លោកយាយ ណយ សំណាង មិនអាចធ្វើរឿងនេះបានដូចដើមវិញទេ ក្រោយជាកូវីដ-១៩

ភ្នំពេញ៖ បន្ទាប់ពីព្យាបាលជាសះស្បើយពីកូវីដ-១៩ មានរយ:ពេលមួយខែមកនោះឃើញថា សុខភាពរបស់លោកយាយ ណយ សំណាង បច្ចុប្បន្នបានល្អប្រសើរច្រើន។ ប៉ុន្តែមានរឿងមួយដែលគាត់មិនអាចធ្វើបានដូចដើមវិញទេ។

តារាចម្រៀងលោក វណ្ណា ស័ក្តិ កូនប្រុសបង្កើតលោកយាយ ណយ សំណាង បានថ្លែងប្រាប់ឱ្យដឹងថា បច្ចុប្បន្នសុខភាពលោកយាយ ណយ សំណាង គឺបានល្អប្រសើរហើយ ព្រោះគាត់ពិសាបានច្រើនបន្ទាប់ពីជាសះស្បើយកូវីដ-១៩។

វណ្ណា ស័ក្តិ បានបន្តថា៖ “ខ្ញុំឃើញអ្នកម៉ែពិសាបានច្រើន ខ្ញុំសប្បាយចិត្តណាស់ តែឆ្ងល់ណាស់ហេតុអ្វីក៏គាត់និយាយមិនច្បាស់ដូចមុន អ៊ីចឹង ខ្ញុំមិនយល់ថាមកពីអ្វីទៅ។ តែក៏ខ្ញុំសប្បាយចិត្តដែរ ដែលបានម៉ែមានព្រះជន្មឡើងវិញ ជាម្លប់ដល់កូនចៅដើម្បីឱ្យកូនចៅបានមើលថែគាត់វិញម្តង”។

សូមបញ្ជាក់ថាតារាកំប្លែង និងអាយ៉ៃជើងចាស់លោកយាយ ណយ សំណាង បានជាសះស្បើយពីជំងឺកូវីដ-១៩ កាលពីថ្ងៃទី២៩ ខែឧសភា ឆ្នាំ២០២១ បន្ទា ប់ទទួលបានការព្យាបាលយ៉ាងយកចិត្តទុក្ខដាក់ពីក្រុមគ្រូពេទ្យ គ្រាដែលលោកយាយមានជំងឺកូវីដ-១៩ ស្ថិតក្នុងដំណាក់កាលធ្ងន់ធ្ងរ៕

អត្ថបទ៖ ចាន់រ៉ា