ព័ត៌មានអន្ដរជាតិ

អត្រាអត់ការងារធ្វើរបស់យុវជនចិន កើនឡើងដល់កម្រិតខ្ពស់ថ្មី

បានផុស

១ ម៉ោង មុន

នៅ

ថ្ងៃចន្ទ ២៣ កញ្ញា ២០២៤

ដោយ

អត្រាអត់ការងារធ្វើរបស់យុវជនក្នុងប្រទេសចិន បានកើនឡើងដល់កម្រិតខ្ពស់បំផុតថ្មី រាប់តាំងពីចិនផ្លាស់ប្ដូរវិធីកំណត់ភាពអត់ការងារធ្វើឆ្នាំមុន ចំពេលដែលសេដ្ឋកិច្ចចិនបន្តស្ថិតនៅក្នុងស្ថានភាពអាប់អួរ ដោយផលិតកម្មធ្លាក់ចុះ និងតម្រូវការខ្សោយ។ នេះបើតាមការចុះផ្សាយរបស់កាសែត South China Morning Post។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការិយាល័យស្ថិតិជាតិចិន បានឱ្យដឹងកាលពីថ្ងៃសុក្រសប្ដាហ៍មុនថា អត្រាអត់ការងារធ្វើសម្រាប់ក្រុមប្រជាជនអាយុ ១៦-២៤ ឆ្នាំ ដោយមិនរាប់បញ្ជូលសិស្ស បានកើនឡើងដល់ ១៨,៨ ភាគរយ នៅខែសីហា ពោលគឺកើនឡើងពី ១៧,១ ភាគរយ ក្នុងខែកក្កដា។

ទន្ទឹមនឹងនេះ អត្រាគ្មានការងារធ្វើសម្រាប់ក្រុមប្រជាជនអាយុ ២៥-២៩ ឆ្នាំ ដោយមិនរាប់បញ្ចូលនិស្សិតមហាវិទ្យាល័យក៏បានកើនឡើងផងដែរ ដល់ ៦,៩ ភាគរយ ក្នុងខែសីហា ៦,៥ ភាគរយ ក្នុងខែកក្កដា។

កាលពីខែធ្នូ ឆ្នាំមុន រដ្ឋាភិបាលចិនបានណែនាំវិធីសាស្រ្តកែប្រែសម្រាប់ការកំណត់ភាពគ្មានការងារធ្វើ ក្រោយផ្អាកការចេញផ្សាយទិន្នន័យភាពអត់ការងារធ្វើរបស់យុវជនកាលពីខែកក្កដា ឆ្នាំមុន។ ក្នុងវិធីសាស្រ្តកំណត់លើកមុន អត្រាអត់ការងារធ្វើសម្រាប់ក្រុមប្រជាជនអាយុ ១៦-២៤ ឆ្នាំ ដែលរាប់បញ្ចូលទាំងសិស្សានុសិស្ស បានឡើងដល់កម្រិតកំពូល ២១,៣ ភាគរយ ក្នុងខែមិថុនា ឆ្នាំមុន។

កំណើននៃអត្រាអត់ការងារធ្វើរបស់យុវជនចិនប្រចាំខែសីហា ត្រូវបានចេញផ្សាយឡើង ខណៈនៅឆ្នាំ ២០២៤ នេះនិស្សិតចិនប្រមាណ ១១,៧៩ លាននាក់ រំពឹងថានឹងបញ្ចប់ការសិក្សាថ្នាក់មហាវិទ្យាល័យ ដែលវាជាចំនួនខ្ពស់បំផុត ដោយនឹងបង្កើនសម្ពាធលើការប្រកួតប្រជែងទីផ្សារការងារក្នុងស្រុក។

បើតាម South China Morning Post ការស្វែងរកការងារសម្រាប់យុវជនក្នុងប្រទេសចិន បានក្លាយជាបញ្ហាអទិភាពមួយសម្រាប់រដ្ឋាភិបាលក្រុងប៉េកាំង ដោយសារតែហានិភ័យនៃប្រាក់ចំណូលទាបរបស់ប្រជាជន បានដាក់សម្ពាធលើតម្រូវការ និងការចំណាយរបស់អ្នកប្រើប្រាស់ ដែលធ្វើឱ្យសេដ្ឋកិច្ចបន្តដើរអូសចូល។ ដោយសារតែការពិបាករកការងារធ្វើ និស្សិតបញ្ចប់ការសិក្សា បានសម្រេចចិត្តបន្តការសិក្សារបស់ខ្លួនទៅកម្រិតខ្ពស់បន្តទៀត៕