ជីវិតកម្សាន្ដ

ថុល សុភិទិ ស្នេហា និងអាជីពសិល្បៈ ហាក់មានយីអ៊ុនឡើងខ្ពស់

បានផុស

៩ ខែ មុន

នៅ

ថ្ងៃពុធ ២៨ មិថុនា ២០២៣

ដោយ

អតីតបេក្ខភាពប្រឡងចម្រៀងលំដាប់ថ្នាក់ពិភពលោក ថុល សុភិទិ មិនត្រឹមតែមានជីវិតគូដ៏ស្រស់បំព្រងទេ ងាកមកអាជីពសិល្បៈវិញក៏ជោគជ័យមិនធម្មតាដែរ ដោយថ្មីៗនេះ លោកបង្ហាញអារម្មណ៍រំភើបខ្លាំង ក្រោយបទចម្រៀងទាំងបទចាស់-ថ្មី ទទួលបានការគាំទ្រខ្លាំងពីមហាជន មានអ្នកទស្សនាខ្ទង់លានដង(M Views)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គេនៅចាំបានថា កន្លងមកអ្នកលក់អនឡាញ និងមានឈ្មោះជាអ្នកមេម៉ាយកូន ១ រូបស្រស់ ឡុង ម៉ានីន តែងបង្ហាញភាពស្និទ្ធស្នាលផ្អែមល្ហែមជាមួយតារាចម្រៀង ថុល សុភិទិ តាមរយៈការបង្ហោះរូបភាព និងវីដេអូជាបន្តបន្ទាប់នៅលើបណ្ដាញសង្គមនានា ធ្វើឲ្យអ្នកគាំទ្រចាប់អារម្មណ៍គ្រប់គ្នា។

ថ្វីត្បិតតែទំនាក់ទំនងរបស់អ្នកទាំងពីរហាក់មានភាពផ្អែមល្ហែម និងស្រលាញ់គ្នាប្រៀបដូចស្ករតាំងម៉ែក្ដី ប៉ុន្តែអ្វីដែលជាឧបសគ្គស្នេហារបស់ សុភិទិ និងអ្នកមេម៉ាយសាច់ខ្ចីខាងលើនោះ ត្រូវបានអ្នកគាំទ្រ រួមទាំងអ្នកប្រើប្រាស់បណ្ដាញសង្គមមួយចំនួន ផ្ទុះការរិះគន់ដោយមិនសំចៃមាត់។ ក្នុងនោះ មានមតិខ្លះថា ឡុង ម៉ានីន និងតារាចម្រៀង ថុល សុភិទិ មិនសក្ដិសមនឹងគ្នានោះឡើយ។ ឯខ្លះទៀតក៏បង្ហាញការពេញចិត្ត និងចង់ឲ្យពួកគេក្លាយជាគូស្នេហ៍ច្បាស់លាស់ជាមួយគ្នាទៀតផង។ ក្រោយមក មិនយូរប៉ុន្មាន អ្នកមេម៉ាយកូន ១ ឡុង ម៉ានីន ក៏បានប្រកាសចែកផ្លូវគ្នាជាមួយ ថុល សុភិទិ ផងដែរ។

យ៉ាងណាមិញ ក្រោយរងព្យុះភ្លៀងក្នុងរឿងស្នេហា ទីបំផុត ថុល សុភិទិ និងស្រីស្អាត ឡុង ម៉ានីន បានជម្នះវិលមកស្រលាញ់គ្នាម្ដងទៀត ថែមទាំងផ្អែមល្ហែមលើសដើម និងបើកចំហគ្រប់ពេល ដោយមិនលាក់បាំងដូចតារាមួយចំនួនតូចឡើយ។

ស្នេហាក៏សមប្រកប ងាកមកអាជីពសិល្បៈវិញ បើនិយាយពីទីផ្សារចម្រៀង និងសន្ទុះ នៃការគាំទ្រលើតារាចម្រៀងជំនាន់ថ្មីដែលទើបដុះពន្លកពីការប្រឡង ថុល សុភិទិ ក៏កាន់តែវិវឌ្ឍខ្លួនខ្លាំង ខណៈប្រជាប្រិយភាព និងការគាំទ្រ ហាក់មានភាពទាក់ទាញ។

តួយ៉ាងថ្មីៗនេះ ម្ចាស់បទ«មួយឆាវ» ថុល សុភិទិ បានបង្ហាញអារម្មណ៍រំភើប សប្បាយចិត្ត អរគុណទៅដល់លោកគ្រូភ្លេង និង មហាជន ដែលធ្វើឲ្យបទចម្រៀងរបស់លោកមួយរយៈចុងក្រោយនេះមានអ្នកចូលទស្សនារហូតរាប់លានដង។

តារាចម្រៀងវ័យក្មេង ថុល សុភិទិ បានលើកឡើងដោយក្ដីរំភើបថា «ខ្ញុំពិតជាសប្បាយចិត្ត និងអរគុណទៅដល់ពុកម៉ែបងប្អូន ខ្លាំងមែន មួយរយៈចុងក្រោយនេះ ទាំងបទចាស់ បទថ្មី ទទួលបានការគាំទ្រពី ពុកម៉ែបងប្អូន លើសពីការរំពឹងទុក»។

បទចម្រៀងផ្ទុះខ្លាំងចុងក្រោយរបស់តារាចម្រៀង ថុល សុភិទិ រួមមាន ៖

១.មួយឆាវ (13M)

២.ពេលនេះ ឆ្នាំមុន (6.1M)

៣.ស្រលាញ់រកតែប្រុសបោក (3.9M)

៤.ស្មោះទ្រង់ទ្រាយធំ (3.8M)

៥.ឆ្លងឆ្នាំយប់នេះ ខ្ញុំខូចចិត្តបំផុត (3.8M)

៦.One night (621k)

៧.ឆ្នាំនេះ ខ្ញុំមានសង្សារដូចគេហើយ (570k)។

ចំណែកបទចុងក្រោយ (អ្នកក្រោយ) ទទួលបាន 1M view រយៈពេល ៤ ថ្ងៃ។

តារាចម្រៀងប្រុសរបស់ផលិតកម្មហង្សមាស ដែលកើតចេញពីការប្រលងកម្មវិធីលំដាប់ថ្នាក់ពិភពលោក Cambodian Idol រដូវកាលទី ៤ ថុល សុភិទិ ក៏បានបង្ហើបថា នឹងមានបទចម្រៀងថ្មី ជូនជាកាដូរសម្រាប់អ្នកគាំទ្រ ក្នុងពេលឆាប់ៗនេះផងដែរ៕

អត្ថបទ ៖ ពិសី