សេដ្ឋកិច្ច

ថៃ និងឡាវ ត្រៀមបើកដំណើរការផ្លូវរថភ្លើងបាងកក-វៀងចន្ទន៍

បានផុស

២ years មុន

នៅ

ថ្ងៃអង្គារ ១១ មិថុនា ២០២៤

ដោយ

ប្រទេសថៃ និងឡាវបានត្រៀមខ្លួនរួចជាស្រេចក្នុងការសម្ពោធបណ្តាញផ្លូវដែកថ្មីមួយ ដែលតភ្ជាប់ទីក្រុងបាងកក និងទីក្រុងវៀងចន្ទន៍ ដោយដំណើរការសាកល្បងគ្រោងនឹងធ្វើឡើងនៅថ្ងៃ ១៣-១៤ ខែមិថុនានេះ តាមការប្រកាសរបស់ប្រតិបត្តិករផ្លូវដែករដ្ឋថៃ (SRT)។ នេះបើតាមការចុះផ្សាយរបស់សារព័ត៌មានក្នុងស្រុក The Thaiger។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ផ្លូវដែកថ្មីនេះ ត្រូវបានកសាងឡើងដើម្បីកែលម្អការតភ្ជាប់សម្រាប់អ្នកធ្វើដំណើរ និងសម្រួលដល់ការដឹកជញ្ជូនទំនិញរវាងប្រទេសទាំង២ ដោយធ្វើឱ្យថៃក្លាយជាមជ្ឈមណ្ឌលដឹកជញ្ជូនដ៏សំខាន់ក្នុងតំបន់។ វានឹងតភ្ជាប់ពីស្ថានីយ៍រថភ្លើងក្រុងបាងកក Krung Thep Aphiwat និងស្ថានីយ៍ក្រុងវៀងចន្ទន៍ Khamsavath។

មន្រ្តី SRT បានឱ្យដឹងថា អនុរដ្ឋមន្ត្រីក្រសួងដឹកជញ្ជូនថៃ លោក Surapong Piyachote បានសង្កត់ធ្ងន់លើតម្រូវការនៃការរៀបចំខ្លួនឱ្យបានហ្មត់ចត់របស់ SRT សម្រាប់ការបើកដំណើរការជាផ្លូវការនៃផ្លូវដែកថ្មី ដែលគ្រោងនឹងធ្វើឡើងនៅខែក្រោយ។

បើតាមមន្រ្តី SRT អភិបាលរង SRT លោក Awirut Thongnet និងនាយកគ្រប់គ្រងផ្លូវដែកជាតិឡាវ លោក Daochinda Siharath បានជួបប្រជុំគ្នាកាលពីសប្ដាហ៍ដើមខែ ដើម្បីបញ្ចប់ព័ត៌មានលម្អិតសម្រាប់សេវាកម្មរថភ្លើង។

កិច្ចពិភាក្សារវាងភាគីទាំង២ ក៏បានគ្របដណ្តប់លើការអភិវឌ្ឍន៍ទីផ្សារទេសចរណ៍ ការផ្សាយពាណិជ្ជកម្ម ទំនាក់ទំនងសាធារណៈ និងយុទ្ធសាស្រ្តក្នុងការលើកកម្ពស់ការដឹកជញ្ជូនទំនិញរវាងប្រទេសថៃ ឡាវ និងប្រទេសចិនផងដែរ។

គួរគូសបញ្ជាក់ថា ប្រទេសថៃ និងឡាវបានព្រមព្រៀងគ្នាជំរុញការអភិវឌ្ឍន៍ហេដ្ឋារចនាសម្ព័ន្ធសាធារណៈរវាងប្រទេសទាំង២ ដើម្បីគាំទ្រការតភ្ជាប់ និងការដឹកជញ្ជូន។ ក្រៅតែពីផ្លូវដែក ស្ពានចំនួន ៥ នៅលើទន្លេមេគង្គភ្ជាប់ពីត្រើយម្ខាងទៅត្រើយម្ខាងនៃប្រទេសទាំង២ ត្រូវបានសាងសង់ឡើង ហើយរដ្ឋាភិបាលទាំង២កំពុងសិក្សាលើគំរោងស្ពានភ្ជាប់ទី៦ថ្មី៕

Related Topics: