NBC៖ ច្ចេកវិទ្យាហិរញ្ញវត្ថុបានដើរតួនាទីយ៉ាងសំខាន់ក្នុងការអភិវឌ្ឍសេដ្ឋកិច្ចឌីជីថលនៅកម្ពុជា

ភ្នំពេញ៖ទេសាភិបាលធនាគារជាតិនៃកម្ពុជា(NBC) លោកជំទាវ​ ជា សិរី បាន ថ្លែងថា ច្ចេកវិទ្យាហិរញ្ញវត្ថុបានដើរតួនាទីយ៉ាងសំខាន់ ក្នុងការជំរុញនិរន្តរភាពហិរញ្ញវត្ថុ ព្រមទាំងការអភិវឌ្ឍប្រព័ន្ធទូទាត់នៅកម្ពុជា ជាពិសេសបានរួមចំណែក​ក្នុងការអភិវឌ្ឍសេដ្ឋកិច្ចឌីជីថល និងកាត់បន្ថយការចំណាយក្នុងការផ្ទេរប្រាក់របស់ប្រជាជន។

ការថ្លែងរបស់លោកជំទាវ​ ជា សិរីធ្វើឡើងនៅពេលដែលលោកស្រីបានអញ្ជើញចូលរួមជាវាគ្មិនកិត្តិយស ក្នុងវេទិកាពិភាក្សាក្រោមប្រធានបទ «មូលធនប្រកបដោយចីរភាព៖ ហិរញ្ញវត្ថុដែលគិតគូរពីបរិស្ថាន» កាលពីថ្ងៃទី៦ ខែឧសភា ឆ្នាំ២០២៤ នៅទីក្រុងឌុយបៃ នៃប្រទេសអេមីរ៉ាតអារ៉ាប់រួម។

វេទិកាពិភាក្សានេះត្រូវបានរៀបចំជាកម្មវិធីពិសេសមួយ នៃកិច្ចប្រជុំកំពូលបច្ចេកវិទ្យាហិរញ្ញវត្ថុឌុយបៃ Dubai Fintech Summit ក្នុងគោលបំណងពិភាក្សានិងចែករំលែកទស្សនៈ ទាក់ទងនឹងតួនាទីរបស់ធនាគារកណ្តាល និងបច្ចេកវិទ្យាហិរញ្ញវត្ថុ ក្នុងការចូលរួមចំណែកលើកកម្ពស់បរិស្ថានបៃតង។

កិច្ចប្រជុំកំពូលបច្ចេកវិទ្យាហិរញ្ញវត្ថុឌុយបៃនេះ បានប្រព្រឹត្តិទៅរយៈពេលពីរថ្ងៃ គឺថ្ងៃទី៦-៧ ខែឧសភា ឆ្នាំ២០២៤ ដោយមានអ្នកចូលរួមប្រមាណ ១.០០០ រូបជាអ្នកតាក់តែងគោលនយោបាយ វិនិយោគិន សាស្រ្តាចារ្យ អ្នកស្រាវជ្រាវ និងអ្នកសារព័ត៌មាន ដែលមកពីប្រទេសជាង ១០០ ទូទាំងពិភពលោក។

លោកជំទាវបានលើកឡើងថា៖« តួនាទីដ៏សំខាន់នៃបច្ចេកវិទ្យាហិរញ្ញវត្ថុ ក្នុងការជំរុញនិរន្តរភាពហិរញ្ញវត្ថុ ព្រមទាំងការអភិវឌ្ឍប្រព័ន្ធទូទាត់នៅកម្ពុជា ដែលបានរួមចំណែកយ៉ាងសំខាន់ក្នុងការអភិវឌ្ឍសេដ្ឋកិច្ចឌីជីថល និងកាត់បន្ថយការចំណាយក្នុងការផ្ទេរប្រាក់របស់ប្រជាជន»។

លើសពីនេះ លោកជំទាវបានចែករំលែកបទពិសោធន៍នៃការវិនិយោគទុនបម្រុងអន្តរជាតិរបស់ ធនាគារជាតិនៃកម្ពុជា លើសញ្ញាប័ណ្ណបៃតង និងសញ្ញាប័ណ្ណដែលពាក់ព័ន្ធនឹងបរិស្ថាន សង្គម និងអភិបាលកិច្ច (ESG) ដែលត្រូវបានបោះផ្សាយដោយស្ថាប័នហិរញ្ញវត្ថុអន្តរជាតិធំៗ សំដៅរួមចំណែកក្នុងការលើកកម្ពស់បរិស្ថាន។

យោងតាមរបាយការន៍របស់NBC ​ កាលពីឆ្នាំ២០២៣ កម្ពុជាមានប្រតិបត្តិការឌីជីថលចំនួន ១,៨ ពាន់លានរៀល និងដុល្លារអាមេរិកមានតម្លៃ ៤៩២ពាន់លានដុល្លារ​ ​កើនឡើងជាង ៦០០ លានពីប្រតិបត្តិការចំនួន ១,១ ពាន់លាននៅឆ្នាំ ២០២២។​​​ តម្លៃសរុបនៃប្រតិបត្តិការដែលបានកើនឡើងពី ៤០០ពាន់លានដុល្លារក្នុងឆ្នាំ ២០២២ គឺស្មើនឹង ១៦ដងនៃផលិតផលក្នុងស្រុកសរុប (GDP) ។

ក្នុង​ចំណោម​ប្រព័ន្ធ​ទូទាត់​មាន​គណនី​ចំនួន ២៧,៦ លាន​ដែល​ប្រើប្រាស់​ប្រព័ន្ធ​បាគង ​។ គិតដំណាច់ឆ្នាំ ២០២៣ អតិថិជនអាចប្រើប្រាស់សេវាកម្មនេះ ដើម្បីទូទាត់ប្រាក់នៅហាង និងសេវាកម្មជាង ២,៩ លាន៕