មន្រ្តីជំនាញចុះវាយតម្លៃចុងក្រោយ ត្រៀមលទ្ធភាព​បើក​ដំណើរការអាកាសយានដ្ឋានតេជោថ្ងៃ ១០ កក្កដា

អាកាសយានដ្ឋានអន្តរជាតិតេជោលំដាប់ 4F ដំណាក់កាលទី១ តម្លៃ ១ ៥០០ លានដុល្លារ សម្រេចការសាងសង់ប្រមាណ ៩៦%​​ ខណៈមន្រ្តីជំនាញបានចុះវាយតម្លៃចុងក្រោយ ត្រៀមលទ្ធភាព​បើកដំណើរការអាកាសយានដ្ឋានតេជោថ្ងៃ ១០ កក្កដា ដែលបើកស្វាគមន៍ភ្ញៀវទេសចរជាតិ និងអន្តរជាតិមកពីក្នុងតំបន់ និងសកលលោក។

លោក សយ សុខាន់ រដ្ឋលេខាធិការនៃលេខាធិការដ្ឋានអាកាសចរស៊ីវិលមានប្រសាសន៍ថា បើគ្មាន​អ្វីប្រែប្រួលនោះទេ ព្រលានយន្តហោះអន្តរជាតិតេជោថ្មីនឹងដាក់ឱ្យដំណើរការនៅថ្ងៃទី ១០ ខែកក្កដា ឆ្នាំ ២០២៥ ប៉ុន្តែលោកបញ្ជាក់ថា អ្វីៗស្ថិតនៅក្នុងការត្រួតពិនិត្យពោលគឺគណៈ​កម្មការ​ត្រូវ​ដឹកនាំ​ពិនិត្យ​​វាយ​តម្លៃទៅលើលក្ខខណ្ឌផ្ដល់វិញ្ញាបនបត្រ និងលក្ខខណ្ឌបើកប្រតិបត្តិការថា​តើជា​គោល​ការ​​ណ៍​​​ថា​យកថ្ងៃទី ១០ ខែកក្កដា អាចសម្រេចបានឬយ៉ាងណា។

លោកបានបន្ថែមថា៖« វឌ្ឍនភាពនៃការសាងសង់ស្ទើតែរួចរាល់ ប៉ុន្តែអ្វីដែលយើងនៅ​បន្ត​ពិនិត្យពាក់ព័ន្ធនឹងដំណើរការលើលក្ខខណ្ឌបច្ចេកទេសនៃការផ្ដល់វិញ្ញាបនបត្រ និងលក្ខខណ្ឌ​បច្ចេក​​ទេស​នៃការបើកប្រតិបត្តិការ»។

លោក សយ សុខាន់ បញ្ជាក់ថា លក្ខខណ្ឌទាំងពីរខាងលើគឺលោកបណ្ឌិត ម៉ៅ ហាវណ្ណាល់ រដ្ឋម​ន្ត្រី​​ទទួលបន្ទុក រដ្ឋលេខាធិការដ្ឋានអាកាសចរស៊ីវិល ផ្ដល់ភារកិច្ចនេះ មកគណៈកម្មការ​ដើម្បីវាយ​តម្លៃលើលក្ខខណ្ឌបច្ចេកទេសឱ្យបានច្បាស់លាស់ ហើយនឹងឆ្លើយតបនៅពីរសប្ដាហ៍ក្រោយថា ប្រ​តិ​​​បត្តិការជាក់លាក់ពេលណា។

លោកបានថ្លែងបញ្ជាក់ថា៖ «ឥឡូវនេះ យើងនៅតែឈរលើគោលការណ៍ថ្ងៃ ១០ ខែកក្កដា ដែលយើងបានគ្រោងទុក ក៏ប៉ុន្តែយើងប្រជុំមួយព្រឹកនេះ គឺយើងស្ដាប់របាយការណ៍ យើងឃើញ​ថា ថ្ងៃ ១០ មិនទាន់ច្បាស់លាស់ទេ អញ្ចឹងរដ្ឋម​ន្ត្រី​​បញ្ជាក់ថា លោក នឹងចុះមកពិនិត្យ ២ សប្ដាហ៍​ក្រោយ អញ្ចឹងលោកឱ្យគណៈកម្មការដឹកនាំវាយតម្លៃលើលក្ខខណ្ឌបច្ចេកទេសឱ្យបានច្បាស់លាស់ ដើម្បីជាមូលដ្ឋានសម្រេចចុងក្រោយពីកាលបរិច្ឆេទជាក់លាក់»។

នៅព្រឹកថ្ងៃទី ០២ ខែឧសភា ឆ្នាំ ២០២៥ លោកបណ្ឌិត ម៉ៅ ហាវណ្ណាល់ រដ្ឋម​ន្ត្រី​​ទទួលបន្ទុក រដ្ឋលេខាធិការដ្ឋានអាកាសចរស៊ីវិលបានដឹកនាំក្រុមការងារបច្ចេកទេស ដើម្បីពិនិត្យវឌ្ឍនភាព​គម្រោង​​សាងសង់​អាកាសយានដ្ឋានអន្តរជាតិតេជោ។

អាកាស​យាន​ដ្ឋាន​អន្តរជាតិតេជោ ត្រូវបានជាប់ ឈ្មោះ ជា សំណង់ស្ថាបត្យកម្មដ៏អស្ចារ្យបំផុតមួយក្នុងចំណោម ១១-ស្ថាបត្យកម្មដ៏អស្ចារ្យបំផុតនៅ លើពិភពលោក ដោយដាក់ទីតាំងព្រលានយន្តហោះតេជោ​នៅ​ជួរ​មុខនៃការរចនាប្រកប ដោយភាពច្នៃប្រឌិត និងនិរន្តរភាព។

អាកាសយានដ្ឋានអន្តរជាតិតេជោ នឹងមកជំនួយអាកាសយានដ្ឋាន​អន្តរជាតិភ្នំពេញបច្ចុប្បន្ន ដែលមានសមត្ថភាពបម្រើសេវាកម្មដឹកភ្ញៀវទេសចរណ៍បានរហូតដល់ទៅ ៦ដងលើសព្រលាន​បច្ចុប្បន្ន។

អាកាសយានដ្ឋានអន្តរជាតិតេជោមាន៣ដំណាក់កាល គឺដំណាក់កាលទី១ សាងសង់​រួចរាល់​នៅ​ឆ្នាំ ២០២៥ អាចទទួលអ្នកដំណើរបានប្រមាណ ១៣ លាននាក់ក្នុងមួយឆ្នាំ ដំណាក់​កាល​ទី២ នឹងបញ្ចប់នៅឆ្នាំ ២០៣០ ដែលអាចទទួលបានអ្នកដំណើរប្រមាណជា ៣០ លាន​នាក់​ក្នុងមួយឆ្នាំ និងដំណាក់កាលចុងក្រោយ នឹងបញ្ចប់នៅឆ្នាំ ២០៥០ អាចនឹងទទួល​បានអ្នក​ដំណើរ​រហូត​ដល់ ៥០ លាននាក់ក្នុងមួយឆ្នាំ៕

អត្ថបទ៖ ឡេង ដេត