ការដោះដូរទំនិញកម្ពុជា-ចិន សម្រេចបានជាង $៥,៦៩ ពាន់លាន

គិតចាប់ពីខែមករា ដល់ខែមេសា ឆ្នាំ ២០២៥ ការដោះដូរទំនិញពាណិជ្ជកម្មកម្ពុជា-ចិន សម្រេច​បាន​ជាង ៥,៦៩ ពាន់​លានដុល្លារ កើនឡើង ២៧,១% ធៀបនឹងរយៈពេលដូចគ្នា នៅឆ្នាំ ២០២៤។ នេះ​បើយោងតាម​អគ្គនាយកដ្ឋាន​គយ និង​​​រដ្ឋាករ​កម្ពុជា ​(GDCE)។​

ទិន្នន័យរបស់ GDCE បង្ហាញថា ចាប់ពីខែមករា-មេសា ការនាំចេញ-នាំចូលទំនិញ​រវាង​ប្រទេស​​​​​ទាំង​​ពីរមានទឹកប្រាក់សរុប ៥,៦៩ ពាន់លានដុល្លារ ក្នុង​នោះ​កម្ពុជានាំទំនិញទៅចិន មានតម្លៃ​ជាង ៤៧៨ លានដុល្លារ ធ្លាក់ចុះ ១,៧% និង​ទំនិញ​ចិន​នាំចូល​មកកម្ពុជា​តម្លៃ ៥,២១ ពាន់លាន​ដុល្លារ កើនឡើង ៣០,៥%។

លោក ឡោ វិចិត្រ អនុប្រធានសមាគមពាណិជ្ជកម្មកម្ពុជា-ចិន ប្រាប់កម្ពុជាថ្មីថា កម្ពុជាទិញ​ទំនិញ​ពី​ចិន​មកច្រើនជាងនាំចេញ ក្នុងនោះកម្ពុជា​នាំចូលវត្ថុធាតុដើមក៏ច្រើន។

លោក ឡោ វិចិត្រ បន្ថែមថា កម្ពុជាប្រៀបដូចជាមជ្ឈមណ្ឌលបង្គុំ​ហើយ​នាំចេញ​ទៅ​ទីផ្សារអឺរ៉ុប និងអាមេរិក ដោយសារកម្ពុជាខ្វះវត្ថុធាតុដើម ខណៈផលិតផលនាំចូលមួយ​ចំនួនជា​ផលិត​ផលសម្រេច ហើយមួយចំនួនជាវត្ថុធាតុដើម។​

លោកបណ្ឌិត ហុង វណ្ណៈ អ្នក​ជំនាញ​ផ្នែក​សេដ្ឋកិច្ច​​នៅ​រាជ្យ​បណ្ឌិត្យសភា​កម្ពុជាមានប្រសាសន៍ថា ​ឱន​ភាព​ពាណិជ្ជកម្មរវាងកម្ពុជាចិនមិនមានកំណើនខ្ពស់ទេ ដោយសារចិនមានផលិតកម្មរោងចក្រកាត់ដេរ និងរោងចក្រឧស្សាហកម្មច្រើននៅកម្ពុជា។

បើតាមលោក ហុង វណ្ណៈ ទោះបីកម្ពុជាបានចុះកិច្ចព្រមព្រៀងទីផ្សារ​សេរីជាមួយប្រទេស​ចិនក៏ដោយ ក៏ឱនភាព​ពាណិជ្ជ​កម្ម នៅតែបន្តកើតមាន ដោយសារកម្ពុជាមានតម្រូវការ​ធំពីប្រ​ទេស​ចិន ដែលមានសម្ភារ​បរិក្ខាផ្សេងៗ។

តម្រូវការ វត្ថុធាតុដើម សម្ភារៈ ពីប្រទេសចិនធូរថ្លៃជាងគេ បើប្រៀបធៀបជាមួយអាស៊ាន ហើយ​សម្ភារៈវត្ថុធាតុដើមសម្លៀកបំពាក់ក៏មានច្រើន៕

អត្ថបទ៖ ឡេង ដេត