កាលពីថ្មីៗកន្លងទៅផលិតករខ្មែរល្បីឈ្មោះមួយរូប គឺលោក ហ៊ុយ យ៉ាឡេង បានបង្ហើបពីបំណងរបស់ខ្លួនក្នុងការផលិតភាពយន្តរឿង “គុនខ្មែរ” ម្តងរួចមកហើយ ប៉ុន្តែដោយខ្វះខាតថវិកាដើម្បីផលិតលោកបានអំពាវនាវឲ្យមានការចូលរួមពីមហាជនទូទៅ។

សម្រាប់គោលបំណងនៃការផលិតនេះត្រូវបានលោក ហ៊ុយ យ៉ាឡេង បញ្ជាក់ថា ដើម្បីចូលរួមលើកស្ទួយ “គុនខ្មែរ ” និងផ្សព្វផ្សាយទៅពិភពលោកឲ្យបានស្គាល់កាន់តែច្បាស់អំពីវិស័យគុនខ្មែរ។ លោកថា ចំពោះការផលិតនេះត្រូវចំណាយដើមទុកអស់រហូតខ្ទង់១០ម៉ឺនដុល្លារឯណ្ណោះ។

ជាថ្មីម្តងទៀតលោក ហ៊ុយ យ៉ាឡេង បានប្រកាសពីបំណងក្នុងការផលិតនូវភាពយន្ត “គុណខ្មែរ” ដោយផ្អែកលើការចូលរួមរបស់កម្លាំងសាមគ្គីមហាជនដើម្បីបានដើមទុនផលិត។ លោក ហ៊ុយ យ៉ាឡេង បានថ្លែងតាមរយ:សារថា លោកនៅមិនទាន់មានថវិកាគ្រប់គ្រាន់ក្នុងការផលិតនៅឡើយទេមកដល់ពេលនេះ តែលោកមានត្រឹមតែជាកម្លាំង និងសម្ភារ:​សម្រាប់​ត្រៀមថតប៉ុណ្ណោះ។

លោកនិយាយបន្តថា រឿងដែលត្រូវការពេលនេះគឺមានតែរួមគ្នាតាមកម្លាំងសទ្ធាដើម្បីលើកស្ទួយ “គុនខ្មែរ” ទៅកាន់ពិភពលោកតាមរយៈផលិតភាពយន្តរឿងគុនខ្មែរផ្អែកលើរឿងពិតប្រវត្តិសាស្រ្តដូនតាខ្មែរ និងអបអរសាទរដែលគុនខ្មែរមានវត្តមានក្នុងព្រឹត្តិការណ៍ប្រកួតកីឡាស៊ីហ្គេម និងអាស៊ានប៉ារ៉ាហ្គេម២០២៣។

ផលិតករលោក ហ៊ុយ យ៉ាងឡេង បន្ថែមទៀតថា អាចផលិតក្នុងខែឧសភា ឆ្នាំ២០២៣ ដោយការរួបរួមពីកូនខ្មែរទូទាំងពិភពលោក។ សម្រាប់ថវិកាផលិតលោកបញ្ជាក់ជាថ្មីថា ត្រូវចំណាយរហូតខ្ទង់១០ម៉ឺនដុល្លារអាមេរិក គឺអាចផលិតបានសមរម្យ ចូលទីផ្សារក្រៅស្រុកបាន ហើយសង្ឃឹមថាបងប្អូនជួយតាមលទ្ធភាព៕ 

អត្ថបទ៖ ចាន់រ៉ា