សេដ្ឋកិច្ច

តម្លៃលុយប៉េសូហ្វីលីពីនទល់នឹងដុល្លារ ធ្លាក់ចុះដល់កម្រិតទាបបំផុតក្នុងរយៈពេល ១៨ ខែ

បានផុស

២ years មុន

នៅ

ថ្ងៃអង្គារ ២១ ឧសភា ២០២៤

ដោយ

ប្រាក់ប៉េសូរបស់ហ្វីលីពីន បានធ្លាក់ចុះដល់ចំណុចទាបបំផុតធៀបនឹងប្រាក់ដុល្លារ បើរាប់ចាប់តាំងពីខែវិច្ឆិកា ឆ្នាំ ២០២២ មក ខណៈធនាគារកណ្តាលរបស់ប្រទេសនេះងាកចេញពីគោលនយោបាយរូបិយវត្ថុតឹងរ៉ឹង។ នេះបើតាមការចុះផ្សាយរបស់កាសែត Nikkei Asia។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រាក់ប៉េសូបានធ្លាក់ចុះដល់ ៥៨,១៣/ដុល្លារ នៅថ្ងៃអង្គារនេះ ដោយវាធ្លាក់ចុះហួសកម្រិតទាបបំផុត ៥៧,៩៥/ដុល្លារ កាលពីថ្ងៃទី ២៥ ខែមេសា។

ទេសាភិបាលធនាគារកណ្តាលហ្វីលីពីន លោក Eli Remolona បាននិយាយ បន្ទាប់ពីប្រកាសរក្សាគោលនយោបាយអត្រាការប្រាក់របស់ធនាគារឱ្យនៅថេរកាលពីថ្ងៃព្រហស្បតិ៍ សប្ដាហ៍មុនថា៖ «យើងមានភាពតឹងរ៉ឹងតិចជាងមុន»។ លោកបន្តថា ការកាត់បន្ថយអត្រាការប្រាក់ អាចនឹងធ្វើឡើងនៅខែសីហា ខាងមុខ។

គួរកត់សម្គាល់ផងដែរថា តម្លៃប្រាក់ដុល្លាររឹងមាំ ក៏ជាកត្តារួមចំណែកដល់ការធ្លាក់ចុះប្រាក់ប៉េសូផងដែរ។ ការធ្លាក់ចុះនេះប្រហែលមិនបង្កជាបញ្ហាទេ ដរាបណាហ្វីលីពីនអាចគ្រប់គ្រងអតិផរណារបស់ខ្លួនបាន។ កាលពីខែមេសាកន្លងទៅ អតិផរណារបស់ប្រទេសកោះនេះ ស្ថិតនៅ ៣,៨ ភាគរយ ដោយទាបជាងឆ្ងាយពីអត្រា ៦,៦ ភាគរយ ក្នុងខែមេសា ឆ្នាំមុន។ យ៉ាងណាមិញ វាខ្ពស់ជាងអត្រា ៣,៧ ភាគរយនៅខែមីនា។

ជាមួយគ្នានេះ ធនាគារកណ្ដាលបានបន្ទាបការព្យាករណ៍អតិផរណាសម្រាប់ឆ្នាំ ២០២៤ មកត្រឹម ៣,៨ ភាគរយ ពី ៤ ភាគរយ ខណៈបង្កើនការព្យាករណ៍សម្រាប់ឆ្នាំ ២០២៥ពី ៣,៥ ភាគរយ ទៅ ៣,៧ ភាគរយ។ តួលេខទាំងនេះ ស្ថិតនៅក្នុងគោលដៅចន្លោះ ២ ទៅ ៤ ភាគរយរបស់ធនាគារកណ្ដាល៕

Related Topics: