សារ៉ាយ សក្ខិណា បួងសួងសុំសេចក្តីសុខជូនពលរដ្ឋនៅប្រទេសកំណើត

ភ្នំពេញ៖ ខណៈដែលប្រទេសកម្ពុជាកំពុងប្រឈមជំងឺកូវីដ-១៩នោះ អតីតតារាសម្តែងស្រីអ្នកនាង សារ៉ាយ សក្ខិណា ជាថ្មីម្តងទៀតបានលើកដៃសំពះបួងសួងសុំសេចក្តីសុខជូនប្រជាពលរដ្ឋខ្មែរនៅប្រទេសកំណើតឱ្យរួចផុតពីជំងឺដ៏កាចសាហាវនេះ។

ទោះបីជាពេលនេះ សារ៉ាយ សក្ខិណា កំពុងតែរស់នៅឯនាយសមុទ្រនៃទឹកដីសហរដ្ឋអាមេរិកក៏ពិតមែន តែជានិច្ចកាលនាងតែងតែបង្ហាញក្តីព្រួយបារម្ភពីសុខទុក្ខបងប្អូនខ្មែរជាបន្តបន្ទាប់។ ជាក់ស្តែងមុននេះ សារ៉ាយ សក្ខិណា បានបួងសួងសុំសេចក្តីសុខជូនពលរដ្ឋខ្មែរផងដែរ។

អ្នកនាង សារ៉ាយ សក្ខិណា បានរៀបរាប់ថា៖ “នាងខ្ញុំសូមបួងសួងដល់វត្ថុសក្ដិសិទ្ធិទាំងអស់ជួយតាមថែរក្សាប្រជាជនកម្ពុជាឱ្យចៀសផុតពីជំងឺដ៏កាចសាហាវនេះ ហើយសូមឱ្យប្រជាជនកម្ពុជាជួបតែសុខសុវត្ថិភាពភាពសប្បាយរីករាយឡើងវិញ។ សូមឱ្យអ្នកទាំងអស់គ្នាថែរក្សាសុខភាព ជាពិសេសអនុវត្ត ៣កុំ៣ការពារ”។

គួររំលឹកថា សារ៉ាយ សក្ខិណា បានរៀបការនៅក្នុងស្រុកជាមួយអាណិកជនខ្មែរ មកពីអាមេរិក លោក កែវ ប៊ុនមេត្រី កាលពីអំឡុងខែធ្នូ ឆ្នាំ២០១៣ និងបានរៀបការលើកទី២នៅអាមេរិកនាចុងខែមីនា ឆ្នាំ២០១៤ ហើយពេលនេះនាងទទួលបានចំណងដៃកូនប្រុស-ស្រីចំនួន២នាក់៕

អត្ថបទ៖ ចាន់រ៉ា