ពាណិជ្ជកម្មទ្វេភាគីកម្ពុជា-វៀតណាមសម្រេចបានទឹកប្រាក់ជាង $៥,២៣ ពាន់លាន

គិតចាប់ពីខែមករា ដល់ខែសីហា ឆ្នាំ ២០២៤ ​កម្ពុជាការដោះដូរពាណិជ្ជកម្មទ្វេភាគីកម្ពុជា-វៀត​ណាមសម្រេចបានទឹកប្រាក់ ៥,២៣ ពាន់លានដុល្លារ កើនឡើង ២១,៦ ភាគរយ។ នេះបើយោងតាម របាយការណ៍របស់អគ្គនាយកដ្ឋានគយ និងរដ្ឋាករ​កម្ពុជា​(GDCE)​។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តារាងទិន្នន័យរបស់ GDCE បង្ហាញថា ការនាំ​ចេញរបស់កម្ពុជាសម្រេចបានទឹកប្រាក់ ២,៤៦ ពាន់លានដុល្លារ កើន ៣៣ ភាគរយ។ ចំណែកទំនិញវៀតណាមនាំចូលមកកម្ពុជាវិញ មានទំហំទឹកប្រាក់ ២,៧៦ ពាន់លាន​ដុល្លារ កើន ១៣ ភាគរយ។

លោក សំហេង បូរ៉ា រដ្ឋលេខាធិការក្រសួងពាណិជ្ជកម្ម មានប្រសាសន៍ថា ​ស្ថានភាពវិស័យ​ពាណិជ្ជកម្មទ្វេភាគីរវាងកម្ពុជា-វៀតណាម មានភាពល្អប្រសើរ និងប្រទាក់ក្រឡាស៊ីជម្រៅ។

មន្ត្រីដដែលរូបនេះបញ្ជាក់ថា កម្ពុជា និងវៀតណាម អាចនាំចេញផលិតផលមួយចំនួនទៀតផងដែរ លើសពីការផ្តល់ឱ្យគ្នាទៅវិញទៅមក ក្រោមក្របខ័ណ្ឌកិច្ចព្រមព្រៀងស្តីពីពាណិជ្ជ​កម្មទំនិញ​អាស៊ាន តាមរយៈកិច្ចសម្របសម្រួលជំរុញពាណិជ្ជកម្មទ្វេភាគីកម្ពុជា-វៀតណាម ដែលត្រូវបាន​ចុះ​ហត្ថ​លេខាផ្លូវការជាទៀងទាត់ក្នុងរយៈពេល២ឆ្នាំម្តង។

លោកបណ្ឌិត ឆេង គឹមឡុង ប្រធានវិទ្យាស្ថានចក្ខុវិស័យអាស៊ី (AVI) ប្រាប់កម្ពុជាថ្មីថា សេដ្ឋកិច្ច​វៀតណាមមានការរីកច្រើនយ៉ាងឆាប់រហ័ស ហើយ​កិច្ចព្រមព្រៀងពាណិជ្ជកម្មសេរីជាមួយ​សហគន៍​អឺរ៉ុប​កាលពីពេលថ្មីៗនេះ និងការធ្វើឱ្យទំនាក់ទំនងកាន់តែស៊ី​ជម្រៅជាមួយ​ប្រទេសជាច្រើន នៅចំពេលដែលអាមេរិក និងអឺរ៉ុបមានវិធានការរឹតបន្តឹងផ្នែក សេដ្ឋកិច្ចប្រឆាំង​​ចិន​ដែលផ្ដល់ផលចំណេញ​ទៅវៀតណាម។

លោកបញ្ជាក់ថា ពាណិជ្ជកម្មសេរីអាស៊ាន និង RCEP ក៏បានជំរុញពាណិជ្ជកម្មរវាងកម្ពុជា-វៀតណាមផងដែរ នេះមានន័យថា ប្រាក់ចំណូលកើនឡើង និងកម្រិតនៃការប្រើប្រាស់ក្នុងស្រុកក៏កើន រួមជាមួយនឹងតម្រូវការច្រើនជាងមុនសម្រាប់ការនាំចេញរបស់វៀតណាម ដែល ធ្វើឱ្យការនាំចេញរបស់កម្ពុជាទៅវៀតណាមកើនឡើងដើម្បីបំពេញតម្រូវការទាំងនោះ។

ផលិតផល​សំខាន់ៗ ​ដែល​កម្ពុជា នាំទៅ​វៀតណាម រួមមាន​ដូចជា ស្រូវ​ កៅស៊ូ ស្វាយចន្ទី ដំឡូងមី ពោត ចេក ស្វាយ ថ្នាំជក់ចំណែក​វៀតណាម​ នាំមក​វិញ មានដូចជា សម្ភារ​សំណង់ គ្រឿង​ម៉ាស៊ីន ប្រេងឥន្ធនៈ ខ​បក​រណ៍​អេឡិចត្រូនិក​-​អគ្គិសនី ជី​កសិកម្ម គ្រឿងទេស និង​បន្លែ ផ្លែឈើ ជាដើម​៕

អត្ថបទ៖ ឡេង ដេត