សេដ្ឋកិច្ច

រដ្ឋមន្ត្រីឧស្សាហកម្ម លើកទឹកចិត្តឱ្យក្រុមហ៊ុន តូយូតា បន្តពង្រឹងការផ្សារភ្ជាប់ខ្សែច្រវាក់ផលិតកម្ម

បានផុស

២២ វិនាទី មុន

នៅ

ថ្ងៃសុក្រ ៥ មិថុនា ២០២៦

ដោយ

លោក ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានលើកទឹកចិត្តឱ្យក្រុមហ៊ុន Toyota បន្តពង្រឹងការផ្សារភ្ជាប់ខ្សែច្រវាក់ផលិតកម្មរបស់ខ្លួន ជាមួយសហគ្រាសធុនតូច និងមធ្យមក្នុងស្រុក ជាពិសេសសិក្សាលទ្ធភាពប្រើប្រាស់គ្រឿងបន្លាស់ និងសម្ភារដែលផលិតដោយក្រុមហ៊ុនខ្មែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោករដ្ឋមន្ត្រី ហែម វណ្ណឌី បានលើកឡើងក្នុងពេលជួបជាមួយតំណាងក្រុមហ៊ុន និងរោងចក្រ Toyota នៅកម្ពុជា នៅថ្ងៃទី ០៤ មិថុនា ២០២៦។

តំណាងក្រុមហ៊ុនបានរាយការណ៍ថា ក្រុមហ៊ុនតូយូតាបានចាប់ផ្តើមផលិតរថយន្តម៉ូដែល Hilux និង Fortuner ក្រោមស្លាក “ផលិតនៅកម្ពុជា” ចាប់តាំងពីឆ្នាំ២០២៤ មក។

ក្រុមហ៊ុនក៏បានបង្ហាញកំណើននៃការផលិតគួរឱ្យកត់សម្គាល់ពី ២៧ គ្រឿងក្នុងមួយខែ នៅពេលសម្ពោធរោងចក្រកាលពី២ឆ្នាំមុន រហូតដល់បច្ចុប្បន្ន ផលិតជាង ៤០០ គ្រឿងក្នុងមួយខែ។

បុគ្គលិករបស់ក្រុមហ៊ុនប្រមាណ ៧៧% គឺជាសិស្សបញ្ចប់ការសិក្សាពីគ្រឹះស្ថានបណ្តុះបណ្តាលបច្ចេកទេស និងវិជ្ជាជីវៈ (TVET)។

ការលើកទឹកចិត្តរបស់រាជរដ្ឋាភិបាលក៏បានជួយបង្កើនភាពប្រកួតប្រជែងនៃរថយន្តតូយូតាដំឡើងនៅកម្ពុជា និងបានជំរុញកំណើនលក់របស់ក្រុមហ៊ុនផងដែរ។

លោក ហែម វណ្ណឌី មានប្រសាសន៍ថាជា នេះជា ជោគជ័យរបស់ក្រុមហ៊ុន និងឆ្លុះបញ្ចាំងពីកិច្ចសហការល្អរវាងផ្នែកឯកជន និងរាជរដ្ឋាភិបាល ក្នុងការជំរុញផលិតកម្មក្នុងស្រុក ការអនុវត្តស្តង់ដារ និងការអភិវឌ្ឍវិស័យឧស្សាហកម្មនៅកម្ពុជា។

លោករដ្ឋមន្ត្រីបានណែនាំឱ្យក្រុមហ៊ុនពង្រឹងការណែនាំដល់អតិថិជនអំពីសុវត្ថិភាព ការថែទាំរថយន្ត និងការប្រើប្រាស់មុខងារទំនើបៗ ដោយផលិតជាវីដេអូអប់រំខ្លីៗ និងបណ្តាញឌីជីថល ព្រមទាំងបន្តកិច្ចសហការជាមួយវិទ្យាស្ថានស្តង់ដារកម្ពុជា ដើម្បីពង្រឹងស្តង់ដារ និងគុណភាពក្នុងវិស័យយានយន្ត។

តំណាងក្រុមហ៊ុន Toyota បានបង្ហាញការប្តេជ្ញាចិត្តក្នុងការបន្តកិច្ចសហការជាមួយសហគ្រាសក្នុងស្រុក ដៃគូផ្តល់សេវាកម្មនៅតាមបណ្តារាជធានី ខេត្ត និងស្ថាប័នពាក់ព័ន្ធរបស់រាជរដ្ឋាភិបាល ដើម្បីអភិវឌ្ឍធនធានមនុស្ស និងពង្រឹងប្រព័ន្ធអេកូឡូស៊ីនៃឧស្សាហកម្មយានយន្តនៅកម្ពុជា៕