ជនជាតិវៀតណាម៧២នាក់ត្រូវបណ្ដេញចេញពីកម្ពុជា ក្រោយរកឃើញប្រព្រឹត្តល្មើសច្បាប់

អគ្គនាយកដ្ឋានអន្តោប្រវេសន៍ បានបន្តបណ្តេញជនជាតិវៀតណាមសរុបចំនួន៧២នាក់ចេញពីប្រទេសកម្ពុជា ក្រោយរកឃើញជាប់ពាក់ព័ន្ធលួចឆ្លងដែនខុសច្បាប់ និងបទល្មើសឆបោកតាមប្រព័ន្ធអនឡាញ (Online Scams)។

ក្នុងចំណោមជនជាតិវៀតណាមទាំង ៧២នាក់នោះ គឺមានស្រីចំនួន២៤នាក់ ដែលទទួលបានពីស្នងការដ្ឋាននគរបាលរាជធានីភ្នំពេញ ខេត្តស្វាយរៀង ខេត្តកណ្តាល ខេត្តព្រៃវែង ខេត្តពោធិ៍សាត់ និងខេត្តត្បូងឃ្មុំ។

តាមការបញ្ជាក់របស់អគ្គនាយកដ្ឋានអន្តោប្រវេសន៍ ការអនុវត្តនីតិវិធីបណ្ដេញចេញចំពោះជនជាតិវៀតណាមទាំងនោះ គឺពាក់ព័ន្ធករណីបំពានប្រកាសស្តីពីការបណ្តេញជនបរទេសចេញពីកម្ពុជា អនុវត្តទោសចប់ លួចស្នាក់នៅខុសច្បាប់លើសទិដ្ឋាការកំណត់ លួចឆ្លងដែនខុសច្បាប់ និងលួចស្នាក់នៅធ្វើការខុសច្បាប់ទាក់ទងអំពើឆបោកតាមអនឡាញ (Online Scams)។

ចំពោះការបណ្ដេញចេញ គឺបានធ្វើឡើងតាមច្រកទ្វារព្រំដែនអន្តរជាតិភ្នំឌិន ខេត្តតាកែវ កាលពីថ្ងៃទី១២ ខែសីហា ឆ្នាំ២០២៥ តាមការណែនាំរបស់ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងលោកអគ្គនាយកអន្តោប្រវេសន៍៕