លោក អ៊ុក ណារីម ព្រមានចាត់វិធានការតាមផ្លូវច្បាប់ចំពោះអ្នកក្លែងបន្លំ Account Facebook

តារា​ចម្រៀង និង​ជា​ពិធី​ករ​សម្បូរ​វោហារ​សព្ទ​មិន​ចេះ​រីង​ស្ងួត​នៅ​ក្នុង​កម្មវិធី​ចម្រៀង​គ្រួសារ​ខ្មែរ លោក អ៊ុក ណារីម បាន​ប្រតិកម្ម និង​ព្រមាន​ចាត់​វិធានការ​តាម​ផ្លូវ​ច្បាប់​ចំពោះ​អ្នក​ក្លែងបន្លំ Account Facebook ក្នុង​ចេតនា​មិនល្អ ឬ​ប្រព្រឹត្តិ​នូវ​ទង្វើ​បោកប្រាស់​ផ្សេងៗ​ជាដើម។

លោក អ៊ុក ណារីម ក៏បាន​ធ្វើការ​បដិសេធ និង​អំពាវនាវ​ឲ្យ​មហាជន ក៏ដូចជា​អ្នក​គាំទ្រ​លោក​ទាំងអស់ សូម​មេត្តា​ប្រុងប្រយ័ត្ន​សកម្មភាព​នានា​របស់​ក្រុម​ជន​អនាមិក​ដែល​បាន​បង្កើត​ក្លែងបន្លំ​Account Facebook និង​ទំព័រ​ផេក យក​ឈ្មោះ ព្រមទាំង​រូបថត​របស់​លោក​ទៅ​ប្រើប្រាស់។

ពិធី​ករ​សម្ដី​ស្រទន់​លោក អ៊ុក ណារីម បាន​បញ្ជាក់​ថា «ខ្ញុំបាទ អ៊ុក ណារីម សូម​ប្រកាស​បដិសេធ​អាខោន​ដែល​ប្រើ​ឈ្មោះ​ខ្ញុំ ហើយ​យក​រូប​ខ្ញុំបាទ​ទៅ​ដាក់​ក្នុង Profile និង​អាខោន​ខ្លះ​ទៀត​ដែល​ដាក់​ឈ្មោះ​ដូច​តែ​មិន​ដាក់​រូប​ខ្ញុំ ដែល​មាន​រូប​ដូច​ខាង​ក្រោម​នេះ គឺ​មិនមែន​ជា​អាខោន facebook ពិត​ប្រាកដ​របស់ខ្ញុំ​ទេ»។

ពិធី​ករ​ល្បីឈ្មោះ​លោក អ៊ុក ណារីម បាន​និយាយ​ទៀត​ថា «ដូចនេះ សូម​បងប្អូន​ទាំងអស់​កុំ​ជឿ​ទៅ​លើ​ការ​ផ្សព្វផ្សាយ​ផ្សេងៗ​ថា​ជា​ខ្ញុំ ហើយ​បើ​បាន​មាន​ឆាត​ទៅ​រក​ខ្ចី​លុយ ឬ​ធ្វើ​អ្វី​ផ្ដេសផ្ដាស​ខុសច្បាប់ អសីលធម៌​ផ្សេងៗ គឺ​ខ្ញុំបាទ​មិន​ទទួល​ខុសត្រូវ​ទេ និង​សូម​ឲ្យ​ម្ចាស់​អាខោន​ក្លែង​ដាក់​ឈ្មោះ​ខ្ញុំ ហើយ​យក​រូប​ខ្ញុំ​ទៅ​ដាក់ ត្រូវ​ដក​ចេញ​ជាបន្ទាន់ បើ​មិន​ដូច្នោះ​ទេ ខ្ញុំបាទ នឹង​ដាក់​ពាក្យ​ប្ដឹង​តាម​ផ្លូវ​ច្បាប់»។

លោក អ៊ុក ណារីម បាន​បញ្ជាក់​ថែមទៀត​ថា «សូម​ជម្រាប​ជូន​បងប្អូន​ឲ្យ​បាន​ជ្រាប​ផង​ដែរ​ថា អាខោន និង​ផេក​ពិតប្រាកដ ឈ្មោះ​របស់​ខ្ញុំបាទ ទាំង​ឈ្មោះ​អក្សរ​ខ្មែរ និង​អង់គ្លេស មាន​ដូច​ខាង​ក្រោម​នេះ»៕

អត្ថបទ ៖ ចាន់រ៉ា