មនុស្សជាច្រើននាក់បាត់ខ្លួន ដោយសារភ្លៀងធ្លាក់ខ្លាំងបង្កជាទឹកជំនន់នៅភាគនិរតីប្រទេសជប៉ុន

យោងតាមការចេញផ្សាយរបស់សារព័ត៌មាន CNA នៅថ្ងៃទី១១ខែសីហានេះ ប្រជាជនរាប់លាននាក់នៅភាគនិរតីនៃប្រទេសជប៉ុនត្រូវបានជំរុញឱ្យជម្លៀសចេញ បន្ទាប់ពីមានភ្លៀងធ្លាក់ខ្លាំងបានបង្កជាទឹកជំនន់និងបំណាក់ដីយ៉ាងធ្ងន់ធ្ងរលបណ្តាលឱ្យមនុស្សមួយចំនួនបាត់ខ្លួន។

នៅក្នុងទីក្រុង Tamana នៃខេត្ត Kumamoto មានភ្លៀងធ្លាក់រហូតដល់ ៣៧ សង់ទីម៉ែត្រក្នុងរយៈពេលត្រឹមតែ ៦ ម៉ោង ដែលជាចំនួនខ្ពស់បំផុតមិនធ្លាប់មានកត់ត្រានៅតំបន់នោះ។

ទឹក​ជំនន់​បាន​លិច​ផ្ទះ ហាង​លក់​ទំនិញ និង​យានជំនិះ ខណៈ​ទឹក​ទន្លេ​ហូរ​ចេញបាន​បំផ្លាញ​ផ្លូវ ។ ទីភ្នាក់ងារគ្រប់គ្រងអគ្គិភ័យ និងគ្រោះមហន្តរាយបាននិយាយថា មនុស្សជាង ៣ លាននាក់បានទទួលការណែនាំអំពីការជម្លៀស ក្នុងនោះមាន ៣៨៤,០០០នាក់ ស្ថិតនៅក្រោមកម្រិតព្រមានខ្ពស់បំផុត។

នៅខេត្ត Kumamoto ឯណោះវិញបុរសម្នាក់បានបាត់ខ្លួនបន្ទាប់ពីមានបំណាក់ដីនៅជិតផ្ទះរបស់គាត់។ ចំណែកនៅក្នុងខេត្ត Fukuoka មនុស្សពីរនាក់ត្រូវបានគេរាយការណ៍ថាបានបាត់ខ្លួនបន្ទាប់ទន្លេហូរខ្លាំងនាំយកពួកគេទៅ។

ទីភ្នាក់ងារឧតុនិយមជប៉ុនបានព្រមានអំពីស្ថានភាពថានឹងគំរាមកំហែងដល់អាយុជីវិត និងបានជំរុញឱ្យមានការប្រុងប្រយ័ត្នខ្ពស់បំផុត៕

អត្ថបទ៖ ប៊ុន សុភាព