ត្រាំ ព្រមាន​ពី «មហន្តរាយសេដ្ឋកិច្ច» ​អាមេរិក បើតុលាការកំពូលប្រឆាំងពន្ធរបស់លោក

ប្រធានាធិបតីសហរដ្ឋអាមេរិក លោក ដូណាល់ ត្រាំ បានថ្លែងកាលពី​ថ្ងៃចន្ទ (១០ វិច្ឆិកា) ថា សហរដ្ឋ​អាមេរិក​នឹង​ប្រឈមមុខនឹងគ្រោះមហន្តរាយសេដ្ឋកិច្ច និងសន្តិសុខជាតិ ប្រសិនបើតុលាការកំពូលសម្រេចប្រឆាំង​ចំណាត់ការពន្ធគយលើទំនិញនាំចូលរបស់លោក។ នេះបើតាមការចុះផ្សាយរបស់ទីភ្នាក់ងារសារព័ត៌មា​នរ៉យទ័រ។

ការថ្លែងបែបនេះ ធ្វើឡើងក្រោយ​ពីលោក ត្រាំ កាលពីថ្ងៃអាទិត្យ​ ​បាន​ប្ដេជ្ញាផ្ដល់ប្រាក់ ២ ០០០ ដុល្លារ/ម្នាក់ ទៅកាន់ពលរដ្ឋអាមេរិក​ដែល​មាន​ប្រាក់ចំណូលទាប និងមធ្យម​ ដោយ​ប្រើប្រាស់ថវិកា ដែល​ប្រមូលបាន​ពីពន្ធ។ ក្រៅពីនេះ ចំណូលដដែល ក៏នឹង​ប្រើប្រាស់ដើម្បីកាត់បន្ថយបំណុលជាតិរបស់អាមេរិកផងដែរ។ ​

ក្នុងអំឡុងពេលនៃការជជែកវែកញែកផ្ទាល់មាត់កាលពីសប្តាហ៍មុន លើសំណុំរឿងពន្ធគយ ចៅក្រមតុលាការកំពូល បាន​វែកញែកទៅលើសិទ្ធិអំណាចរបស់លោក ​ត្រាំ ក្នុងការដាក់ពន្ធគយក្រោមច្បាប់អំណាចសេដ្ឋកិច្ចបន្ទាន់អន្តរជាតិឆ្នាំ ១៩៧៧ (IEEPA) ដែល​មិនបាន​ចែងអំពីពន្ធគយ។ ប្រសិនបើតុលាការសម្រេចប្រឆាំងពន្ធត្រាំ ដោយរាប់ទុកថាវាខុសច្បាប់នោះ នោះរដ្ឋបាលអាមេរិកអាចនឹង​ត្រូវ​សង​ប្រាក់ត្រឡប់ទៅក្រុមហ៊ុននាំចូល ដែលបាន​បង់ពន្ធខ្ពស់ថ្មី នាពេលកន្លងមក។

លោកស្រីចៅក្រម Amy Coney Barrett បានព្រមានថា វាអាចជា​«ការរញ៉េរញ៉ៃ» មួយសម្រាប់តុលាការក្នុងការដោះស្រាយការសងប្រាក់វិញសម្រាប់អ្នកនាំចូលរបស់​អាមេរិកដែលបានបង់ពន្ធរួច ​។ មកទល់ពេលនេះ តុលាការកំពូលអាមេរិក​មិនទាន់សម្រេចទេ ​ខណៈរ៉យទ័ររាយការណ៍ថា បើ ត្រាំ ចាញ់ នោះក្រុមហ៊ុនអាមេរិកអាចនឹងទទួលសំណងជាង ១០០ ប៊ីលាន​ដុល្លារ(សរុប) ដែលខ្លួន​បាន​បង់ពន្ធមកវិញ។

លោក ត្រាំ បាន​ច្រានចោលនូវរបាយការណ៍តួលេខ ដែលត្រូវសងទៅវិញនេះ ថាមិនត្រឹមត្រូវ ព្រោះវាមាន​ចំនួនលើសពី ២ ទ្រីលាន​ដុល្លារ ពីចំណូលពន្ធគយ និងការវិនិយោគ។ លោកថ្លែងយ៉ាងដូច្នេះថា៖ «វា​នឹង​មាន​គ្រោះមហន្តរាយ​សេដ្ឋកិច្ច។ វា​នឹង​ក្លាយជា​គ្រោះមហន្តរាយ​សន្តិសុខ​ជាតិ ប្រសិនបើ​យើង​ចាញ់ក្តី​នៅ​តុលាការ​កំពូល»៕

​