ប្រសិន Lisa មិនបន្តកុងត្រាជាមួយ YG ដឹងទេក្រុមហ៊ុននឹងខាតបង់ចំណូលកម្រិតណា?

ព័ត៌មានចាកចេញពីផលិតកម្មយក្សរបស់កូរ៉េ​ YG Entertainment របស់ Lalisa នៅតែជាប្រធានបទក្តៅក្នុងរង្វង់វិស័យ K-POP ខណៈប្រព័ន្ធផ្សព្វផ្សាយក្នុងស្រុក និងក្រៅស្រុកជាច្រើនបានរាយការណ៍ថា តារារ៉េបជនជាតិថៃរូបនេះអាចនឹងមិនបន្តកុងត្រាថ្មីជាមួយទ្រនំរបស់ខ្លួនទៀតឡើយ។

ព័ត៌មានចចាមអារ៉ាមចាកចេញរបស់ Lalisa បានផ្ទុះឡើង បន្ទាប់ពីក្រុមហ៊ុនមួយនៅក្នុងប្រទេសចិនបានទាក់ទងទៅផលិតកម្ម YG ដើម្បីសាកសួរអំពីកាលវិភាគរបស់ក្រុម BLACKPINK និងពិភាក្សាអំពីការអញ្ជើញ Lalisa ឱ្យចូលរួមកម្មវិធីរបស់ពួកគេ។ ប៉ុន្តែខាងក្រុមហ៊ុនចិនបានទទួលចម្លើយថា ទាក់ទងនឹងកាលវិភាគការងាររបស់ Lalisa បន្ទាប់ពីខែសីហា ឆ្នាំ២០២៣ នៅមិនទាន់ប្រាកដនោះទេ ព្រោះ​រឿង​បន្ត​កុងត្រា​នៅ​មិន​ទាន់​ច្បាស់។

ក្រោយ​ប្រភព​ខាងលើបាន​លាតត្រដាង​ដូច្នេះ ទីភ្នាក់ងាររបស់ YG បានឆ្លើយតបភ្លាមៗថា ការបន្តកុងត្រាជាមួយសមាជិក ៣នាក់ផ្សេងទៀតរួមមាន Jisoo, Jennie, Rose បានដំណើរការយ៉ាងរលូនហើយ លើកលែងតែ Lalisa ព្រោះនាងជាប់កាលវិភាគមមាញឹកនៅក្រៅប្រទេស។

ទោះបីជាចេញមុខឆ្លើយតបបែបណាក្ដី មហាជននៅតែមន្ទិលសង្ស័យ និងយល់ថា ដំណឹងចាកចេញរបស់ Lalisa អាចជាការពិត។ ហើយប្រសិន Lalisa ពិតជាដើរចេញពីក្រុម BLACKPINK និងបញ្ចប់កិច្ចសន្យាត្រឹមខែសីហានេះពិតមែន ផលិតកម្មតន្ត្រី YG Entertainment អាចប៉ះពាល់ដល់ភាគហ៊ុនមិនតិចនោះទេ។ ទីភ្នាក់ងារ​ព័ត៌មាន CNBC បាន​បង្ហាញ​ថា​ តម្លៃ​ភាគហ៊ុន​របស់​ផលិតកម្ម YG Entertainment នឹងធ្លាក់ចំណូលពី ៧៣,៩០០វ៉ុន មកត្រឹម ៦៦,៧០០វ៉ុន ឬស្មើនឹង ៧%ឯណោះ។

បច្ចុប្បន្នគេនៅតែមិនទាន់ច្បាស់ឡើយថា សមាជិកទាំង៤ នៃក្រុម BLACKPINK នឹងបន្ត ឬមិនបន្តកុងត្រានោះទេ ទស្សនិកជនកំពុង​រង់ចាំ​ការ​បំភ្លឺ​ផ្ទាល់មាត់របស់​តារា​ស្រី​ទាំង ​៤​រូប ​ក្នុង​អំឡុង​ខែ​សីហាខាងមុខ៕

ប្រែសម្រួល៖ សន្យា

ចុចអាន៖ ប្រឡូកពិភពតន្ត្រីជាង ៧ឆ្នាំ ក្រុម BLACKPINK ចេញចម្រៀងបាន ៧០បទ