ប្រឡងបាក់ឌុបនៅព្រឹកនេះ មណ្ឌលប្រឡងភ្នំពេញមានបេក្ខជន និងមេប្រយោគអវត្តមានជាង៦០០នាក់

សម្រាប់ដំណើរការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ២៨ សីហា ២០២៥នៅមណ្ឌលប្រឡងរាជធានីភ្នំពេញ មានបេក្ខជន និងគណៈមេប្រយោគអវត្តមានប្រមាណជាង៦០០នាក់ ហើយស្ថានភាពនៅតាមមណ្ឌលប្រឡងនីមួយៗមានសភាពស្ងប់ស្ងាត់ល្អ។

លោក ហែម ស៊ីណារ៉េត ប្រធានមន្ទីរអប់រំយុវជន និងកីឡា រាជធានីភ្នំពេញ បានមានប្រសាសន៍នៅព្រឹកថ្ងៃទី២៨សីហានេះថា ឆ្នាំនេះមណ្ឌលប្រឡងរាជធានីភ្នំពេញមានបេក្ខជនដាក់ពាក្យប្រឡងចំនួន ២៧៨៨៤ នាក់ចែកជា៣៥មណ្ឌល ត្រូវជា១១៣៥បន្ទប់ ក្នុងនោះថ្នាក់វិទ្យាសាស្ត្រមានបេក្ខជន១០៣៤០នាក់ ចែកជា១៤មណ្ឌល ស្មើនឹង៤១៨បន្ទប់ និងវិទ្យាសាស្ត្រសង្គមមានបេក្ខជន១៧៨២៥នាក់ ចែកជា២១មណ្ឌល ត្រូវជា៧១៧បន្ទប់ មានការកើនឡើង ខណៈឆ្នាំមុនមានបេក្ខជនដាក់ពាក្យប្រឡងចំនួន២៥៧៣៩នាក់ ចែកជា៣២មណ្ឌល ត្រូវជា១០៣៧បន្ទប់ ក្នុងនោះ បេក្ខជនមានបញ្ហាសុខភាពស្រាលៗ និងសង្គ្រោះបឋមមានចំនួន១៩២នាក់។

លោកប្រធានមន្ទីរបានបន្តថា សម្រាប់ដំណើរការប្រឡងនៅព្រឹកនេះ មានគណៈមេប្រយោគចំនួន៤នាក់អវត្តមានក្នុងចំណោមគណៈមេប្រយោគសរុបចំនួន៣៦៨៩នាក់ ត្រូវជា ០,១១% និងបេក្ខជនអវត្តមានចំនួន៦០៩នាក់ ត្រូវជា ២,១៨% ក្នុងចំណោមបេក្ខជនសរុបចំនួន២៧៨៨៤នាក់។ លោកប្រធានមន្ទីរបានបន្តថា ស្ថានភាពមណ្ឌលប្រឡងនីមួយៗ គឺមានសភាពស្ងប់ស្ងាត់ល្អដោយគណៈមេប្រយោគប្រឡងបានអនុវត្តតួនាទី និងភារកិច្ចរៀងៗខ្លួនបានល្អប្រសើរ។ ចំណែកបេក្ខជនប្រឡងបានគោរពបទបញ្ជាផ្ទៃក្នុងស្តីពីការប្រឡងបានល្អហើយនៅខាងក្រៅមណ្ឌល កងកម្លាំងការពារអនុវត្តតួនាទីបានល្អប្រសើរ មានកងកម្លាំងការពារមណ្ឌលគ្រប់គ្រាន់ព្រមទាំងអាជីវកម្មជុំវិញមណ្ឌលប្រឡងត្រូវបានផ្អាកទាំងស្រុង ជាពិសេសអាជីវកម្មថតចម្លង អាជីវកម្មដែលបង្កសំឡេងរំខានដល់ការប្រឡង។

ការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ២៨ សីហា ២០២៥ មានបេក្ខជនចុះឈ្មោះប្រឡងសរុបចំនួន ១៤៦ ៧២០ នាក់ (ស្រី ៨១ ៤៤២ នាក់) ក្នុងនោះ បេក្ខជនថ្នាក់វិទ្យាសាស្ត្រ មានចំនួន ៤០ ៦៧៨ នាក់ (ស្រី ២៤ ៥១៩ នាក់) បេក្ខជនថ្នាក់វិទ្យាសាស្ត្រសង្គម មានចំនួន ១០៦ ០៤២ នាក់ (ស្រី ៥៦ ៩២៣ នាក់)។ មណ្ឌលសំណេរមានចំនួនសរុប ២៤១ មណ្ឌល ត្រូវជា ៥ ៩២៤ បន្ទប់ ក្នុងនោះថ្នាក់វិទ្យាសាស្ត្រមានចំនួន ៧២ មណ្ឌល ត្រូវជា ១ ៦៥៥ បន្ទប់ និងថ្នាក់វិទ្យាសាស្ត្រសង្គម មានចំនួន ១៦៩ មណ្ឌល ត្រូវជា ៤ ២៦៩ បន្ទប់។ សម្រាប់ការប្រឡងឆ្នាំនេះ មានការចូលរួមដោយគណៈមេប្រយោគ និងគណៈកម្មការនានា ចូលរួមក្នុងដំណើរការប្រឡងសរុបចំនួន ៣១ ២០៣ នាក់។

ក្រសួងអប់រំ យុវជន និងកីឡា គ្រោងនឹងប្រកាសលទ្ធផលប្រឡងនៅថ្ងៃទី២០ ខែកញ្ញា ឆ្នាំ២០២៥ សម្រាប់រាជធានីខេត្ត ទូទាំងប្រទេស ព្រមទាំងមានផ្សាយនៅលើទំព័រហ្វេសប៊ុកផ្លូវការក្រសួងអប់រំ យុវជន និងកីឡា៕

អត្ថបទ៖ សំអឿន