សេដ្ឋកិច្ច

អាមេរិកពិន័យក្រុមហ៊ុនអាកាសចរណ៍ Emirates ១,៥ លានដុល្លារ ចំពោះការហោះហើរក្នុងដែនអាកាសហាមឃាត់

បានផុស

២ years មុន

នៅ

ថ្ងៃសុក្រ ១៤ មិថុនា ២០២៤

ដោយ

ក្រសួងដឹកជញ្ជូនរបស់សហរដ្ឋអាមេរិក បាននិយាយកាលពីថ្ងៃព្រហស្បតិ៍ថា ខ្លួនបានពិន័យក្រុមហ៊ុនអាកាសចរណ៍ Emirates ចំនួន ១,៥ លានដុល្លារ សម្រាប់ប្រតិបត្តិការហោះហើរ ដោយប្រើកូដបញ្ជាក់អត្តសញ្ញាណរបស់ក្រុមហ៊ុនអាកាសចរណ៍ JetBlue Airways ក្នុងដែនអាកាសហាមឃាត់។ នេះបើតាមការរាយការណ៍របស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងបានឱ្យដឹងថា នៅចន្លោះខែធ្នូ ឆ្នាំ ២០២១ ដល់ខែសីហា ឆ្នាំ ២០២២ ក្រុមហ៊ុន Emirates បានប្រើកូដបញ្ជាក់អត្តសញ្ញាណរបស់ក្រុមហ៊ុនអាកាសចរណ៍ JetBlue Airways សម្រាប់ប្រតិបត្តិការជើងហោះហើររវាងអារ៉ាប់រួម និងសហរដ្ឋអាមេរិក នៅក្នុងដែនអាកាសដែលរដ្ឋបាលអាកាសចរណ៍សហព័ន្ធ (FAA) ហាមឃាត់សម្រាប់ប្រតិបត្តិករអាមេរិក។

ការប្រព្រឹត្តនេះ ក៏បានរំលោភលើកិច្ចព្រមព្រៀងខែតុលា ឆ្នាំ ២០២០ ដែលមានក្នុងការផាកពិន័យក្រុមហ៊ុន Emirates សម្រាប់ប្រតិបត្តិការជើងហោះហើរផ្សេងទៀតក្នុងដែនអាកាសហាមឃាត់របស់ FAA ផងដែរ។

ក្រុមហ៊ុន Emirates ទទួលបានបញ្ជាឱ្យបង់ប្រាក់ចំនួន ២០០ ០០០ ដុល្លារ ក្នុងបញ្ជាឆ្នាំ ២០២០ និង ២០០ ០០០ ដុល្លារទៀត ប្រសិនបើក្រុមហ៊ុននេះរំលោភលើការបញ្ជាក្នុងរយៈពេល១ឆ្នាំ។

ទាំងក្រុមហ៊ុន JetBlue និងក្រុមហ៊ុន Emirates ដែលប្រើកូដរួមគ្នាមុនបញ្ចប់នៅឆ្នាំ ២០២២ មិនទាន់ចេញប្រតិកម្មយ៉ាងណាទេ ជុំវិញការផាកពិន័យចុងក្រោយនេះ។

ក្រសួងដឹកជញ្ជូនបានគូសបញ្ជាក់ថា ជើងហោះហើរជាប់ចោទ បានហើរកាត់ «តំបន់ព័ត៌មានជើងហោះហើរ» ទីក្រុងបាកដាដ ក្រោមកម្ពស់កំណត់ ដែល FAA បានហាមឃាត់ក្រុមហ៊ុនអាកាសចរណ៍អាមេរិកទាំងអស់ ប្រតិបត្តិករហោះហើរសម្រាប់ពាណិជ្ជកម្មអាមេរិកទាំងអស់ និងគ្រប់ទាំងកូដបញ្ជាក់អត្តសញ្ញាណសម្រាប់ប្រតិបត្តិការរួមទាំងអស់ ដែលគ្មានការអនុញ្ញាតពិសេស។

ក្រុមហ៊ុន Emirates អាចប្រឈមនឹងការផាកពិន័យ ៣០០ ០០០ ដុល្លារទៀត ប្រសិនបើហ៊ានបំពានច្បាប់នេះម្ដងទៀតក្នុងរយៈពេល១ឆ្នាំ។

យ៉ាងណាមិញ ក្រុមហ៊ុន Emirates បានប្រកែកប្រាប់ក្រសួងដឹកជញ្ជូនអាមេរិកថា ខ្លួនផ្តល់អាទិភាពដល់សុវត្ថិភាពរបស់អ្នកដំណើរ បុគ្គលិក និងប្រតិបត្តិករដែនអាកាសផ្សេងទៀត ដោយបន្ថែមថា ជើងហោះហើររបស់ខ្លួនហោះហើរក្រោមកម្រិតអនុញ្ញាត តាម «ការណែនាំផ្ទាល់ពីអ្នកត្រួតពិនិត្យចរាចរណ៍ផ្លូវអាកាសដែលពាក់ព័ន្ធ» ដើម្បីជៀសវាងការប៉ះទង្គិចគ្នា។

បើតាមក្រសួង ក្រុមហ៊ុននេះបន្តថា អាកាសយានិក Emirates បានអះអាងថា អ្នកបើកយន្តហោះមានកាតព្វកិច្ចស្របច្បាប់ក្នុងការធ្វើតាមការណែនាំរបស់អ្នកគ្រប់គ្រងចរាចរណ៍ផ្លូវអាកាសដែលពាក់ព័ន្ធ ព្រោះថាការមិនធ្វើតាមការណែនាំបែបនេះ នឹងមានផលប៉ះពាល់ដល់សុវត្ថិភាពយ៉ាងខ្លាំង៕

Related Topics: