​ជម្លោះជាមួយថៃ រដ្ឋមន្រ្តី​ក្រសួង​សេដ្ឋកិច្ច​​ថា​ជា​ឱកាស​សាងកេរ្តិ៍ឈ្មោះ​​ផលិតផល​ខ្មែរ​ ទាញការ​​គាំទ្រ​ពី​ពលរដ្ឋ​

រដ្ឋមន្រ្តី​ក្រសួង​សេដ្ឋកិច្ច​​មើលឃើញក្នុង​ស្ថានភាព​ដែលកម្ពុជា​កំពុង​មានបញ្ហា​អរិយភាពជាមួយប្រទេស​ថៃថា ជា​ឱកាស​​ដែល​ក្រុមហ៊ុន ឬ សហគ្រាសក្នុងស្រុក ត្រូវ​តែ​​ពង្រឹង​និងកសាង​ផលិតផល​របស់​ខ្លួន​​ដើម្បី​ទទួលបាន​ការ​គាំទ្រ​និងការ​ជឿទុកចិត្ត​ពី​ពលរដ្ឋ​។

ថ្លែងក្នុងពិធីបើក «ការតាំងពិព័រណ៌ផលិតផលខ្មែរ ឆ្នាំ ២០២៥ ក្រោម​ប្រធានបទ ៖ ពង្រឹង និង ពង្រីក​សមត្ថភាព​ផលិតផល​ក្នុងស្រុក» នៅ​ព្រឹកមិញនេះ លោក អូន ព័ន្ធមុនីរ័ត្ន ឧបនាយករដ្ឋមន្រ្តី, រដ្ឋមន្ត្រី ក្រសួងសេដ្ឋកិច្ច និង ហិរញ្ញវត្ថុបាន​ថ្លែង​ថា ស្ថិត​ក្នុងស្ថានភាព​នៃការ​បង្កអរិភាព​ពីសំណាក់​ប្រទេស​ជិតខាង បច្ចុប្បន្ន​ផលិតករ, ឧស្សាហករ និង សិប្បករក្នុងស្រុក បាន​កំពុងបន្តខិតខំ​ពង្រឹង និង ពង្រីក​ផលិតកម្ម​របស់ខ្លួន​​ឲ្យ​កាន់តែមាន​មូលដ្ឋាន​រឹងមាំ​ជាង​មុន​ជា​បណ្តើរៗ ស្របពេលដែលប្រជាជនកម្ពុជាចាប់ផ្តើមផ្តល់តម្លៃដល់ផលិតផលក្នុងស្រុក ខ្ពស់​ជាង​ផលិតផល​នាំចូលពីបរទេស។

លោក​រដ្ឋមន្រ្តី​ថា កម្ពុជាមានទីផ្សារបើកចំហរដែលមានលក្ខណៈប្រកួតប្រជែង រវាងផលិតផលក្នុងស្រុក និងផលិតផលនាំចូលពីបរទេស។ ប្រជាជនកម្ពុជាមានសិទ្ធិ​ជ្រើសរើសទំនិញគ្រប់ប្រភេទ​ទៅតាមតម្រូវការរបស់ខ្លួន ដោយផ្អែកលើតម្លៃ, អនាម័យ, គុណភាព និង បរិមាណ ជាកត្តាចម្បងក្នុងការសម្រេចចិត្តទិញ ឬ ការប្រើប្រាស់ផលិតផលណាមួយ។ យ៉ាងណាមិញ បច្ចុប្បន្ន ការផលិតទំនិញដើម្បីបម្រើតម្រូវការក្នុងស្រុក ចាប់ផ្តើមមាននិន្នាការកើនឡើងគួរឲ្យ​កត់​សម្គាល់​។

«ក្នុងបរិការណ៍​នេះ ជា​​ឱកាសដែល​សហគ្រាស​ក្នុង​ស្រុក​​ត្រូវតែ​​ពង្រឹង​និង​ទាញយកអត្ថប្រយោជន៍ឲ្យបានជាអតិបរមាពីការគាំទ្រ​ទី១ ការ​ផ្សព្វផ្សាយពីផលិតផលក្នុងស្រុកឲ្យកាន់តែទូលំទូលាយ និង​មានការទទួលស្គាល់​ពីសំណាក់អ្នកប្រើប្រាស់; ទី២. ឱកាសពង្រឹង និងពង្រីកមូលដ្ឋានផលិតកម្មឲ្យបាន​សម​ស្រប ដើម្បីឆ្លើយតបទៅនឹងតម្រូវការរបស់ប្រជាជន និង ទី៣. ឱកាសស្វែងរក និងចាប់យកទីផ្សារបន្ថែម»។

ដើម្បីអាចចាប់យកឱកាសទាំងនេះ​បានពេញលេញ លោករដ្ឋមន្រ្តី​ជំុរញ​ឲ្យ​ក្រុមហ៊ុននិងសហគ្រាសក្នុងស្រុក ត្រូវខិតខំបង្កើតនិងបង្កើនជំនឿទុកចិត្តខ្ពស់ពីសំណាក់អ្នកប្រើប្រាស់ក្នុងស្រុក តាមរយៈការផ្គត់ផ្គង់ទំនិញឬការផ្តល់សេវាដែលមានគុណភាព, មានអនាម័យ និង មានថ្លៃសមរម្យ។

លោក​រដ្ឋមន្រ្តី​ជឿជាក់ថា សន្ទុះ​នៃការគាំទ្រផលិតផលក្នុងស្រុក​ទាំងបច្ចុប្បន្ន និងទៅអនាគតនឹង​ផ្តល់ជា​កម្លាំងចិត្ត និង ធនធានបន្ថែមដល់ក្រុមហ៊ុន និងសហគ្រាសក្នុងស្រុក ក្នុងការ​ពង្រឹងនិងការ​ពង្រីក​សមត្ថភាព​ផលិតរបស់ខ្លួនឲ្យកាន់តែខ្លាំងក្លានិង​ឲ្យបានកាន់តែល្អបន្ថែមទៀត៕