តរជាតិ ជាពិសេសអ្នកសារព័ត៌មាន ដើម្បីផ្ដល់នូវសេចក្ដីរាយការណ៍ ក៏ដូចជាកិច្ចសហប្រតិបត្តិការនានាលើកិច្ចការដែលលោកទទួលបន្ទុក។

ក្នុងតួនាទីជារដ្ឋមន្ត្រីក្រសួងព័ត៌មាន នៅខែមេសា ឆ្នាំ២០២៥ លោក នេត្រ ភក្ត្រា បានបើកយុទ្ធនាការ «និយាយថាទេ ចំពោះព័ត៌មានក្លែងក្លាយ!» ក្នុងគោលដៅផ្លាស់ប្ដូរឥរិយាបថរបស់ប្រជាជន ពិសេសនៅលើបណ្ដាញសង្គម ដើម្បី​រួមគ្នា ទប់ស្កាត់ការរីកសាយភាយនៃព័ត៌មានក្លែងក្លាយនៅក្នុងសង្គមកម្ពុជា ពីព្រោះតែលោក យល់ថា ព័ត៌មានក្លែងក្លាយ ជាមូលហេតុដែលនាំពលរដ្ឋសម្រេ​ចចិត្តខុស ហើយអាចឈាននាំឱ្យមានវិនាសកម្មធ្ងន់ធ្ងរ។

កាលពីឆ្នាំ២០២៤កន្លងទៅ ព័ត៌មានក្លែងក្លាយចំនួន ៣ ៦២១ ត្រូវបានកត់សម្គាល់ និងទប់ស្កាត់ដោយក្រសួងព័ត៌មាន ដែលមានលោក នេត្រ ភក្ត្រាជារដ្ឋមន្ត្រី ដើម្បីបញ្ចៀសបញ្ហាប្រឈមធ្ងន់ធ្ងរ។ ចំណែករយៈពេល៦ខែ ក្នុងឆ្នាំ២០២៥ ក្រសួងព័ត៌មាន បានកត់ត្រាព័ត៌មានក្លែងក្លាយបាន ១,៧៥៧។

តាមរយៈកិច្ចប្រជុំកំពូលប្រព័ន្ធផ្សព្វផ្សាយអាស៊ីលើកទី២០ បានជជែកពីបរិបទប្រព័ន្ធបញ្ញាសិប្បនិមិ្មត ឬAI ដែលបាននិងកំពុងជ្រៀតចូលទៅ​យ៉ាងជ្រៅ​ក្នុងវិស័យព័ត៌មាន ដែលការណ៍័នេះ ធ្វើឱ្យពលរដ្ឋ​បែងចែក​មិនដាច់រវាងមួយណាជាព័ត៌មានពិត ហើយមួយណាជាព័ត៌មានដែលបង្កើតឡើងដោយ AI។ ការណ៍នេះ បានបង្ហាញថាលោក បានចូលរួមទប់ស្កាត់ព័ត៌មានក្លែងក្លាយនៅក្នុងប្រទេសកម្ពុជាផង នៅឆាកតំបន់ផង និងអន្តរជាតិផង ដែលជាក្ដីកង្វល់រួម៕

ដោយ៖ ង៉ិល ណារ៉ាត់