អ៊ុក ណារីម រំភើបខ្លាំងក្រោយសម្តេចតេជោ ចាត់ទុក “ចម្រៀងគ្រួសារខ្មែរ” ជាវេទិកាចម្រៀងជោគជ័យបំផុត

លោក អ៊ុក​ ណារីម​ ដែលជាតារាចម្រៀង និងពិធីករ​សម្បូរវោហាស័ព្ទមិនចេះរីងស្ងួត និងជាអ្នករៀបចំក្នុងកម្មវិធី “ចម្រៀងគ្រួសារខ្មែរ” បានសម្តែងក្តីរំភើបនិងដឹងគុណចំពោះសម្តេចតេជោ ហ៊ុន សែន ដែលសម្តេចចាត់ទុកកម្មវិធីនេះ ជាវេទិកាចម្រៀងដែលជោគជ័យមានអាយុកាលវែងបំផុត។

តាមរយៈហ្វេសប៊ុកផេកផ្លូវការកម្មវិធី “ចម្រៀងគ្រួសារខ្មែរ” បានសម្តែងការអរគុណចំពោះសម្តេចតេជោ ហ៊ុន សែន ប្រធានក្រុមឧត្តមប្រឹក្សាផ្ទាល់ព្រះមហាក្សត្រ ដែលបានចូលទស្សនាកម្មវិធីមួយនេះ និងថែមទាំងបានបញ្ចេញមតិកោតសរសើរលើបណ្តាញទំនាក់ទំនងសង្គមរបស់កម្មវិធី។

ទន្ទឹមនឹងក្តីរំភើបនេះ លោក អ៊ុក ណារីម រួមនឹងក្រុមការងារ បានប្តេជ្ញាថានឹងខិតខំរួបរួមគ្នាក្នុងការធ្វើកិច្ចការងារដោយស្ម័គ្រចិត្តនេះ ឱ្យកាន់តែខ្លាំងក្លាថែមទៀតដើម្បីវប្បធម៌ និងសង្គមជាតិខ្មែរ ក្រោមដំបូលសុខសន្តិភាពដ៏ត្រជាក់ត្រជុំនេះ។

សូមជម្រាបដែរថា កម្មវិធី​ «ចម្រៀងគ្រួសារខ្មែរ» ដែលរៀបចំនិងដឹកនាំដោយតារាចម្រៀងល្បីឈ្មោះ​ លោក​ អ៊ុក​ ណារីម​ និងអ្នកនាង​ ឆោម​ ឆពុំ បច្ចុប្បន្នកំពុងតែមានការចាប់អារម្មណ៍ និងទទួលបានការគាំទ្រច្រើនពីសាធារណជន ក៏ដូចជាថ្នាក់ដឹកនាំផងដែរ។

គួរជម្រាបថា គិតមកដល់ពេលនេះ កម្មវិធី “ចម្រៀងគ្រួសារខ្មែរ” មានរយៈពេលជិត១០ឆ្នាំមកហើយ ខណៈកម្មវិធីនេះដំណើរការដោយមានលោក អ៊ុក ណារីម និងអ្នកនាង ឆោម ឆពុំ ជាអ្នកដឹកនាំកម្មវិធី ហើយក៏មានវត្តមានតារាប្រុសស្រីល្បីឈ្មោះជាច្រើនដួង​ បានបញ្ចេញសមត្ថភាពច្រៀងលើសិល្ប:គ្រប់ទម្រង់ចម្រុះសម័យនិងបុរាណ តបតាមសំណូមពរ និងការគាំទ្ររបស់ទស្សនិកជន ដែលចង់ឱ្យមានការជួបជុំអ្នកសិល្ប:ទាំងថ្មីនិងចាស់៕ អត្ថបទ៖ ចាន់រ៉ា