សមាគមសិល្បករខ្មែរ ប្រកាសផ្តល់សំបុត្រទស្សនា រឿង «ព្រះបាទជ័យវរ្ម័នទី៧» ឥតគិតថ្លៃ ១០០នាក់ ដល់សិល្បករសិល្បការិនី

ដើម្បីអបអរសាទរ មហោស្រពរបាំក្បាច់បុរាណខ្មែរ រឿង «ព្រះបាទជ័យវរ្ម័នទី៧» ត្រង់ឈុតស្នាព្រះហស្ថ និងសមិទ្ធផលនៃមហាវីរៈក្សត្រទាំង ៣អង្គ សមាគមសិល្បករខ្មែរ បានប្រកាសផ្តល់ជូនសំបុត្រចូលទស្សនាឥតគិតថ្លៃចំនួន ១០០នាក់ដំបូង ជូនដល់សិល្បករសិល្បការិនី (សមាគមចេញថ្លៃសំបុត្រជូន)។

ការប្រកាសផ្តល់ជូនសំបុត្រចូលទស្សនាឥតគិតថ្លៃនេះ គឺស្របពេលដែលមហោស្រព​សិល្ប​:​បុរាណ​ខ្មែរ​រឿង ​«​ព្រះបាទ​ជ័យ​វរ្ម័ន​ទី​៧» នឹងចាប់ផ្តើមនៅថ្ងៃស្អែកនេះហើយ ពោលគឺនៅថ្ងៃទី២៨ និង ២៩ ខែកញ្ញា ឆ្នាំ២០២៤ នៅទីតាំងសាលមហោស្រពកោះពេជ្រ វេលាម៉ោង ៦ល្ងាច។

ដោយហេតុនេះ សម្រាប់សិល្បករសិល្បការិនី ដែលមានបំណងចង់បានសំបុត្រចូលទស្សនាផ្ទាំងទស្សនីយភាពរឿង​«​ព្រះបាទ​ជ័យ​វរ្ម័ន​ទី​៧» អាចទំនាក់ទំនងយកសំបុត្រ តាមរយៈលេខ 010/089 987007 (ពុទ្ធិរក្ស) ។

គួររម្លឹកថា ព្រឹត្តិការណ៍មហោស្រពបុរាណខ្មែរស្អែកនេះ នឹងនាំយកនូវផ្ទាំងទស្សនីយភាពដ៏អស្ចារ្យ និងជាព្រឹត្តិការណ៍សិល្បៈក្បាច់បុរាណដ៏ធំមួយ ដោយមានសិល្បការិនីចូលរួមសម្ដែងប្រមាណ ២០០នាក់ ដឹកនាំសម្ដែងដោយ សាលាសិល្បៈវប្បធម៌ យុវណ្ឌី ជាមួយអារម្មណ៍ថ្មី និងអស្ចារ្យជាងមុន ជូនដល់ទស្សនិកជនចូលរួមទស្សនា៕