ទំនុកចិត្តអ្នកប្រើប្រាស់ថៃ ធ្លាក់ចុះកាន់តែខ្លាំង ​ដោយសារបញ្ហាសេដ្ឋកិច្ច

ការស្ទង់មតិថ្មីមួយ ដែល​ចេញផ្សាយកាលពីថ្ងៃ​ព្រហស្បតិ៍ បាន​បង្ហាញ​ថា ទំនុកចិត្តអ្នកប្រើប្រាស់ថៃបានធ្លាក់ចុះក្នុងរយៈពេល ៦ ខែជាប់ៗគ្នា ​នៅខែកក្កដា ដល់កម្រិតទាបបំផុតក្នុងរយៈពេល ៣១ ខែ ដោយ​សារ​តែ​ក្ដីព្រួយបារម្ភជាចម្បង​ពីពន្ធគយរបស់សហរដ្ឋអាមេរិក ភាព​យឺតយ៉ាវសេដ្ឋកិច្ច​ និងអស្ថិរភាពនយោបាយ​ក្នុងស្រុក។ នេះបើតាមការចុះផ្សាយរបស់​កាសែតបាងកកប៉ុស្តិ៍។

សន្ទស្សន៍ទំនុកចិត្តអ្នកប្រើប្រាស់ថៃ ក្នុងការស្ទង់មតិ​របស់សាកលវិទ្យាល័យសភាពាណិជ្ជកម្មថៃ បានបន្ត​ធ្លាក់ចុះមកត្រឹម ៥១,៧ ពិន្ទុ នៅខែកក្កដា ពី ៥២,៧ ពិន្ទុ នៅខែមិថុនា។

របាយការណ៍នៃការស្ទង់មតិ​ បាន​និយាយថា ភាព​យឺតយ៉ាវនៃសេដ្ឋកិច្ច សង្រ្គាម​ពាណិជ្ជកម្ម និងការចំណាយប្រចាំថ្ងៃខ្ពស់ នៅតែបន្តប៉ះពាល់ដល់ទំនុកចិត្តអ្នកប្រើប្រាស់។ ​

​សាកលវិទ្យាធិការនៃសាកលវិទ្យាល័យសភាពាណិជ្ជកម្មថៃ លោក Thanavath Phonvichai ​​បាន​និយាយ​ថា សេដ្ឋកិច្ច​របស់​ប្រទេស​ថៃ​បង្ហាញ​ពី​សញ្ញា​​ជាប់គាំង​ ដោយ​​​ទំនុក​ចិត្ត​​អ្នកប្រើប្រាស់ខ្សោយ ​ហើយ​អំណាច​ទិញ​មាន​កម្រិត។ កំណើនសេដ្ឋកិច្ចវិញ អាចថយចុះមកត្រឹម ១,៧ ភាគរយ នៅឆ្នាំនេះ ដោយ​ធ្លាក់ចុះពីកំណើន ២,៥ ភាគរយ នៅឆ្នាំ ២០២៤។ ​

ទោះបីជាមានការបន្ថយពន្ធពី ៣៦ ភាគរយ មកត្រឹម ១៩ ភាគរយ ពី​សហរដ្ឋអាមេរិកក្ដី ​ក្តីបារម្ភនៅតែមានចំពោះពន្ធលើទំនិញដែលដឹកជញ្ជូនតាមប្រទេសថៃពីប្រទេសផ្សេងៗ​ទៀត​ (ទំនិញឆ្លងកាត់)។ លើស​ពីនេះ ភាពមិនច្បាស់លាស់ខាងនយោបាយ ជាពិសេសបន្ទាប់ពីការព្យួរតំណែងរបស់លោកស្រីនាយករដ្ឋមន្ត្រី ​ផែថងថាន ស៊ីណាវ៉ាត្រ​ ក៏កំពុងប៉ះពាល់ដល់ទំនុកចិត្តសាធារណៈផងដែរ៕