សេដ្ឋកិច្ច

ចិនព្រមានពីលទ្ធភាព «សង្រ្គាមពាណិជ្ជកម្ម» ជាមួយសហភាពអឺរ៉ុប

បានផុស

២ years មុន

នៅ

ថ្ងៃសៅរ៍ ២២ មិថុនា ២០២៤

ដោយ

ទីក្រុងប៉េកាំងបានព្រមានកាលពីថ្ងៃសុក្រថា ការកើនឡើងភាពតានតឹងនៃជម្លោះពាណិជ្ជកម្មជាមួយសហភាពអឺរ៉ុប ពាក់ព័ន្ធនឹងការបន្ថែមពន្ធលើរថយន្តអគ្គិសនីចិន អាចធ្វើឱ្យភាគីទាំង២ធ្លាក់ចូលទៅក្នុង «សង្រ្គាមពាណិជ្ជកម្ម»។ នេះបើតាមការផ្សាយរបស់ទីភ្នាក់ងារសារព័ត៌មានរ៉យទ័រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការព្រមានរបស់ចិន ធ្វើឡើងខណៈរដ្ឋមន្ត្រីសេដ្ឋកិច្ចរបស់ប្រទេសអាល្លឺម៉ង់ ធ្វើដំណើរទស្សនកិច្ចទៅទីក្រុងប៉េកាំង ដោយគ្រោងពិភាក្សាគ្នាលើភាពតានតឹងចុងក្រោយ ដែលអាចប៉ះពាល់ធ្ងន់ធ្ងរដល់ជំនួយអាល្លឺម៉ង់ ប្រសិនបើចិនឆ្លើយតបកាន់តែធ្ងន់ធ្ងរ។

អ្នកនាំពាក្យក្រសួងពាណិជ្ជកម្មចិន និយាយក្នុងសេចក្តីថ្លែងការណ៍មួយថា៖ «ភាគីអឺរ៉ុបបន្តបង្កើនការប៉ះទង្គិចពាណិជ្ជកម្ម ហើយអាចបង្កឲ្យមានសង្គ្រាមពាណិជ្ជកម្ម។ ទំនួលខុសត្រូវ គឺស្ថិតនៅលើភាគីអឺរ៉ុបទាំងស្រុង»។

ក្រសួងបានបន្តថា តាមរយៈការស៊ើបការលក់បង្ខូចតម្លៃ ភាគីអឺរ៉ុបបាន «បំភិតបំភ័យ និងបង្ខិតបង្ខំសហគ្រាសចិន គំរាមកំហែងអនុវត្តអត្រាពន្ធខ្ពស់ជាមួយនឹងការផាកពិន័យ និងទាមទារព័ត៌មានហួសហេតុ»។

គួរគូសបញ្ជាក់ថា មុនប្រកាសវិធានការតម្លើងពន្ធ អឺរ៉ុបបានបើកការស៊ើបអង្កេត ហើយរកឃើញថា ក្រុមហ៊ុនចិនលក់រថយន្តអគ្គិសនីរបស់ខ្លួនថោក ដោយសារទទួលបានការឧបត្ថម្ភធនពីរដ្ឋាភិបាល។ រដ្ឋាភិបាលចិនបានព្រមានថា ខ្លួននឹងចាត់វិធានការឆ្លើយតប និងធ្វើគ្រប់យ៉ាងដើម្បីការពារផលប្រយោជន៍ស្របច្បាប់របស់ខ្លួន។

ខណៈភាពតានតឹងបន្ត ក្រុមហ៊ុនផលិតរថយន្តក្នុងស្រុកចិន បានអំពាវនាវឱ្យរដ្ឋាភិបាលវាយបកអឺរ៉ុប ដោយការដំឡើងពន្ធលើរថយន្តស៊ីសាំងអឺរ៉ុប ដែលការណ៍នេះអាចនឹងប៉ះពាល់ខ្លាំងដល់អាល្លឺម៉ង់ ដែលមានជំនួញរថយន្តច្រើនជាងគេជាមួយចិន៕

Related Topics: