ត្រឹមកន្លះថ្ងៃ ថៃរងគ្រោះរញ្ជួយដី២ដងក្នុងទីតាំងពីរផ្សេងគ្នា

បើតាមនាយកដ្ឋានអង្កេតការរញ្ជួយដីការរញ្ជួយដីថៃ ក្នុងរយៈត្រឹមកន្លះថ្ងៃគ្រោះរញ្ជួយដី២ដងបានវាយប្រហារប្រទេសថៃផ្ទួនៗ រួមមានខេត្តឈៀងម៉ៃ និង ខេត្ត Ubon Ratchathani ដែលរងឥទ្ធិពលពីការរញ្ជួយនៅប្រទេសវៀតណាម ខណៈការខូចខាតប៉ុន្មានមិនទាន់ត្រូវបានដឹងនៅឡើយ។

យោងតាមការចេញផ្សាយរបស់ Khaosod គ្រោះរញ្ជួយដីកម្រិត ២.៥ រ៉ិចទ័រ ដែលមានជម្រៅ១ គីឡូម៉ែត្រ បានវាយប្រហារស្រុក Mae Taeng ខេត្ត ឈៀងម៉ៃ នៅថ្ងៃទី ១១ ខែកញ្ញា នៅវេលាម៉ោង ១១ និង​៥៨ នាទីព្រឹក។ ចំណុច​កណ្តាល​នៃ​ការ​រញ្ជួយ​ដី​ស្ថិត​នៅ Kuet Chang ស្រុក Mae Taeng ។

អ្នក​ស្រុក​ខ្លះ​បាន​រាយការណ៍​ថា​មាន​អារម្មណ៍​ញ័រ​បណ្តាល​ឲ្យ​វិលមុខ ខណៈគេទំព័រព័ត៌មានក្នុងខេត្តឈៀងម៉ៃក៏បានរាយការណ៍អំពីគ្រោះរញ្ជួយដីនេះផងដែរ ដោយមនុស្សម្នាបានបញ្ចេញមតិលើអ៊ីនធឺណិតអំពីការទទួលរងឥទ្ធិពលពីការរញ្ជួយ។

ចំណែកបើតាមការចេញផ្សាយ របស់ The Nation នៅព្រឹកថ្ងៃដដែលនេះ ខេត្ត Ubon Ratchathani ភាគខាងកើតប្រទេសថៃបានរងការវាយប្រហារពីគ្រោះរញ្ជួយដីកម្រិត៤.៧ រ៉ិចទ័រ ដោយចំណុចកណ្ដាលនៃរញ្ជួយដីនៅប្រទេសវៀតណាម។ ការរញ្ជួយដីនេះបានកើតឡើងនៅម៉ោង ១ និង ៣៦ ព្រឹក នៅជម្រៅរាក់ត្រឹមតែ ២ គីឡូម៉ែត្រ ប៉ុន្តែនៅតែមានការព្រមានពីសុវត្ថិភាព។

អាជ្ញាធរ​បាន​ថៃបានជំរុញឲ្យប្រជាពលរដ្ឋមានការប្រុងប្រយ័ត្នខ្ពស់ តាមដានព័ត៌មានផ្លូវការ និងត្រៀមខ្លួនក្នុងករណីមានសកម្មភាពរញ្ជួយដីបន្ថែមទៀត បើទោះបីជាការ​រញ្ជួយ​ដី​នេះ​មិន​ត្រូវ​បាន​គេ​រំពឹង​ថា​នឹង​បង្ក​ការ​ខូច​ខាត​ដល់​អាយុ​ជីវិត ឬ​ទ្រព្យសម្បត្តិ​ធ្ងន់ធ្ងរនៅ​ក្នុង​ប្រទេស​ថៃ​ក៏ដោយ។

គួរបញ្ជាក់ថាប្រទេសថៃចាប់តាំងពីមានការរញ្ជួយដីដ៏ធំកាលពីខែមីនាពីប្រទេសមីយ៉ាន់ម៉ាមក ប្រទេសនេះជារើយៗរងការវាយប្រហារពីគ្រោះរញ្ជួយដីកម្រិតស្រាលជាបន្តបន្ទាប់ ដែលបង្កជាការភ័យខ្លាចក្នុងចំណោមប្រជាជនថៃ៕

អត្ថបទ៖ ប៊ុន សុភាព