តម្លៃប្រេង​ធ្លាក់ចុះតិចតួច ដោយក្ដីបារម្ភសេដ្ឋកិច្ចបន្តជាបន្ទុក

តម្លៃប្រេងឆៅអន្តរជាតិ​បាន​ធ្លាក់ចុះតិចតួច​សម្រាប់ថ្ងៃបើកការជួញដូរប្រចាំសប្ដាហ៍នេះ ដោយកង្វល់ពាក់ព័ន្ធនឹងភាពមិនប្រាកដប្រជានៃសេដ្ឋកិច្ច និងការរំពឹងពីកំណើនផលិតកម្មបន្តជាបន្តុកទម្លាក់តម្លៃ។ នេះបើតាមការចុះផ្សាយរបស់ទីភ្នាក់ងារសារព័ត៌មាន​រ៉យទ័រ។

តម្លៃប្រេងនាពេលអនាគត​ ម៉ាក Brent បានធ្លាក់ចុះ ១៣ សេន ឬ ០,១៩ ​មកត្រឹម ៦៦,៧៤ ដុល្លារ/អោន ​សម្រាប់ការជួញដូរនៅលើទីផ្សារអាស៊ី ត្រឹមរសៀលថ្ងៃចន្ទ។ ចំណែក​ប្រេងឆៅអាមេរិក ម៉ាក West Texas Intermediate (WTI) វិញ បានធ្លាក់ចុះ ១២ សេន ឬ ០,១៩ ភាគរយ ​ដល់ ៦២,៩០ ដុល្លារ/បារ៉ែល។ ​

តម្លៃប្រេងទាំង២ បានធ្លាក់ចុះជាង ១ ភាគរយ ក្នុងអត្រាប្រចាំសប្ដាហ៍ សម្រាប់ការជួញដូរកាលពីសប្ដាហ៍មុន។ អ្នកជំនាញលើកឡើងថា ​សង្រ្គាមពាណិជ្ជកម្មរវាងសហរដ្ឋអាមេរិក និងចិន ដែលបង្កជាកង្វល់ផ្នែកសេដ្ឋកិច្ច កំពុងបន្តគ្របដណ្តប់លើ​ទំនុកចិត្តរបស់​វិនិយោគិន​សម្រាប់ទីផ្សារប្រេង។

ក្រៅពីនេះ​ ភាពស្រពិចស្រពិលនៃការចរចានុយក្លេអ៊ែររវាងសហរដ្ឋអាមេរិក និងអ៊ីរ៉ង់ និង​ការរំពឹងទុកអំពីផែនការបង្កើនផលិតកម្មប្រេងរបស់អង្គការនៃប្រទេស​នាំចេញប្រេងកាត និងសម្ព័ន្ធមិត្ត (OPEC+) ក៏ជាកត្តារួមចំណែកសម្រាប់តម្លៃប្រេងនៅថ្ងៃចន្ទនេះផងដែរ៕