តម្លៃមាសស្ទុះឡើងដល់ជិត ៤១០០ ដុល្លារ មួយតម្លឹង មុនពេលអាមេរិកទម្លាក់​អត្រា​ការ​ប្រាក់

តម្លៃហាងឆេងមាសបានបន្តកើនឡើងដល់ជិត ៤១០០ ដុល្លារ ក្នុងមួយតម្លឹង​នៅថ្ងៃ​ព្រហស្បតិ៍នេះ នៅមុនពេលពេលអាមេរិកត្រៀម​កាត់​​​បន្ថយអត្រាការប្រាក់នៅថ្ងៃទី ១៧ ខែកញ្ញា ឆ្នាំ ២០២៥ និងជំនួបមេដឹកនាំត្រីភាគី អា​មេរិក-រុស្ស៊ី-អ៊ុក្រែននៅពេលខាងមុខ។

គិតត្រឹមម៉ោង ៩ ព្រឹកថ្ងៃទី ២៨ ខែសីហា ឆ្នាំ ២០២៥ មាសកំពុងជួញដូរនៅក្នុងតម្លៃ ៤០៨៤ ក្នុងមួយតម្លឹង។ សម្រាប់​ហាងឆេងមាសក្នុងស្រុកតាម​បណ្ដាហាងនានានៅ​រាជធានី​ភ្នំពេញ លក់​ចេញ​​ក្នុងតម្លៃ ៤០៧ ដុល្លារក្នុងមួយជី។

លោក ឡុង សំណាង ប្រធានផ្នែកប្រឹក្សាយោបល់ហិរញ្ញវត្ថុក្រុមហ៊ុន ​PP Link securities ប្រាប់​កម្ពុជាថ្មីថា នៅចំពោះមុខមានព័ត៌មានធំពីរ ដែលអាចធ្វើឱ្យតម្លៃហាង​ឆេងមាសមាន​ការ​ប្រែ​ប្រួល ទី១ គឺពាក់ព័ន្ធនឹងការកាត់បន្ថយអត្រាការប្រាក់នៅថ្ងៃទី ១៧ ខែកញ្ញា ឆ្នាំ ២០២៥។ ទី២ ពាក់​ព័ន្ធនឹងការប្រជុំបិទបញ្ចប់សង្គ្រាមរវាងរុស្ស៊ី-អ៊ុយក្រែន ដោយមានការជួបគ្នាត្រីភាគីរវាង​លោក​​ដូណាល់ ត្រាំ ជាមួយលោក ហ្សេលេនស្គី និងលោក ពូទីន។

លោក ដូណាល់ ត្រាំ ប្រធានាធិបតីអាមេរិក បានលើកឡើងថា​ ប្រសិនបើម្ដងនេះ មេដឹកនាំទាំងពីរមិនព្រមបញ្ចប់​សង្គ្រាមនៅក្នុងពេលនេះទេ លោក ត្រាំ នឹងដកខ្លួនចេញពីសង្គ្រាមរុស្ស៊ី-អ៊ុយក្រែនតែម្ដង ហើយ​ការ​ខូចខាតបន្តទៀត គាត់មិនដឹងលឺទៀតទេ។

លោក ឡុង សំណាង យល់ថា៖ «ប្រសិនបើការប្រជុំត្រីភាគី មិនមានផ្លែផ្កា គឺតម្លៃហាងឆេង​មាស​​នឹង​ហក់ឡើងបន្តទៀត តែបើសិនជាការប្រជុំមួយនេះ រកចំណុចកណ្ដាលឃើញ ឬក៏បញ្ចប់​សង្គ្រាម តម្លៃហាងឆេងមាសនឹងអាចធ្លាក់ចុះមកវិញមុនថ្ងៃទី ១៧ ខែកញ្ញាខាងមុខនេះ»។

តម្លៃមាសអន្តរជាតិឯណោះវិញ ក៏មាន​ទំនោរកើនឡើងផងដែរក្នុងរយៈពេលប៉ុន្មានថ្ងៃនេះ។ ក្នុងវគ្គជួញដូរលើទីផ្សារអាស៊ីនាព្រឹកថ្ងៃព្រហស្បតិ៍នេះ តម្លៃមាសជួញដូរដោយ​ផ្ទាល់បាន​កើនឡើងប្រហែល ៣ ៣៩០ ដុល្លារ/អោន៕

អត្ថបទ៖ ឡេង ដេត