ជីវិតកម្សាន្ដ

បវរកញ្ញាថៃ Charlotte ចាញ់បោកលុយជាង១១ម៉ឺនដុល្លារ ពីក្រុមឆបោកតាមអ៊ីនធឺណែត

បានផុស

៤ ខែ មុន

នៅ

ថ្ងៃសៅរ៍ ១៤ ធ្នូ ២០២៤

ដោយ

ប៉ូលិសបានស្នើឲ្យតុលាការចេញដីកាចាប់ខ្លួនមន្ត្រីក្លែងក្លាយមួយក្រុម ដែលបានបោកប្រាស់អតីតបវរកញ្ញាចំណាត់ថ្នាក់លេខ៥ Miss Grand Thailand ឆ្នាំ ២០២២ គឺនាង Charlotte Austin ចំនួន ៤លានបាត (១១៧ ១៥០ដុល្លារ) ។

ម្ចាស់ជ័យលាភី Miss Grand Thailand 2022 Charlotte Austin ថ្មីៗនេះ បានធ្វើសន្និសីទសារព័ត៌មានមួយ ដើម្បីចែករំលែកថា នាងត្រូវបានគេបោកប្រាស់តាមទូរស័ព្ទ ហើយបានបាត់ប្រាក់ចំនួន ៤ លានបាត ។ ក្រុមជនឆបោកបានក្លែងបន្លំជាប៉ូលិសតាមប្រព័ន្ធអ៊ីនធឺណែត និងមន្ត្រីនាយកដ្ឋានស៊ើបអង្កេតពិសេស (DSI) ដោយចោទនាងថាជាប់ពាក់ព័ន្ធនឹងករណីលាងលុយកខ្វក់ពាក់ព័ន្ធនឹងបុរសម្នាក់ឈ្មោះ សត្យា បន្ទាប់មកបានគំរាម និងបង្ខំនាងឲ្យផ្ទេរប្រាក់ចំនួន៣ដង។ នៅពេលដែល Charlotte បានរកឃើញថា នាងត្រូវបានគេបោកប្រាស់នាងបានរាយការណ៍ទៅប៉ូលិស។

បន្ទាប់មក Charlotte ត្រូវបានអញ្ជើញឲ្យទៅសួរចម្លើយជាមួយឧត្តមសេនីយទោ Trairong Phiwapphan ដែលជាប្រធានស្តីទីនៃនាយកដ្ឋានទប់ស្កាត់ឧក្រិដ្ឋកម្មតាមអ៊ីនធឺណិត ដើម្បីសហការក្នុងការស៊ើបអង្កេតករណីនេះ។

ក្រោយមកទៀត នៅថ្ងៃទី ១៣ ខែធ្នូ លោកឧត្តមសេនីយ Wiwat Khamchamnarn បាននិយាយថា ក្រុមអ្នកស៊ើបអង្កេត បានស្នើសុំឲ្យតុលាការចេញដីកាចាប់ខ្លួនក្រុមដែលក្លែងបន្លំមន្ត្រីដើម្បីប្រព្រឹត្តការក្លែងបន្លំ ប៉ុន្តែមិនទាន់អាចបង្ហាញពីចំនួនជាក់លាក់នៅឡើយ។ លោកបញ្ជាក់ថា ការស៊ើបអង្កេតបានដំណើរការទៅមុខ ហើយប៉ូលិសបានតាមដានលំហូរលុយពីគណនីខ្មោច ដែលភ្ជាប់នឹងបណ្តាញនេះ។

យ៉ាងណាក៏ដោយ ព័ត៌មានអំពីបុរសពីរនាក់ដែលក្លែងបន្លំជាប៉ូលីសអ៊ីនធឺណេត និងបុគ្គលិក DSI នៅក្នុងការហៅទូរស័ព្ទត្រូវបានបញ្ជូនទៅផ្នែកវិភាគដើម្បីកំណត់អត្តសញ្ញាណ។

ឧត្តមសេនីយត្រី Trairong បន្ថែមថា ម្ចាស់គណនីខ្មោចទាំងនេះ បានប្រព្រឹត្តិបទល្មើសជាក់ស្តែង។ ដូច្នេះហើយទើបតុលាការចេញដីកាចាប់ខ្លួនពីបទឆបោក និងលាងលុយកខ្វក់។ ទាក់ទងនឹងការយកមកវិញនូវទ្រព្យសម្បត្តិរបស់ជនរងគ្រោះ ក្រុមស៊ើបអង្កេតកំពុងតាមដានយ៉ាងសកម្មនូវលំហូរប្រាក់ និងបង្កកគណនីពាក់ព័ន្ធជាច្រើនតាមដែលអាចធ្វើទៅបាន។

ជនសង្ស័យត្រូវបានគេកំណត់ថាជាអ្នកបោកប្រាស់តាមទូរស័ព្ទអាជីព។ ប៉ូលិសកំពុងបន្តការស៊ើបអង្កេតដើម្បីកំណត់ថាតើមានជនរងគ្រោះប៉ុន្មាននាក់មកហើយ ។ ទោះយ៉ាងណាក៏ដោយ វាប្រាកដណាស់ថាការហៅទូរស័ព្ទបោកប្រាស់ត្រូវបានធ្វើឡើងពីក្រៅប្រទេស។

ទន្ទឹមគ្នានោះដែរ ប៉ូលិសក៏បានដាស់តឿនប្រជាពលរដ្ឋកុំឲ្យទុកចិត្ត និងផ្ទេរប្រាក់នៅពេលទទួលការហៅទូរស័ព្ទស្រដៀងគ្នា និងមិនត្រូវត្រួតពិនិត្យដោយខ្លួនឯង ព្រោះឧក្រិដ្ឋជនតែងតែផ្លាស់ប្តូរវិធីសាស្រ្តរបស់ពួកគេជានិច្ច។ ផ្ទុយទៅវិញ ប្រជាពលរដ្ឋគួររាយការណ៍ជាបន្ទាន់ទៅអាជ្ញាធរ៕