វៀតណាមបង្រ្កាបអ្នករត់ពន្ធថ្នាំគីមីជ្រលក់ទុរេន​ពី​ថៃ​ ​ខណៈប្រទេសជួបវិបត្តិទុរេន

អាជ្ញាធរខេត្ត Dak Lak នៃប្រទេសវៀតណាម បាន​កសាងសំណុំរឿងបញ្ជូនទៅតុលាការប្រឆាំងនឹង​បុរស ២ នាក់ ដែលរត់ពន្ធថ្នាំគីមី​ជ្រលក់​ទុរេន​ដើម្បី​​បន្ទុំ និង​ការពារ​កុំឱ្យខូច ចេញពីប្រទេសថៃឆ្លងព្រំដែនចូលវៀតណាម ចំពេលដែល​ប្រទេសកំពុងប្រឈមមុខនឹងវិបត្តិទុរេនផ្គត់ផ្គង់លើសតម្រូវការ។ នេះបើតាម​ការចុះផ្សាយរបស់សារព័ត៌មាន​ Dan Tri news។

ជនជាប់ចោទម្នាក់ ឈ្មោះ Nguyen Thai Nguyen មកពីខេត្ត Tien Giang និងម្នាក់ទៀតឈ្មោះ Tran Van Ngo មកពីខេត្ត Hà Tĩnh។ តាមការស៊ើបអង្កេតបឋម ក្នុងឆ្នាំ ២០២២ បុរសជាប់ លោក Nguyen បានពិភាក្សាជាមួយ Ngo អំពីការទិញ និងលក់ថ្នាំជ្រលក់ទុរេន (​បន្ទុំ និងទុកកុំឱ្យខូច​) និងថ្នាំសម្លាប់សត្វល្អិតពី​ថៃទៅកាន់ប្រទេសវៀតណាម ដើម្បីលក់យកប្រាក់ចំណេញ។

អ្នកទាំង២ ត្រូវបានឃាត់ខ្លួននៅខែកក្កដា ឆ្នាំមុន ពេលកំពុងចែកចាយសារធាតុគីមីខុសច្បាប់ក្នុងខេត្ត Dak Lak។ អាជ្ញាធរបានចុះឆែកឆេរទីតាំងរបស់ពួកគេ ដោយរកឃើញនូវ​ប្រអប់សារធាតុគីមីចំនួន ២៩០ ឡាំង ដែលគ្មានតែម ឬលិខិតបញ្ជាក់ត្រឹមត្រូវ ហើយ ២៥៧ ប្រអប់ក្នុងនោះ ត្រូវបានទិញមកពីថៃ។ តាមកំណត់ត្រាគណនីធនាគាររបស់ជនជាប់ចោទ ការជួញដូរនូវសារធាតុគីមីដដែល មាន​ទំហំសរុបរហូតដល់ទៅ ៩៧ ប៊ីលាន​ដុង ឬជាង ៣,៨៨ លាន​ដុល្លារសហរដ្ឋអាមេរិក។ ​​

ការកសាងសំណុំរឿងរបស់អាជ្ញាធរខេត្ត Dak Lak នៅពេលនេះ ធ្វើឡើងចំពេលដែលប្រទេសវៀតណាមប្រឈមមុខនឹងវិបត្តិទុរេន ដែលធ្លាក់ចុះថ្លៃខ្លាំង ខណៈ​ខ្វះឈ្មួញទិញ​ជួញដូរដោយខ្លាចខាតប្រាក់ ដែលបណ្ដាលមកពីការរឹតបន្តឹងការត្រួតពិនិត្យរកសារធាតុគីមីរបស់ចិន។

ខណៈរដូវប្រមូលផលធំខិតចូលមកដល់ សារព័ត៌មាន​វៀតណាមបានរាយការណ៍ថា កសិករនៅតាមបណ្ដាខេត្តនៃតំបន់សណ្តទន្លេមេគង្គ ចាប់ផ្ដើមដាក់លក់ទុរេនតាមផ្លូវក្នុងតម្លៃទាបបំផុតរហូតដល់ ៣០ ០០០ ដុង (១,១៥ ដុល្លារ)/គីឡូក្រាម ដែលជាតម្លៃទាបបំផុតក្នុងរយៈពេល ១០ ឆ្នាំ។

ក្រសួងកសិកម្ម និងបរិស្ថានវៀតណាម ការនាំចេញទុរេនរបស់វៀតណាមទៅចិនបានធ្លាក់ចុះជាគំហុកក្នុងរយៈពេល ៤ ខែ​ដើម​ឆ្នាំ ២០២៥ នេះ។ យោងតាមរបាយការណ៍របស់ក្រសួងកាលពីថ្ងៃព្រហស្បតិ៍ ​ការនាំចេញទុរេនរបស់វៀតណាមទៅ​ចិន បានត្រឹមតែប្រហែល ១២០-១៣០ លាន​ដុល្លារប៉ុណ្ណេះ ចន្លោះពីខែមករា ដល់ខែមេសា ឆ្នាំ ២០២៥ ​ជាមួយ​នឹង​បរិមាណ ៣៥ ០០០ តោន ដែលត្រឹមតែ ២០ ភាគរយ នៃគោលដៅប្រចាំឆ្នាំប៉ុណ្ណោះ។​ ធៀប​នឹងរយៈពេលដូចគ្នាកាលពីឆ្នាំមុន ​វៀតណាមបាន​នាំចេញទុរេនទៅចិនប្រមាណ ៥០០ លាន​ដុល្លារ។

កាលពីឆ្នាំ ២០២៤ ការនាំចេញទុរេនរបស់វៀតណាម​បាន​កើនដល់កម្រិតខ្ពស់បំផុត ៣,៣ ប៊ីលាន​ដុល្លារ ដោយទីផ្សារចិន​រួមចំណែកជាង ៩០ ភាគរយ ក្នុងនោះ៕