ជប៉ុនគ្រោងចំណាយថវិកាជំរុញសេដ្ឋកិច្ចជាង ១៣០ ប៊ីលាន​ដុល្លារ ដើម្បី​ជួយពលរដ្ឋទប់ទល់​​អតិផរណា​

រដ្ឋាភិបាល​នៃប្រទេស​ជប៉ុនកំពុង​ត្រៀមកញ្ចប់ថវិកា​ជំរុញសេដ្ឋកិច្ច​ប្រមាណ ២១,៣ ទ្រីលាន​យ៉េន (១៣៥ ប៊ីលាន​ដុល្លារ) ដើម្បីជួយពលរដ្ឋរបស់់ខ្លួនទប់ទល់នឹង​បញ្ហាអតិផរណាដែលបន្តអូសបន្លាយ។ នេះបើតាមការចុះផ្សាយរបស់ទីភ្នាក់ងារសារព័ត៌មានរ៉៉យទ័រ ដែលស្រង់ព័ត៌មាន​ពីសេចក្ដីព្រាងទិន្នន័យដែលខ្លួនបាន​ឃើញ នៅថ្ងៃព្រហស្បតិ៍នេះ។

ប្រសិន​បើរដ្ឋាភិបាល​អនុម័ត នោះវានឹង​ក្លាយជាកញ្ចប់ថវិកាជំរុញសេដ្ឋកិច្ចដ៏ធំំបំផុតរបស់ជប៉ុន រាប់តាំងពីវិបត្តិជំងឺរាតត្បាតកូវីដ១៩។ ​

ផែនការនេះ បង្ហាញពី​ចក្ខុវិស័យ​របស់នាយករដ្ឋមន្ត្រីជប៉ុនថ្មី លោកស្រី Sanae Takaichi ​លើ​ការចំណាយរបស់រដ្ឋាភិបាល​ដ៏ច្រើនសណ្ធឹក ​និងគោលនយោបាយរូបិយវត្ថុធូររលុង។ ប៉ុន្តែវាក៏បង្កើន​ក្ដីព្រួយបារម្ភ​សម្រាប់ទីផ្សារហិរញ្ញវត្ថុ អំពីចំនួនទឹកប្រាក់ដ៏ច្រើនដែលត្រូវការដើម្បី​ចំណាយផងដែរ។

កញ្ចប់​ជំរុញ​សេដ្ឋកិច្ច​នេះ ​រួមមាន​ការចំណាយ​របស់​រដ្ឋាភិបាល​ ១៧,៧ ​ទ្រី​លាន​យ៉េន (​ខ្ពស់ជាង ១៣,៩ ​ទ្រីលាន​យ៉េន កាលពីឆ្នាំមុន​) បូក​រួម​ទាំង​ការកាត់បន្ថយ​ពន្ធ​ចំនួន ២,៧ ​ទ្រី​លាន​យ៉េន។

បើតាមរ៉យទ័រ កញ្ចប់់ថវិកាដដែលនឹង​មាន​ប្រភព​ពីចំំណូលពន្ធ​ និង​ការ​ចេញ​មូលបត្រ​រដ្ឋាភិបាល​បន្ថែម​ទៀត​របស់់រដ្ឋាភិបាល។ ប្រភព​បាន​​និយាយ​ថា ការ​ចេញ​មូលបត្រ​ថ្មី​នឹង​មាន​ចំនួន ៦,៦៩ ទ្រីលាន​​​យ៉េន ​ច្រើន​ជាង​ឆ្នាំមុន​។ ​

កញ្ចប់ថវិកាជំរុញសេដ្ឋកិច្ច នឹ​ងត្រូវ​បែងចែក​ ១១,៧ ​ទ្រីលានដុល្លារសម្រាប់វិធានការទប់ស្កាត់​កំណើន​តម្លៃទំនិញ និងជំរុញការប្រើប្រាស់។ ថវិកាបន្ថែមចំនួន ៧,២ ​ទ្រីលានដុល្លារទៀត នឹងត្រូវប្រើប្រាស់សម្រាប់ការគ្រប់គ្រងវិបត្តិ និងវិស័យដែលត្រូវបានចាត់ទុកថាមានសារៈសំខាន់ចំពោះសន្តិសុខសេដ្ឋកិច្ច។ ​

គួរគូសបញ្ជាក់ថា លោកស្រី Takaichi បានសន្យាថានឹងបង្កើតកញ្ចប់ចំណាយដ៏ធំមួយ ដើម្បី​ជួបពលរដ្ឋ​ក្នុងការកាត់បន្ថយការចំណាយលើការរស់នៅ និងជំរុញការវិនិយោគ ចាប់តាំងពីចូលកាន់តំណែងកាលពីខែមុនមក​។ រដ្ឋបាលរបស់លោកស្រី ក៏បានសន្យាថានឹងលើកកម្ពស់ការវិនិយោគ​ក្នុងឧស្សាហកម្មផ្សេងៗ​ដូចជា បញ្ញាសិប្បនិម្មិត បន្ទះឈីប​ និងការសាងសង់កប៉ាល់ផងដែរ​៕